1 Tiam sis saib seb, kuv, Yakhauj, yuav hais rau nej cov uas muaj lub siab huv huv. Ntsia ntsoov Vajtswv nrog nej tej siab ruaj khov kho, thiab thov rau nws nrog nej tej kev ntseeg heev, thiab nws yuav nplij nej thaum nej muaj kev txom nyem, thiab nws yuav ris nej tej teeb meem, thiab yuav xa txoj kev rau txim nqis los rau cov uas nrhiav nej txoj kev puas tsuaj.

2 Au tag nrho nej cov uas muaj lub siab huv huv es, cia li tsa nej tej taub hau thiab txais yuav Vajtswv txoj lus uas zoo, thiab cia li niaj hnub nco ntsoov khaws nws txoj kev hlub; vim nej yuav tau zoo siab tas mus li, yog nej tej siab yuav nyob ruaj khov kho ntawm nws, mus ib txhis.

3 Tiam sis, kev txom nyem, kev txom nyem yuav raug rau nej cov uas tsis muaj lub siab huv huv, cov uas hnub no muaj kev vuab tsuab rau Vajtswv; vim tsuas yog nej yuav hloov siab lees txim xwb tsis li thaj av yuav raug foom tsis zoo rau nej; thiab cov Neeg Lamas, uas tsis vuab tsuab li nej, txawm li ntawd los lawv tseem raug foom ib qho kev foom uas mob heev, yuav los tsim kev kub ntxhov rau nej mus rau kev puas tsuaj.

4 Thiab lub caij nyoog yuav los sai sai, tias tsuas yog nej yuav hloov siab lees txim xwb, yog tsis li ces lawv yuav txeeb tau thaj av uas yog nej qub txeeg qub teg, thiab tus Tswv uas yog Vajtswv yuav coj cov neeg ncaj ncees hauv nej tawm khiav mus.

5 Saib seb, cov Neeg Lamas uas yog nej cov kwv tij, cov uas nej ntxub vim yog lawv tej kev vuab tsuab thiab txoj kev foom uas tau los rau lawv tej tawv nqaij, tseem ncaj ncees dua li nej; vim lawv tseem tsis tau hnov qab Vajtswv txoj lus txib uas tau muab rau peb txiv lawm—tias lawv yuav tsum muaj tib tug poj niam xwb, thiab lawv yuav tsum tsis txhob muaj niam yau hlo li, thiab yuav tsum tsis txhob muaj kev ua txhaum kev plees kev yi nyob hauv lawv li.

6 Thiab nim no, lawv tseem mob siab coj txoj lus txib no; yog li ntawd, vim txoj kev mloog lus no, es tau coj txoj lus txib no, tus Tswv uas yog Vajtswv yuav tsis ua kom lawv puas tsuaj, tiam sis yuav ua zoo rau lawv; thiab muaj ib hnub lawv yuav rais los mus ua tau ib cov neeg uas tau koob hmoov.

7 Saib seb, lawv tej txiv hlub lawv tej poj niam, thiab lawv tej poj niam hlub lawv tej txiv; thiab lawv tej txiv thiab lawv tej poj niam hlub lawv tej me nyuam; thiab lawv tej kev tsis ntseeg thiab lawv tej kev ntxub ntxaug nej twb yog vim lawv tej poj koob yawm txwv tej kev tsis ncaj ncees xwb; yog li ntawd nej ho yuav zoo dua li lawv npaum li cas, nyob ntawm nej tus Tsim Ntuj Tsim Teb uas muaj hwj chim lub qhov muag?

8 Au kuv cov mi kwv tij es, kuv ntshai tias tsuas yog nej yuav hloov siab lees txim ntawm nej tej kev txog txhaum xwb, tsis yog li ntawd ces lawv tej tawv nqaij tseem yuav dawb dua li nej tej, thaum nej raug coj nrog lawv los mus rau ntawm Vajtswv lub rooj zaum.

9 Yog li ntawd, ib txoj lus txib uas kuv muab rau nej, uas yog Vajtswv txoj lus, tias nej yuav tsum tseg tsis txhob thuam lawv lawm vim lawv muaj tej tawv nqaij dub; thiab nej tsis txhob thuam lawv vim lawv tej kev vuab tsuab; tiam sis nej yuav tsum nco ntsoov nej tus kheej tej kev vuab tsuab, thiab nco ntsoov tias lawv tej kev vuab tsuab tau muaj los, yog vim lawv tej poj koob yawm txwv xwb.

10 Yog li ntawd, nej yuav tsum nco txog nej tej me nyuam, nej ua cas ua tau rau lawv tej siab ntsws nyuaj vim yog tus yam ntxwv uas nej tau ua rau lawv; thiab kuj yuav tsum nco qab ntsoov tias, vim yog nej tej kev vuab tsuab, nej yuav coj tau nej tej me nyuam mus rau kev puas tsuaj, thiab nyob rau hauv hnub kawg lawv tej kev txog txhaum yuav raug poob rau saum nej tej taub hau.

11 Au kuv cov mi kwv tij es, cia li mloog rau kuv tej lus; tsa nej tej ntsuj plig sawv ua zoo; nchos nej tus kheej xwv kom nej yuav tsim ntawm tus dab ntub ntawm txoj kev tuag; thiab hle nej tus kheej kom xoob ncaim ntawm tej kev mob kev nkeeg ntawm ntuj txiag teb tsaus xwv kom nej yuav tsis rais los ua tau tej tim tswv rau tus dab, es raug muab pov mus rau hauv lub pas hluav taws uas muaj nplaim leej faj uas yog txoj kev tuag zaum ob.

12 Thiab nim no kuv, Yakhauj, tau hais ntau yam ntxiv rau Nifais cov neeg, tau ceeb toom lawv tawm tsam kev ua nkauj ua nraug thiab kev xav tau daj tau deev, thiab txhua txhia yam kev txog txhaum, qhia rau lawv txog tej nqi zog phem ntawm tej kev txog txhaum no.

13 Thiab muaj ib feem puas ntawm tej uas tau tshwm sim rau cov neeg no, cov uas nim no tau pib muaj coob, tsis muaj peev xwm muab sau rau saum cov phiaj no; tiam sis muaj lawv ntau yam uas tau raug muab sau rau saum cov phiaj dav, thiab lawv tej kev ua tsov ua rog, thiab lawv tej kev sib cav sib ceg, thiab lawv tej vaj ntxwv tej kev kav teb kav chaw.

14 Cov phiaj no hu ua Yakhauj cov phiaj, thiab cov phiaj no yog Nifais txhais tes ua. Thiab kuv tau xaus hais tej lus no.