Lix Hu laj Jarom

1 Anajwan k’ehomaq reetal, laa’in, aj Jarom, nintz’iib’a junjunq li aatin jo’ chanru lix taqlahom lin yuwa’ aj Enos, re naq k’amb’ilaq resil li qaxe’toonil.

2 Ut jo’ ka’ch’ineb’ ru li perel ch’iich’ a’in, ut jo’ tz’iib’anb’il li k’a’aq re ru a’in choq’ re li ajom naq te’chaab’ilo’q li qas qiitz’in aj Lamanita, jo’kan ut, tento taa’uxq naq tintz’iib’aq ka’ch’inaq; a’b’anan ink’a’ tintz’iib’a li k’a’aq re ru chirix lin profeetil ch’olob’ahom, chi moko chirix li k’utb’esinb’il chiwu. Xb’aan naq k’a’ chik ru taaruuq tintz’iib’a chiru li ke’xtz’iib’a eb’ lin yuwa’? Xb’aan naq ma ink’a’ ke’xk’utb’esi li k’uub’anb’il na’leb’ re li kolb’a-ib’? Ninye eere, Hehe’, ut tz’aqalin rik’in a’in.

3 K’ehomaq reetal, na’ajman ru naq naab’al taab’aanumanq sa’ xyanq li tenamit a’in, xb’aan lix kawileb’ li raam ut lix tz’apb’aleb’ lix xik, ut lix mutz’aleb’ lix k’a’uxleb’, ut lix jipileb’ lix ja’ajeb’; a’b’anan li Dios naruxtaanaheb’ ru chi numtajenaq, ut toj maji’ naxmesuheb’ chaq chiru lix b’een li ch’och’.

4 Ut wankeb’ naab’al sa’ qayanq li neke’k’uluk re li k’utb’esinb’il na’leb’, xb’aan naq moko chixjunileb’ ta jipeb’ xk’a’uxl. Ut jo’ k’ihaleb’ li moko jipeb’ ta xk’a’uxl ut wankeb’ xpaab’aal, wankeb’ sa’ sum aatin rik’in li Loq’laj Musiq’ej, li nak’utb’esin chiru li ralal xk’ajoleb’ li winq a’ yaal jo’ chanru lix paab’aaleb’.

5 Ut anajwan, k’ehomaq reetal, ak ke’nume’ chaq wiib’ cient chihab’, ut eb’ lix tenamit laj Nefi ke’niman chaq xkawilal sa’ li ch’och’. Ke’xk’e xch’ool chixpaab’ankil lix chaq’rab’ laj Moises ut chixsantob’resinkil li hilob’aal kutan choq’ re li Qaawa’. Ut ink’a’ ke’muxuk, chi moko ke’xmajewa li Dios. Ut q’axal kaw lix chaq’rab’il li tenamit.

6 Ut ke’wan chi jek’inb’il chiru naab’al lix b’een li ch’och’, ut jo’kaneb’ ajwi’ laj Lamanita. Ut eb’ a’an q’axal nim wi’chik xk’ihaleb’ chiruheb’ li wankeb’ choq’ aj Nefita; ut neke’xra li kamsink, ut neke’ruk’ xkik’eleb’ li xul.

7 Ut kik’ulman naq k’iila sut ke’chal sa’ qab’een laa’o aj Nefita, re qapleetinkil. A’b’an eb’ li qarey ut eb’ laj jolomihom qe a’aneb’ winq kaweb’ xmetz’ew sa’ li paab’aal chirix li Qaawa’; ut ke’xk’ut lix b’ehil li Qaawa’ chiruheb’ li tenamit; jo’kan naq kooxaqli chiruheb’ laj Lamanita, ut kiqamesuheb’ chaq sa’eb’ li qach’och’, ut koo’ok chixk’eeb’al xkawilaleb’ li qatenamit, malaj b’araq chi na’ajej wan wi’ li qeechanihom.

