1 Ut kik’ulman naq chirix naq kiraqe’ li xkab’ xkaak’al chihab’ rawa’b’ejileb’ laj raqol aatin, ak kik’ulman chixjunil li k’a’aq re ru a’in, ut eb’ laj Lamanita ke’ok, lix k’ihaleb’, choq’ jun tenamit tiik xch’ool, jo’kan naq lix tiikilaleb’ naxq’ax xtiikilaleb’ laj Nefita, xb’aan naq xaqxookeb’ chi kaw ut ink’a’ neke’eek’an sa’ li paab’aal.

2 Xb’aan naq k’ehomaq reetal, wankeb’ naab’al reheb’ laj Nefita li ke’ok chaq chi kawujenaqeb’ ut chi moko yot’b’il ta xch’ooleb’, ut chi q’axaleb’ aj maak, toj reetal naq ke’xtz’eqtaana li raatin li Dios ut chixjunil li jultikank ut li profeetil ch’olob’ank li nachal sa’ xyanqeb’.

3 A’b’anan eb’ li wankeb’ sa’ li iglees ke’wan xnimal xsahileb’ xch’ool xb’aan xjalajikeb’ xch’ool laj Lamanita; relik chi yaal, xb’aan lix iglees li Dios, li kixaqab’aman chaq sa’ xyanqeb’. Ut ke’wan sa’ komonil chirib’ileb’ rib’, ut ke’saho’ sa’ xch’ool chirib’ileb’ rib’, ut kiwan xnimal xsahileb’ xch’ool.

4 Ut kik’ulman naq naab’al reheb’ laj Lamanita koxe’kub’eeq sa’ li ch’och’ Tzarahemla, ut ke’xch’olob’ chiru lix tenamiteb’ laj Nefita chan ru naq ki’ux xjalajikeb’ xch’ool, ut ke’relaji chiruheb’ naq chiwanq xpaab’aaleb’ ut che’xjal xk’a’uxl.

5 Relik chi yaal, ut naab’al reheb’ ke’jultikan aatin rik’in wankilal, ut chi k’eeb’ileb’ xwankil chi numtajenaq xnimal, toj reetal naq ke’kub’siik naab’al sa’ xchamal li tuulanil ch’oolejil, re te’wanq choq’ tuulanil aj taaqenel re li Dios ut li Karneer.

6 Ut kik’ulman naq naab’al reheb’ laj Lamanita xkoheb’ sa’ li ch’och’ sa’ xjayal lix nim li saq’e; ut jo’kan ajwi’ laj Nefi ut laj Lehi xkoheb’ sa’ li ch’och’ sa’ xjayal lix nim li saq’e, re jultikank aatin chiruheb’ li tenamit. Ut chi jo’kan kiraqe’ li rox xkaak’al chihab’.

7 Ut k’ehomaq reetal, kiwan tuqtuukilal sa’ chixjunil li ch’och’, jo’kan naq eb’ laj Nefita neke’xik sa’ b’araq re li ch’och’ li te’raj, us ta sa’ xyanqeb’ laj Nefita malaj laj Lamanita.

8 Ut kik’ulman naq eb’ laj Lamanita neke’xik ajwi’ a’ yaal b’ar ke’raj, ma sa’ xyanqeb’ laj Lamanita malaj sa’ xyanqeb’ laj Nefita; ut chi jo’kan ke’ru chiraatinankil rib’ chi moko ramb’il ta, re loq’ok malaj re k’ayink, ut re k’uluk tumin, jo’ chanru li neke’raj.

9 Ut kik’ulman naq ke’b’ihomo’ chi numtajenaq, eb’ laj Lamanita jo’keb’ ajwi’ laj Nefita; ut kitam chi numtajenaq chiruheb’ li oor, ut li plaat, ut li k’iila paay chi ch’iich’ terto xtz’aq, jo’ sa’ li ch’och’ sa’ xtz’e li saq’e jo’ sa’ li ch’och’ sa’ xnim.

10 Anajwan li ch’och’ sa’ xtz’e li saq’e Lehi nayeeman re, ut li ch’och’ sa’ xnim Mulek nayeeman re, jo’ chanru xk’ab’a’ li ralal laj Sedekias; xb’aan naq li Qaawa’ kixk’am laj Mulek sa’ li ch’och’ sa’ xnim li saq’e, ut laj Lehi sa’ li ch’och’ sa’ xtz’e.

11 Ut k’ehomaq reetal, kiwan li k’iila paay chi oor sa’ xkab’ichal li ch’och’ a’in, jo’ ajwi’ chi plaat, ut li pek ch’iich’ xsa’ terto xtz’aq, li jar raqal wan; ut ke’wan ajwi’ aj k’anjelenel aj tz’ilol na’leb’, li neke’k’anjelank re li k’iila paay chi pek ch’iich’ xsa’ ut neke’xsaqob’resi ru; ut chi jo’kan ke’b’ihomo’.

