1 Ut anajwan kik’ulman naq chirix naq laj Nefi kixye li aatin a’in, k’ehomaq reetal, wankeb’ li winq xkomoneb’ laj raqol aatin, li ke’wan ajwi’ sa’ li muqmuukil molam re laj Gadianton, ut eb’ a’an ke’josq’o’, ut ke’xjap re chixjitb’al, ke’xye re li tenamit: K’a’ut naq ink’a’ nekechap li winq a’in ut nekek’am chaq, re taak’ehe’q tojb’a-maak sa’ xb’een jo’ chanru li maak xb’aanu?

2 K’a’ut naq nakawil li winq a’in, ut nakawab’i chixhob’b’al li tenamit a’in ut li qachaq’rab’?

3 Xb’aan naq k’ehomaq reetal, laj Nefi kiraatinaheb’ chaq chirix xpo’jenaqil ru lix chaq’rab’eb’; relik chi yaal, k’iila aatin kixye laj Nefi li ink’a’ naru xtz’iib’ankil, ut maak’a’ kixye li moko naxk’am ta rib’ rik’in lix taqlahom li Dios.

4 Ut eb’ laj raqol aatin a’an ke’josq’o’ rik’in xb’aan naq kiraatinaheb’ chi saqen ru chirix lix muqmuukil k’anjel re q’ojyin; a’b’anan moko ke’chal ta xch’ool chixk’eeb’al li ruq’ sa’ xb’een, xb’aan naq neke’xxuwaheb’ ru li tenamit, maare anchal te’xjap re chixjitb’aleb’.

5 Jo’kan naq ke’xjap re chiruheb’ li tenamit, ut ke’xye: K’a’ut naq nekekanab’ li winq a’in chiqahob’b’al? Xb’aan naq k’ehomaq reetal, a’an naxk’e chi wank tojb’a-maak sa’ xb’een chixjunil li tenamit a’in, naq toj reetal te’sache’q; relik chi yaal, ut jo’kan ajwi’ naq te’maq’e’q chiqu li qaninqi tenamit a’in, re naq maak’a’aq qana’aj chi sa’.

6 Ut anajwan naqanaw naq maamin taaruuq taa’uxmanq a’in, xb’aan naq k’ehomaq reetal, kaw qametz’ew, ut ninqeb’ li qatenamit, jo’kan naq eb’ li xik’ neke’ilok qe maajun xwankileb’ taaruuq chi wanq sa’ qab’een.

7 Ut kik’ulman naq chi jo’kan ke’reek’asiheb’ li tenamit chi josq’o’k rik’in laj Nefi, ut ke’xwaklesi li wech’ok-ib’ sa’ xyanqeb’; xb’aan naq wankeb’ li ke’xjap re chixyeeb’al: Kanab’omaq li winq a’in, xb’aan naq chaab’il winq, ut li k’a’aq re ru kixye taak’ulmanq chi yaal wi ink’a’ naqajal qak’a’uxl;

8 Relik chi yaal, k’ehomaq reetal, chixjunil li raqb’a-aatin taachalq sa’ qab’een li kixch’olob’ a’an chiqix, xb’aan naq naqanaw naq yaal ajwi’ li kixch’olob’ chiqu chirixeb’ li qamaa’usilal. Ut k’ehomaq reetal naq k’iheb’ a’an, ut a’an naxnaw ajwi’ li k’a’ru taachalq sa’ qab’een jo’ chanru naq naxnaw chirix li qamaa’usilal.

9 Relik chi yaal, k’ehomaq ut reetal, wi ta moko profeet ta a’an, moko kiru raj chi ch’olob’ank chirix li k’a’aq re ru a’an.

10 Ut kik’ulman naq eb’ li ani ke’ajok re xsachb’al laj Nefi ke’rame’ ru xb’aan xxiweb’, jo’kan naq ink’a’ ke’xk’e li ruq’ sa’ xb’een; jo’kan naq a’an ki’ok wi’chik chiraatinankileb’, naq kiril naq kixtaw usilal sa’ rilob’aal junjunq, jo’kan naq li jun ch’ol chik ke’xuwak.