8 Ut kook’ihan chi numtajenaq, ut koojek’iman chiru lix b’een li ch’och’, ut koob’ihomo’ chi numtajenaq rik’in oor, ut rik’in plaat, ut rik’in k’a’aq re ru terto xtz’aq, ut rik’in che’ pech’b’il chi chaab’il, rik’in kab’l, ut rik’in k’anjeleb’aal, ut jo’kan ajwi’ rik’in ch’iich’ ut kaqi ch’iich’, ut ch’iich’ bronce ut kawil ch’iich’, ut kiqayiib’ li k’iila paay chi k’anjeleb’aal li jar raqal wan re xk’anjelankil li ch’och’, ut li k’anjeleb’aal re pleet—relik chi yaal, li jutz’juukil tzimaj q’es ru’uj, ut li rochoch tzimaj, ut xnaq’ li puub’ che’, ut li jutz’juukil che’, ut chixjunil li kawresink choq’ re li pleet.

9 Ut rik’in naq kawresinb’ilo chi jo’kan chixk’ulb’aleb’ laj Lamanita, ink’a’ ke’numta sa’ qab’een. A’b’an kik’utman naq yaal li raatin li Qaawa’ li kixye chaq reheb’ li qayuwa’, naq kixye naq: A’ yaal jo’ chanru naq teepaab’ lin taqlahom tex’usaaq sa’ li ch’och’.

10 Ut kik’ulman naq eb’ lix profeet li Qaawa’ ke’xyeechi’i chaq li rahilal sa’ xb’eeneb’ lix tenamit laj Nefi, jo’ chanru li raatin li Qaawa’, naq wi ink’a’ te’xpaab’eb’ li taqlahom, wi b’an te’t’ane’q sa’ li q’etok aatin, te’sache’q chaq chiru lix b’een li ch’och’.

11 Jo’kan ut, eb’ li profeet, ut eb’ laj tij, ut eb’ laj tzolonel ke’k’anjelak chi yalb’ileb’ xq’e, ut chi anchal xnajtil li royb’enihomeb’ ke’relaji chiruheb’ li tenamit naq yalb’ilaqeb’ xq’e; ke’xk’ut lix chaq’rab’ laj Moises, ut li ajom li kik’ehe’ wi’; ut ke’xq’unb’esiheb’ xch’ool naq te’ril chi uub’ej li Mesias, ut te’xpaab’ a’an li taachalq jo’ chanchan naq ak chalenaq. Ut chi jo’ka’in naq ke’xtzoleb’.

12 Ut kik’ulman naq rik’in xb’aanunkil chi jo’kan ke’xkoleb’ re naq ink’a’ te’sache’q chaq chiru lix b’een li ch’och’; xb’aan naq ke’xk’ob’eb’ xch’ool rik’in li aatin, ut ke’reek’asiheb’ xch’ool junelik choq’ re li jalb’a-k’a’uxlej.

13 Ut kik’ulman naq ak numenaq wiib’ cient rik’in waqxaqlaju xka’k’aal chihab’—chi wanjenaq li pleet, ut li wech’ok-ib’, ut li jachok-ib’, chiru naab’al lix b’ehil li kutan.

14 Ut laa’in, aj Jarom, maak’a’ chik nintz’iib’a, xb’aan naq ka’ch’ineb’ ru li perel ch’iich’. A’ut k’ehomaq reetal, ex was wiitz’in, naru texxik rik’ineb’ li jun ch’ol chik lix perel ch’iich’ laj Nefi; xb’aan naq k’ehomaq reetal, tz’iib’anb’il chiruheb’ a’an li tz’iib’anb’il esil chirixeb’ li qapleet, jo’ chanru lix tz’iib’ahomeb’ li rey, malaj li b’arwan ke’xtaqla xtz’iib’ankil.

15 Ut ninq’axtesiheb’ li perel ch’iich’ a’in sa’ ruq’ li walal aj Omni, re naq te’k’ame’q jo’ chanru lix taqlahomeb’ lin yuwa’.