1 Ut anajwan kik’ulman chirix naq ke’nume’ junjunq chihab’, kichal jun winq sa’ xyanq lix tenamit laj Nefi, aj Xerem xk’ab’a’.

2 Ut kik’ulman naq a’an ki’ok chi jultikank aatin sa’ xyanqeb’ li tenamit, ut chixch’olob’ankil chiruheb’ naq maajun Kristo taawanq. Ut kixjultika k’iila na’leb’ li nasahob’resin xch’ooleb’ li tenamit, ut a’in kixb’aanu re naq taaruuq chi numtaak sa’ xb’een li tzol’leb’ re li Kristo.

3 Ut kik’anjelak chi yalb’il xq’e re taaruuq chixjalb’ehinkil xch’ooleb’ li tenamit, jo’kan naq naab’al li ch’oolej kixjalb’ehi; ut rik’in naq kixnaw naq laa’in, aj Jakob, wan inpaab’aal chirix li Kristo li taak’ulunq, k’a’jo’ naq kixsik’ chan ru naq taachalq wik’in.

4 Ut a’an tzolb’il, jo’kan naq tz’aqal lix nawom chirix li raatinob’aal li tenamit; jo’kan naq kiru chiroksinkil naab’al li sahil aatin; ut naab’al li wankilal chi aatinak, jo’ chanru lix wankilal laj tza.

5 Ut kixyo’oni inchiq’b’al chaq sa’ li paab’aal, us ta mak’a’jo’ li k’iila k’utb’esinb’il na’leb’ ut li k’iila k’a’aq re ru wilom chaq chirix li k’a’aq re ru a’in; xb’aan naq wilomeb’ chaq chi yaal li anjel, ut eb’ a’an ke’k’anjelak chaq chiwu. Ut jo’kan ajwi’, wab’ihom chaq lix yaab’ xkux li Qaawa’ chiwaatinankil rik’in tz’aqal aatin, chi yalaq jo’q’e, jo’kan naq ink’a’ kiru inchiq’b’al.

6 Ut kik’ulman naq a’an kichal wik’in, ut jo’ka’in naq kinraatina, kixye: At was wiitz’in Jakob, k’a’jo’ naq kinsik’ chan ru naq tatwaatina; xb’aan naq wab’ihom resil, ut ninnaw ajwi’ naq mak’a’jo’ nakatb’eek chixjultikankil li k’a’ru evangelio nakaye re, malaj li tzol’leb’ re li Kristo.

7 Ut kajalb’ehi naab’al reheb’ li tenamit a’in, jo’kan naq neke’xpo’ ru lix tiikil b’e li Dios, ut ink’a’ neke’xpaab’ lix chaq’rab’ laj Moises, a’an li tiikil b’e; ut neke’xjaltesi lix chaq’rab’ laj Moises choq’ re xloq’oninkil jun li ani nekeye naq taachalq sa’ k’iila cient chihab’ chik. Ut anajwan k’e reetal, laa’in, aj Xerem, ninch’olob’ chawu naq a’in xmajewankil li Dios; xb’aan naq maajun winq nanawok re li k’a’aq re ru a’in, xb’aan naq ink’a’ taaruuq taayehoq chirix li k’a’aq re ru toj taachalq. Ut jo’ka’in naq laj Xerem kinixwech’.

8 A’ut k’ehomaq reetal, li Qaawa’ Dios kixhoy lix Musiq’ sa’ li waam, jo’kan naq kinsach xna’leb’ sa’ chixjunil li raatin.

9 Ut laa’in kinye re: Ma nakatz’eqtaana xyaalal li Kristo li taachalq? Ut a’an kixye: Wi ta taawanq junaq Kristo, ink’a’ raj tintz’eqtaana xyaalal; a’b’an ninnaw naq maajun Kristo wan, chi moko wanjenaq chaq, chi moko toj taawanq.