11 Jo’kan naq ki’eek’asiik chiraatinankileb’ wi’chik, ut kixye: K’ehomaq reetal, ex was wiitz’in, ma ink’a’ eerilom chi tz’iib’anb’il naq li Dios kixk’e wankilal re jun winq, a’an laj Moises, re taasak’oq chiru lix ha’il li Kaqi Palaw, ut kixjach rib’ chi ka’pak’al, jo’kan naq eb’ laj Israelita, a’aneb’ qayuwa’, ke’nume’ sa’ xyi chiru chaqi b’e, ut kitz’ape’ li ha’ sa’ xb’eeneb’ li teep aj pleet reheb’ laj Egipcio ut kixsub’eb’?

12 Anajwan ut k’ehomaq reetal, wi li Dios kixk’e re li winq a’in xkomon li wankilal a’an, k’a’ put naq nekexwech’ok cherib’il eerib’, ut nekeye naq naq maajun wankilal xk’e we re tinnaw chirix li raqb’a-aatin li taachalq sa’ eeb’een wi ink’a’ nekejal eek’a’uxl?

13 A’b’anan, k’ehomaq reetal, ink’a’ ka’ajwi’ neketz’eqtaana xyaalal li waatin laa’in, neketz’eqtaana ajwi’ xyaalal chixjunil li aatin yeeb’il xb’aaneb’ li qayuwa’, ut jo’kan ajwi’ li aatin yeeb’il xb’aan li winq a’in, aj Moises, li kik’ehe’ xnimal li wankilal a’in re, relik chi yaal, li aatin li kixye chirix lix k’ulunik li Mesias.

14 Relik chi yaal, ma ink’a’ kixch’olob’ xyaalal naq taachalq li Ralal li Dios? Ut jo’ chanru naq kixtaqsi li k’anti’ bronce sa’ li yamyookil ch’och’, jo’kan ajwi’ taataqsiiq a’an li taak’ulunq.

15 Ut jo’ k’ihal li te’iloq re li k’anti’ a’an te’wanq chi yo’yo, jo’kan ajwi’ jo’ k’ihal li te’iloq re li Ralal li Dios rik’in paab’aal, chi tuulaneb’ xmusiq’, te’wanq chi yo’yo, sa’ li yu’am ajwi’ a’an li wan chi junelik.

16 Anajwan ut k’ehomaq reetal, laj Moises moko xjunes ta kixch’olob’ xyaalal li k’a’aq re ru a’in; jo’kaneb’ aj b’an wi’ chixjunileb’ li santil profeet, rub’elaj chaq xkutan a’an toj sa’ xkutan laj Abraham.

17 Relik chi yaal, k’ehomaq ut reetal, laj Abraham kiril chirix lix k’ulunik, ut kinujak rik’in sahil ch’oolejil ut kisaho’ xch’ool.

18 Relik chi yaal, ut k’ehomaq reetal ninye eere, naq laj Abraham moko xjunes ta kixnaw chirix li k’a’aq re ru a’in; ke’wan b’an naab’al rub’elaj chaq xkutan laj Abraham li ke’b’oqe’ xb’aan lix k’anjelil li Dios; relik chi yaal, jo’ chanru ajwi’ lix k’anjelil li Ralal; ut a’in re naq taak’utmanq chiru li tenamit, k’iila mil chihab’ rub’el xk’ulunik, naq taachalq ajwi’ li tojb’al-ix choq’ reheb’.

19 Ut anajwan nawaj raj naq teenaw, naq chalen ajwi’ chaq xkutan laj Abraham wanjenaqeb’ k’iila profeet li ke’xch’olob’ xyaalal li k’a’aq re ru a’in; relik chi yaal, li profeet aj Tzenos kich’olob’an xyaalal chi kaw xch’ool, ut xb’aan a’an kikamsiik.

