1 Ut anajwan, k’ehomaq reetal, ex was wiitz’in, jo’ xinye eere naq tin’aatinaq jo’ profeet, k’ehomaq reetal, a’in lin profeetil aatin—naq li k’a’aq re ru kixye li profeet a’in aj Tzenos, chirix lix junkab’al laj Israel, li kixjuntaq’eetaheb’ wi’ rik’in jun xtoonal li che’ olivo li awb’il, tento taak’ulmanq chi yaal.

2 Ut li kutan tixk’e wi’ li ruq’ xkab’ sut re xk’amb’al chaq wi’chik lix tenamit, a’anaq li kutan, relik chi yaal, li jun sutaq chik, naq eb’ lix moos li Qaawa’ te’xik rik’in lix wankilal a’an, re xch’olaninkil ut xsetb’al ruq’ li rawimq; ut chirix a’an sa’ junpaat taachalq li roso’jik.

3 Ut k’a’jo’ naq osob’tesinb’ileb’ li ani xe’k’anjelak chi yalb’ileb’ xq’e sa’ li rawimq; ut k’a’jo’ naq majewanb’ileb’ li ani te’tz’eqe’q toj sa’ tz’aqaleb’ lix na’aj! Ut li ruchich’och’ taak’ate’q rik’in xam.

4 Ut k’a’jo’ li ruxtaanal li qaDios choq’ qe, xb’aan naq a’an najultiko’ re lix Junkab’al laj Israel, li xe’ej jo’ ajwi’ li uq’ej; ut naxye’ li ruq’ reheb’ chiru chixjunil li kutan; ut a’aneb’ jun li tenamit jipeb’ xk’a’uxl ut aj wech’oneleb’; a’b’anan jo’ k’ihaleb’ li ink’a’ te’kawob’resinq re li raameb’ te’kole’q sa’ li rawa’b’ejihom li Dios.

5 Jo’kan ut, ex was wiitz’in raarookex inb’aan, nintz’aama cheru rik’in tiik ruhil aatin naq chejal eek’a’uxl, ut chexchalq chi anchal li rajom eech’ool, ut chexjiloq rik’in li Dios jo’ a’an najilok eerik’in. Ut naq toj ye’b’il eere li ruq’ aj uxtaan sa’ xsaqenkil li kutan, meekawob’resi lee raam.

6 Relik chi yaal, anajwan wi teerab’i lix yaab’ xkux, meekawob’resi lee raam; xb’aan naq, k’a’ put naq texkamq?

7 K’ehomaq ut reetal, chirix naq xexch’olaniik xb’aan lix chaab’il aatin li Dios chiru chixjunil li kutan, ma tex’uuchinq rik’in ru che’ ink’a’ us, re naq taa’aje’q eeyok’b’al chaq ut eekutb’al sa’ li xam?

8 K’ehomaq reetal, ma teetz’eqtaana li aatin a’in? Ma teetz’eqtaana li raatineb’ li profeet, ut ma teetz’eqtaana chixjunil li aatin li yeeb’il chirix li Kristo, chirix naq q’axal k’iheb’ li ke’aatinak chirix; ut teetz’eqtaana xyaalal lix chaab’il aatin li Kristo, ut lix wankil li Dios, ut li maatan re li Santil Musiq’ej, ut teechup li Loq’laj Musiq’ej, ut teek’e chi eetz’uuk li nimla k’uub’anb’il na’leb’ re li tojb’al-ix, li k’uub’anb’il choq’ eere?

9 Ma ink’a’ tab’i’ nekenaw naq wi teeb’aanu li k’a’aq re ru a’in, naq lix wankilal li tojb’al-ix ut li wakliik chi yo’yo, li wan rik’in li Kristo, texxk’am chi xaqliik rik’in xutaan ut xuwajel maak sa’ eeb’een chiru lix raqleb’aal aatin li Dios?

10 Ut jo’ chanru lix wankil li tiik ruhil na’leb’, xb’aan naq ink’a’ naru xramb’al li k’a’ru tiik ru, tento texxik sa’ li palaw a’an re xam ut chuhil pek, li ink’a’ naru xchupb’al xxamlel, ut li nataqe’ xsib’el chi junelik q’e kutan, ut a’ palaw re xam ut chuhil pek, a’an li rahilal li maak’a’ roso’jik.

11 Jo’kan ut, ex was wiitz’in raarookex inb’aan, chejal eek’a’uxl, ut chex’okaq sa’ li okeb’aal laatz’, ut chexkanaaq chi b’eek sa’ li b’e li ka’ch’in ru, toj reetal naq teetaw li junelik yu’am.

12 Aay, chaab’ilaq taxaq eena’leb’; k’a’ chik ru naru tinye?

13 Re ut xraqb’al, nekexinchaq’rab’i, toj reetal naq toxexink’ul chiru lix sahil raqleb’aal aatin li Dios, a’ li raqleb’aal aatin li taaketoq reheb’ laj maak rik’in rahil xeb’esiik ut xiw. Amen.