10 Ut laa’in kinye re: Ma nakapaab’eb’ li loq’laj hu? Ut a’an kixye, Hehe’.

11 Ut laa’in kinye re: Ink’a’ b’i’ nakataw xyaalaleb’, xb’aan naq neke’ch’olob’an chi yaal chirix li Kristo. K’e reetal, ninye aawe naq maajun reheb’ li profeet ke’tz’iib’ak, chi moko ke’aatinak jo’ profeet, chi ink’a’ ke’aatinak chirix li Kristo a’in.

12 Ut moko chixjunil ta a’in—k’utb’esinb’il chiwu laa’in, xb’aan naq wab’ihom ut wilom, ut jo’kan ajwi’ k’utb’esinb’il chiwu rik’in lix wankil li Santil Musiq’ej; jo’kan ut, ninnaw naq wi ta ink’a’ taa’uxq xtojb’al rix li maak, te’sachq raj chixjunil li winq.

13 Ut kik’ulman naq a’an kixye we: K’ut chiwu jun li eetalil rik’in li wankilal a’in re li Santil Musiq’ej, li nakanaw wi’ xk’ihal a’ na’leb’ a’in.

14 Ut laa’in kinye re: Anihin tab’i’ laa’in re tinyal rix li Dios re tixk’ut chawu jun li eetalil rik’in li k’a’ru nakanaw naq yaal? Laa’at b’an taatz’eqtaana xyaalal, xb’aan naq laa’at re laj tza. A’b’anan, mi’uxk taxaq li nawaj laa’in, a’ut wi li Dios taasak’oq aawe, chiwanq a’an choq’ eetalil chawu naq wan xwankilal, sa’ choxa jo’ ajwi’ sa’ ch’och’; ut jo’kan ajwi’ naq taak’ulunq li Kristo. Ut laa wajom taxaq chi’uxq, at Qaawa’, moko wajom ta laa’in.

15 Ut kik’ulman naq chirix naq laa’in aj Jakob kinye li aatin a’in, kichal lix wankil li Qaawa’ sa’ xb’een, jo’kan naq kit’ane’ chi ch’och’. Ut kik’ulman naq kich’olaniik chiru xnumik k’iila kutan.

16 Ut kik’ulman naq kixye reheb’ li tenamit: Ch’utub’omaq eerib’ sa’ li kutan wulaj, xb’aan naq kamk we; jo’kan ut, nawaj raatinankil li tenamit chi maji’ ninkam.

17 Ut kik’ulman naq chi wulajaq ke’ch’utla li k’iila tenamit; ut a’an kiraatinaheb’ chi ch’olch’o ru ut kixch’olob’ naq moko yaal ta li k’a’aq re ru kixk’ut chaq chiruheb’; ut kixch’olob’ xyaalal li Kristo, ut lix wankil li Santil Musiq’ej, ut lix k’anjeleb’ li anjel.

18 Ut kiraatinaheb’ chi ch’olch’o ru, naq balaq’inb’il chaq xb’aan lix wankilal laj tza. Ut ki’aatinak chirix li xb’alb’a, ut chirix li junelik q’e kutan, ut chirix li tojb’a-maak re junelik.

19 Ut kixye: ninxuwak, maare anchal kinb’aanu li maak ink’a’ naru xkuyb’al, xb’aan naq kintik’ti’ik chiru li Dios; xb’aan naq kintz’eqtaana xyaalal li Kristo, ut kinye naq ninpaab’eb’ li loq’laj hu, ut neke’xch’olob’ xyaalal a’an chi yaal. Ut rik’in naq kintik’ti’ik chi jo’kan chiru li Dios k’a’jo’ naq ninxuwa naq xiwxiwaq li tinwanq wi’; a’b’anan ninch’olob’ lin maak chiru li Dios.