20 Ut k’ehomaq reetal, jo’kan ajwi’ laj Tzenok, ut jo’kan ajwi’ laj Etzias, ut jo’kan ajwi’ laj Isaias, ut laj Jeremias, (a’an laj Jeremias li profeet ajwi’ a’an li kixch’olob’ xyaalal chirix lix sachlijik Jerusalen) anajwan ut naqanaw naq kisache’ Jerusalen jo’ chanru raatin laj Jeremias. Chan put ru naq ink’a’ taachalq li Ralal li Dios, jo’ chanru lix profeetil aatin?

21 Ut anajwan ma teeye naq ink’a’ kisache’ Jerusalen? Ma teeye naq ink’a’ ke’kamsiik li ralal laj Sedekias, ka’aj b’an wi’ laj Mulek ink’a’? Relik chi yaal, ut ma ink’a’ nekeril naq li riyajil laj Sedekias wan qik’in, ut naq ke’alinasiik chaq sa’ li ch’och’ Jerusalen? A’ut k’ehomaq reetal, moko chixjunil ta a’in—

22 Li qayuwa’ aj Lehi ki’alinasiik chaq Jerusalen xb’aan naq kixch’olob’ xyaalal chirix li k’a’aq re ru a’in. Laj Nefi kixch’olob’ ajwi’ xyaalal li k’a’aq re ru a’in, ut jo’kaneb’ ajwi’ ka’ch’in chik ma chixjunileb’ li qayuwa’, toj sa’ li kutan ajwi’ a’in; relik chi yaal, ke’xch’olob’ xyaalal chirix lix k’ulunik li Kristo, ut ke’ilok chi uub’ej, ut ke’saho’ sa’ xch’ool rik’in lix kutan li toj taachalq.

23 Ut k’ehomaq reetal, a’an li Dios, ut a’an wan rik’ineb’, ut kixk’utb’esi rib’ chiruheb’, jo’kan naq ke’toje’ rix xb’aan, ut eb’ a’an ke’xk’e xloq’al, xb’aan li k’a’ru toj taachalq.

24 Anajwan ut, rik’in naq nekenaw li k’a’aq re ru a’in ut ink’a’ naru nekeye naq moko yaal ta, ka’ajwi’ wi textik’ti’iq, chi jo’kan rik’in a’in kexmaakob, xb’aan naq ketz’eqtaana chixjunil li k’a’aq re ru a’in, us ta k’iila na’leb’ kek’ul re xk’utb’al xyaalal; relik chi yaal, kek’ul ajwi’ chixjunil li k’a’aq re ru, li k’a’aq re ru wan sa’ choxa, jo’ ajwi’ chixjunil li k’a’aq re ru wan sa’ ruchich’och’, re xk’utb’al naq yaal.

25 A’b’an k’ehomaq reetal, xetz’eqtaana li yaal, ut xepo’resi eech’ool chiru lee santil Dios; ut sa’ li kutan ajwi’ a’in, ruuchil xtamresinkil choq’ eere li b’ihomal sa’ choxa, b’ar wi’ maak’a’ napo’ok, ut b’ar wi’ maak’a’ naru chi ok li tz’aj ru, yookex b’an chixtuub’ankil choq’ eere li josq’il choq’ re xkutankil li raqb’a-aatin.

26 Relik chi yaal, sa’ li hoonal ajwi’ a’in yookex chi q’ano’k xb’aan li kamsink ut li ko’b’eetak yumb’eetak ut li maa’usilal nekeb’aanu, choq’ re li sache’k li junelik taakanaaq; relik chi yaal, ut wi ink’a’ nekejal eek’a’uxl taachalq chi seeb’ sa’ eeb’een.

27 Relik chi yaal, k’ehomaq reetal anajwan ak wan chire lee rokeb’aal; relik chi yaal, choxex’okaq sa’ li raqleb’aal aatin, ut tz’ilomaq rix; ut k’ehomaq reetal, kamsinb’il lee raqol aatin, ut yokyo sa’ xkik’el; ut kamsinb’il xb’aan li riitz’in, li naxsik’ chunlaak sa’ li raqleb’aal aatin.

28 Ut k’ehomaq reetal, xkab’ichaleb’ wankeb’ sa’ lee muqmuukil molam, ut laj yoob’ahom re, a’an laj Gadianton ut li maa’us, li nasik’ok re xsachb’al li raameb’ li winq.