12 Ke’raw xnaab’alil li iyaj nak’uxman, jo’ sa’ xnim li saq’e jo’ sa’ xtz’e; ut ke’tam chi numtajenaq, sa’ xnim li saq’e jo’ ajwi’ sa’ xtz’e. Ut ke’k’ihan ut ke’kawu xmetz’ew chi numtajenaq sa’ li ch’och’. Ut ke’xk’iresi k’iila ketomq ut teep chi xul, relik chi yaal, k’iila xul nimob’resinb’ileb’ xtib’el.

13 K’ehomaq reetal, li rixqilaleb’ ke’k’anjelak ut ke’b’aqok k’aam, ut ke’xyiib’ li k’iila paay chi t’ikr, li q’unal t’ikr b’aqb’il chi chaab’il ut li junjunq paay chi t’ikr, re xtz’apb’aleb’ lix t’ust’uukilal. Ut li xkaa xkaak’al chihab’ kinume’ sa’ tuqtuukilal.

14 Ut sa’ li ro’ xkaak’al chihab’ kiwan ajwi’ xnimal xsahileb’ xch’ool ut xtuqtuukilaleb’, relik chi yaal, naab’al li jultikank aatin ut li k’iila profeetil aatin chirix li k’a’ru toj taachalq. Ut chi jo’kan kinume’ li ro’ xkaak’al chihab’.

15 Ut kik’ulman naq sa’ li xwaq xkaak’al chihab’ rawa’b’ejileb’ laj raqol aatin, k’ehomaq reetal, kikamsiik laj Cetzoram xb’aan jun li uq’ej moko nawb’il ta ru, naq chunchu sa’ li raqleb’aal aatin. Ut kik’ulman naq sa’ li chihab’ ajwi’ a’an, naq li ralal, li kixaqab’aak xb’aan li tenamit sa’ xna’aj, kikamsiik ajwi’. Ut chi jo’kan kiraqe’ li xwaq xkaak’al chihab’.

16 Ut sa’ xtiklajik li xwuq xkaak’al chihab’ eb’ li tenamit ke’ok wi’chik chi nimank xmaa’usilaleb’ chi numtajenaq.

17 Xb’aan naq k’ehomaq reetal, li Qaawa’ k’a’jo’ xnajtil naq kirosob’tesiheb’ rik’in li b’ihomal re ruchich’och’, jo’kan naq ink’a’ ke’eek’asiik chaq sa’ li josq’il, sa’ li pleet, chi moko sa’ li hoyok kik’; jo’kan naq ke’ok chixk’eeb’aleb’ xch’ool chirix lix b’ihomaleb’; relik chi yaal, ke’ok chixsik’b’al xk’ulb’al xtumineb’ re te’wanq chi taqsinb’il li jun sa’ xb’een li jun chik; jo’kan naq ke’ok chixb’aanunkil li muqmuukil kamsink, ut chi maq’ok ut chi poqlenk, re naq te’xk’ul xtumineb’.

18 Anajwan ut k’ehomaq reetal, eb’ laj kamsinel ut laj poqlenel a’in, a’aneb’ jun molam li k’uub’anb’il chaq xb’aan laj Kixkumen ut laj Gadianton. Anajwan ut kik’ulman naq naab’al ke’wan, sa’ xyanqeb’ ajwi’ laj Nefita, sa’ xmolam laj Gadianton. A’b’an k’ehomaq reetal, k’iheb’ wi’chik sa’ xyanqeb’ li jun raqal reheb’ laj Lamanita li q’axal aj maakeb’. Ut a’aneb’ aj elq’ ut aj kamsinel re laj Gadianton nayehe’ reheb’.

19 Ut a’aneb’ li ke’kamsink re li xb’eenil aj raqol aatin aj Cetzoram, ut li ralal, naq sa’ raqleb’aal aatin wankeb’; ut k’ehomaq reetal, moko ke’tawman ta.

20 Ut anajwan, naq ke’xtaw laj Lamanita naq wankeb’ laj elq’ sa’ xyanqeb’, kik’ulman naq ke’raho’ xch’ool chi numtajenaq; ut ke’roksi jo’ k’ihal li kiru chiruheb’ re xsachb’aleb’ chaq sa’ xb’een li ruchich’och’.