20 Ut kik’ulman naq chirix naq kixye li aatin a’in, maak’a’ chik kiru chixyeeb’al, ut kixq’axtesi xmusiq’.

21 Ut naq li ch’utch’uukil tenamit ke’xk’e reetal naq kixye li k’a’aq re ru a’in naq ok re chixq’axtesinkil xmusiq’, ke’sach xch’ool chi numtajenaq, jo’kan naq kikub’e lix wankil li Dios sa’ xb’eeneb’, ut kinumta sa’ xb’eeneb’ jo’kan naq ke’t’ane’ chi ch’och’.

22 Anajwan, laa’in aj Jakob, kisaho’ inch’ool rik’in li na’leb’ a’in, xb’aan naq kintz’aama chaq rik’in lin Yuwa’ li wan sa’ choxa; xb’aan naq a’an kirab’i chaq li welajihom ut kixsume ru lin tij.

23 Ut kik’ulman naq kik’ojob’aak wi’chik li tuqtuukilal ut lix rahom li Dios sa’ xyanq li tenamit; ut ke’xtz’ileb’ rix li loq’laj hu, ut moko ke’ab’in ta chik chiru li raatin li winq a’in aj maak.

24 Ut kik’ulman naq k’iila na’leb’ kik’oxlaman re xk’ulb’aleb’ wi’chik laj Lamanita ut xk’amb’aleb’ wi’chik chixnawb’al li yaal; a’b’anan maak’a’ ki’ok wi’ chixjunil, xb’aan naq eb’ a’an ke’saho’ sa’ xch’ool rik’in pleetik ut hoyok kik’, ut xik’ nokohe’ril chi junajwa laa’o li ras riitz’ineb’. Ut rik’in xwankilal lix k’anjeleb’aaleb’ re pleet rajlal neke’xsik’ qasachb’al.

25 Jo’kan naq lix tenamit laj Nefi ke’xkawresi rib’ chiruheb’ rik’in lix k’anjeleb’aal re pleet, ut rik’in anchal lix nimaleb’ xmetz’ew, chi xkanab’ahomeb’ rib’ chiru li Dios ut li saqoonaq re lix kolb’aleb’; jo’kan ut, toj anajwan ke’wan chi numtaak sa’ xb’eeneb’ li xik’ neke’ilok reheb’.

26 Ut kik’ulman naq laa’in, aj Jakob, kin’ok chi tixk; ut tz’iib’anb’il resil li tenamit a’in chiruheb’ li jun ch’ol chik lix perel ch’iich’ laj Nefi, jo’kan naq ninchoy li tz’iib’anb’il esil a’in rik’in xch’olob’ankil naq kintz’iib’ak jo’ chanru tz’aqal innawom, rik’in xyeeb’al naq kinume’ li kutan chiqu, ut kinume’ ajwi’ li qayu’am chanchan jun li matk’ chiqu, laa’o jun tenamit junaatal ut ra xch’ool, aj b’ehenelo, isinb’ilo chaq Jerusalen, yo’lajenaqo sa’ rahilal, sa’ jun li yamyookil ch’och’, xik’ ilb’ilo xb’aaneb’ li qas qiitz’in, ut rik’in a’an wanjenaq chaq pleetik ut wech’ok-ib’; jo’kan naq rik’in raho’k ch’oolej kiqanumsi qakutan.

27 Ut laa’in, aj Jakob, kiwil naq sa’ junpaat chik tinkub’eeq sa’ inmuqleb’aal; jo’kan naq kinye re li walal aj Enos: K’ameb’ li perel ch’iich’ a’in. Ut kinye re a’an chixjunil li k’a’aq re ru kinixtaqla wi’ chaq laj Nefi li was, ut a’an kixye naq taa’ab’inq chiru li taqlanb’il. Ut nink’e xraqik intz’iib’ahom chiruheb’ li perel ch’iich’ a’in, ut ka’ch’in a’ tz’iib’ahom a’an; ut ninchaq’rab’i li ani taa’iloq ru, ut ninyo’oni naq naab’al li was wiitz’in te’ril ru li waatin. Ex was wiitz’in, inwan.