Lix Hu laj Mormon

1 Anajwan ut laa’in, aj Mormon, nintz’iib’a jun esil chirix li k’a’aq re ru wilom jo’ ajwi’ li wab’ihom, ut lix Hu laj Mormon ninye re.

2 Ut sa’ xq’ehil tana’ naq laj Ammaron kixmuqeb’ chaq li tz’iib’anb’il esil choq’ re li Qaawa’, kichal wik’in, (ut laa’in lajeeb’ chihab’ tana’ inyu’am, ut ki’ok chi wank ka’ch’inaq innawom jo’ chanru xnawomeb’ intenamit) ut laj Ammaron kixye we: Nink’e reetal naq laa’at jun saaj al tiik xk’a’uxl, ut seeb’at chi k’ehok eetal;

3 Jo’kan ut, naq wan tana’ kaahib’ xka’k’aal chihab’ aayu’am, nawaj raj naq taajultiko’q aawe li k’a’aq re ru kawil chirix li tenamit a’in; ut naq taawanq aachihab’ chi jo’kan, ayu sa’ li ch’och’ Antum, sa’ jun li tzuul Xim tixk’ab’a’in; ut aran xink’ojob’ choq’ re li Qaawa’ chixjunil li loq’laj tz’iib’ahom chirix li tenamit a’in.

4 Ut k’e reetal, taak’ameb’ lix perel ch’iich’ laj Nefi choq’ aawe, ut li jun ch’ol chik taakanab’ sa’ li na’ajej wan wi’; ut taatz’iib’a chiruheb’ lix perel ch’iich’ laj Nefi chixjunil li k’a’aq re ru kawil chirix li tenamit a’in.

5 Ut laa’in, aj Mormon, rik’in naq ralal xk’ajolin laj Nefi, (ut aj Mormon xk’ab’a’ inyuwa’) kijultiko’ we li k’a’aq re ru kinixtaqla wi’ laj Ammaron.

6 Ut naq junlaju chihab’ inyu’am, kik’ulman naq kink’ame’ xb’aan inyuwa’ sa’ li ch’och’ sa’ xjayal lix tz’e li saq’e, toj sa’ li ch’och’ Tzarahemla.

7 Chixjunil lix b’een li ch’och’ ak nujenaq rik’in kab’l, ut eb’ li tenamit ke’k’ihan rajlankileb’, ka’ch’in chik ma chanchan jo’ li samahib’ re palaw.

8 Ut kik’ulman sa’ li chihab’ a’an naq ki’ok chi wank jun pleet ke’wan wi’ laj Nefita, li junajinb’ileb’ wi’ laj Nefita ut laj Jakobita ut laj Josefita ut laj Tzoramita; ut li pleet a’in reheb’ laj Nefita, kiwan rik’ineb’ laj Lamanita, ut laj Lemuelita, ut laj Ismaelita.

9 Anajwan eb’ laj Lamanita ut laj Lemuelita ut laj Ismaelita, aj Lamanita ke’yehe’ re, ut li wiib’ chi teep a’aneb’ laj Nefita ut laj Lamanita.

10 Ut kik’ulman naq li pleet kixtikib’ wank sa’ xyanqeb’ sa’ xnub’aal Tzarahemla, chire xha’il Sidon.

11 Ut kik’ulman naq eb’ laj Nefita ak ke’xch’utub’ chaq jun teep chi winq nim xk’ihaleb’, toj reetal ke’xq’ax lajeeb’ xka’k’aal chi mil rajlankileb’. Ut kik’ulman naq sa’ li chihab’ ajwi’ a’an ke’wan sa’ junjunq li pleet, sa’eb’ wi’ laj Nefita ke’xq’axeb’ ru laj Lamanita ut ke’xkamsi naab’al reheb’.

12 Ut kik’ulman naq eb’ laj Lamanita ke’risi lix k’oxlahomeb’, ut kiwan li tuqtuukilal k’ojob’anb’il sa’ li ch’och’; ut kikana li tuqtuukilal chiru xnumik tana’ kaahib’ chihab’, jo’kan naq maak’a’ li hoyok kik’.

13 A’b’anan kinumta li maa’usilal chiru lix b’een chixjunil li ch’och’, jo’kan naq li Qaawa’ kirisiheb’ chaq lix tzolom li raarookeb’ xb’aan, ut kiraqe’ li k’anjel re sachb’a-ch’oolej ut re k’irtesink, xb’aan xmaa’usilaleb’ li tenamit.

14 Ut maak’a’ li maatan k’eeb’il xb’aan li Qaawa’, ut li Santil Musiq’ej moko nachal ta sa’ xb’een anihaq, xb’aan xmaa’usilaleb’ ut xmaak’a’il lix paab’aaleb’.

15 Ut laa’in ak o’laju chihab’ inyu’am, ut tiik ka’ch’inaq ink’a’uxl, jo’kan naq kin’ula’aniik xb’aan li Qaawa’, ut kinyal xsahil ut kinnaw ru lix chaab’ilal li Jesus.

16 Ut kinyal inq’e chi jultikank aatin chiru li tenamit a’in, a’b’an kitz’ape’ xtz’uumal we, ut kintaqlaak naq ink’a’ tinjultikanq chiruheb’; xb’aan naq k’ehomaq reetal, eb’ a’an ke’xpo’resi xch’ool chiru lix Dios chi k’oxlanb’il; ut ke’isiik chaq li raarookil tzolom sa’ li ch’och’ xb’aan xmaa’usilaleb’.

17 A’b’an laa’in kinkana sa’ xyanqeb’, a’b’anan taqlanb’ilin naq ink’a’ tinjultikanq aatin chiruheb’, xb’aan xkawileb’ li raam; ut sa’ xk’ab’a’ lix kawileb’ li raam kimajewaak li ch’och’ choq’ reheb’.

18 Ut eb’ laj elq’ a’in re laj Gadianton, li ke’wan sa’ xyanqeb’ laj Lamanita, ke’pukan sa’ li ch’och’, jo’kan naq eb’ li ani wankeb’ aran ke’ok chixmuqb’al lix b’ihomaleb’ sa’ li ch’och’; ut ke’kana chi yolyol, xb’aan naq li Qaawa’ kixmajewa li ch’och’, jo’kan naq ink’a’ ke’ru chixchapb’al, chi moko chixk’ulb’al wi’chik.

19 Ut kik’ulman naq kiwan li tuulak, ut xk’anjeleb’ laj tuul, ut li eek’; ut lix wankil li maa’us kik’anjelaman chiru chixjunil lix b’een li ch’och’, toj reetal kitz’aqlok ru chixjunil li raatin laj Abinadi, ut jo’kan ajwi’ laj Samuel aj Lamanita.