21 A’b’an k’ehomaq reetal, laj Satanas kireek’asiheb’ xch’ool lix k’ihaleb’ laj Nefita, jo’kan naq ke’xjunaji rib’ rik’ineb’ li molam a’an chi aj elq’, ut ke’ok sa’ lix sumwankeb’ ut lix xaqab’anb’il aatineb’, re te’xkol rib’ ut te’xk’uula rib’ chirib’ileb’ rib’ sa’ jo’ k’ihal li ch’a’ajkilal te’k’ojob’aaq wi’, re naq moko te’xk’ul ta rahilal xb’aan li kamsink, ut li poqlenk, ut li elq’ak neke’xb’aanu.

22 Ut kik’ulman naq kiwan rik’ineb’ li eetalil, relik chi yaal, li muqmuukil eetalil, ut lix muqmuukil aatineb’; ut a’in re te’xnaw ru jun lix komoneb’ li okenaq chaq sa’ li sumwank, re naq k’a’ruhaq chi maa’usilal tixb’aanu lix komon, ink’a’ taarahob’tesiiq xb’aan xkomon, chi moko xb’aaneb’ li wankeb’ sa’ lix molam, li ke’k’uluk chaq re li sumwank a’in.

23 Ut chi jo’kan te’ruuq chi kamsink, ut chi poqlenk, ut chi elq’ak, ut chixb’aanunkil li yumb’eetak ko’b’eetak ut li k’iila paay chi maa’usilal, li moko naxk’am ta rib’ rik’in xchaq’rab’ lix tenamiteb’, jo’ ajwi’ xchaq’rab’ lix Dios.

24 Ut yalaq ani reheb’ li wankeb’ sa’ xmolameb’, li taak’utb’esinq chiru li ruchich’och’ chirix lix maa’usilaleb’ ut lix tz’eqb’eetalileb’, taaraqe’q aatin chirix, moko jo’ ta xchaq’rab’ lix tenamiteb’; jo’ chanru b’an xchaq’rab’ lix maa’usilaleb’ a’an, li k’eeb’il chaq xb’aan laj Gadianton ut laj Kixkumen.

25 Anajwan k’ehomaq reetal, a’an li muqmuukil xaqab’anb’il aatin ut sumwank a’in li kixtaqla laj Alma re li ralal naq moko taaxik ta sa’ li ruchich’och’, maare anchal xb’aan a’an te’k’ame’q li tenamit taq’a sa’ li sache’k.

26 Anajwan k’ehomaq reetal, li muqmuukil xaqab’anb’il aatin ut sumwank a’an moko kiwulak ta rik’in laj Gadianton xb’aaneb’ li hu li ke’q’axtesiman re laj Helaman; k’ehomaq b’an reetal, kik’ehe’ sa’ xch’ool laj Gadianton xb’aan li winq ajwi’ a’an li kiq’unb’esink xch’ooleb’ li xb’een qana’ qayuwa’ re te’xk’ux li ru che’ li xyehe’ naq ink’a’ taak’uxmanq—

27 Relik chi yaal, li winq ajwi’ a’an li kixk’uub’ xna’leb’ rik’in laj Kain, naq wi a’an tixkamsi laj Abel li riitz’in, moko taanawe’q ta xb’aan li ruchich’och’. Ut kixk’uub’ xna’leb’ rik’in laj Kain ut rik’ineb’ li neke’taaqenk re chalen chaq sa’ li kutan a’an.

28 Ut a’an ajwi’ li winq a’an li kixk’e sa’ xch’ooleb’ li tenamit xyiib’ankil jun li kab’l najt tz’aqal xteram re te’wulaq sa’ choxa. Ut a’an ajwi’ li winq a’an li kijalb’ehink reheb’ li tenamit li ke’el chaq sa’ li najt xteramil kab’l toj sa’ li ch’och’ a’in, li kixjek’i li k’anjel re q’ojyin ut li tz’eqb’eetalil chiru chixjunil lix b’een li ch’och’, toj reetal naq kixkeloheb’ li tenamit taq’a sa’ jun li sache’k chi junajwa, ut sa’ jun xb’alb’a li junelik nakana.

29 Relik chi yaal, a’an ajwi’ li winq a’an li kixk’e sa’ xch’ool laj Gadianton naq toj tixk’e chi uxmank li k’anjel re q’ojyin, ut re muqmuukil kamsink; ut a’an xk’ehom chaq chi k’utmank chalen chaq sa’ xtiklajik li winq toj sa’ ajwi’ li kutan a’in.

30 Ut k’ehomaq reetal, a’an ajwi’ laj yoob’ahom re chixjunil li maak. Ut k’ehomaq reetal, a’an naxk’e chi uxmank lix k’anjel re q’ojyin ut muqmuukil kamsink, ut naxnumsi lix k’oxlanb’il k’anjeleb’, ut lix xaqab’anb’il aatineb’, ut lix sumwankeb’, ut lix k’uub’anb’il na’leb’eb’ re xuwajel maa’usilal, chiru li junjunq tasal tenamit a’ yaal jo’ chanru naru chixchapb’aleb’ xch’ool li ralal xk’ajoleb’ li winq.

31 Anajwan ut k’ehomaq reetal, k’a’jo’ naq kixchap chaq xch’ooleb’ laj Nefita; relik chi yaal, jo’kan naq ke’ok chi numtajenaq choq’ aj maak; relik chi yaal, lix k’ihaleb’ ke’el chaq sa’ xb’ehil li tiikilal, ut ke’xyeq’i rub’el roqeb’ lix taqlahom li Dios, ut ke’ok sa’ tz’aqal xb’eheb’ a’an, ut ke’xyiib’ choq’ reheb’ li pak’b’il dios rik’in lix oor ut lix plaat.

32 Ut kik’ulman naq moko k’iila chihab’ ta xnumik naq kichal chixjunil li maa’usilal a’in sa’ xb’eeneb’, jo’kan naq lix k’ihal a’an kichal sa’ xb’eeneb’ sa’ li xwuq xkaak’al chihab’ rawa’b’ejileb’ laj raqol aatin sa’ xb’een lix tenamit laj Nefi.

33 Ut ke’niman sa’ xmaa’usilaleb’ sa’ li xwaqxaq xkaak’al chihab’ ajwi’, sa’ li ke’raho’ wi’ xch’ool ut ke’yaab’ak chi naab’al li tiikeb’ xch’ool.

34 Ut chi jo’kan naqil naq eb’ laj Nefita ke’ok chi lajk chi maak’a’eb’ xpaab’aal, ut chi nimank sa’ li maa’usilal ut li tz’eqb’eetalil, naq eb’ laj Lamanita ke’ok chi nimank chi numtajenaq sa’ li na’leb’ chirix lix Dios; relik chi yaal, ke’ok chixpaab’ankil lix k’uub’anb’il aatin ut lix taqlahom, ut chi b’eek chiru sa’ li yaal ut li tiikilal.

35 Ut chi jo’kan naqil naq lix Musiq’ li Qaawa’ ki’ok chirisinkil chaq rib’ rik’ineb’ laj Nefita, xb’aan xmaa’usilaleb’ ut xkawil li raameb’.

36 Ut chi jo’kan naqil naq li Qaawa’ ki’ok chixhoyb’al lix Musiq’ sa’ xb’eeneb’ laj Lamanita, xb’aan xq’unaleb’ xch’ool ut x’anchalileb’ xch’ool chixpaab’ankil li raatin.

37 Ut kik’ulman naq eb’ laj Lamanita ke’xsik’iheb’ li jun molam chi aj elq’ re laj Gadianton; ut ke’xjultika li raatin li Dios sa’ xyanq li jun raqal li q’axaleb’ aj maak sa’ xyanqeb’, jo’kan naq li jun molam chi aj elq’ a’in kisache’ chaq chi junajwa sa’ xyanqeb’ laj Lamanita.

38 Ut kik’ulman naq chi junpak’al chik, naq eb’ laj Nefita ke’xwaklesiheb’ ut ke’xtenq’aheb’, ut kitikla rik’in li jun raqal q’axaleb’ aj maak, toj reetal naq ke’tam chiru chixjunil lix ch’och’eb’ laj Nefita, ut ke’xq’unb’esiheb’ xch’ool lix k’ihaleb’ li tiikeb’ xch’ool, toj reetal naq ke’xkub’si rib’ chixpaab’ankil lix k’anjeleb’ ut chi tz’aqonk sa’ xmaq’omeb’, ut chixjunajinkil rib’ rik’ineb’ sa’ lix muqmuukil kamsihomeb’ ut molameb’.

39 Ut chi jo’kan eb’ a’an ke’xtaw chik xjuneseb’ li taqlank sa’ xjolomil li tenamit, jo’kan naq ke’xyeq’i rub’el roq ut ke’xsak’ ut ke’xpeji ut ke’xb’alq’usi li rilob’aal chiruheb’ li neb’a’ ut li q’un xch’ool, ut li tuulanil aj taaqehom re li Dios.

40 Ut chi jo’kan naqil naq xuwajel li ke’wan wi’, ut yookeb’ chi q’ano’k choq’ re jun li sache’k li junelik taakanaaq.

41 Ut kik’ulman naq chi jo’kan kiraqe’ li xwaqxaq xkaak’al chihab’ rawa’b’ejileb’ laj raqol aatin sa’ xb’een lix tenamit laj Nefi.