1 Im ālikin men kein ilo ejja iiō wōt eaar bar jino wōr juon tariņae ikōtaan riNipai ro im riLeman ro. Im jekdo̧o̧n n̄e iaar inono, iaar ļap ilo ānbwinnū; kōn menin armej in Nipai raar jitōn̄ eō bwe in aer ritōl, ak ritōl in jarin tariņae ko aer.

2 Kōn menin ālikin men kein ilo iiō eo kein kajon̄ouljiljino aō eaar ilo̧k jarin tariņae eo an riNipai ro, ņae riLeman ro; kōn menin jilubukwi im ron̄oul im jiljino iiō ko raar eļļāļo̧k.

3 Im ālikin men kein ilo jilubukwi im ron̄oul im jiljilimjuon iiō eo riLeman ro raar kōm̧m̧alijar ņae kōm kōn eļap otem ļap kajoor, jon̄an raar kōlōļn̄o̧n̄ jarin tariņae ko aō; kōn menin raar jab kōņaan ire, im raar jino in jenlikļo̧k n̄an jikin ko ituiōn̄.

4 Im ālikin men kein kōm ar itok n̄an jikin kwelo̧k in An̄kola, im kōm ar bōk jikin kwelo̧k eo, im kōm̧m̧ani m̧aanjāppopo ko n̄an jojomar kōn kōm ņae riLeman ro. Im ālikin men kein kōm ar kapenļo̧k jikin kwelo̧k eo kōn am kajoor; a jekdo̧o̧n aolep kapenļo̧k ko am riLeman ro raar itok ioom̧ im lukwarkwareļo̧k kōm jān jikin kwelo̧k eo.

5 Im raar barāinwōt bar lukwarkwareļo̧k kōm jān āneen Devid.

6 Im kōm ar m̧aajļo̧k im itok n̄an āneen Joshua, eo eaar ilo tōrerein ko irilik iturin parijet.

7 Im ālikin men kein kōm ar aintok armej ro am jon̄an wōt an m̧ōkaj, bwe kōmin maron̄ likūt er ippān doon ilo juon ānbwin.

8 A lo, āneo eaar obrak kōn riko̧o̧t ro im kōn riLeman ro; im mekarta ko̧kkure eo eļap eaar etoto ioon armej ro aō, raar jab ukeļo̧k jān kōm̧m̧an ko aer renana; kōn menin eaar wōr bōtōktōk im ibeebjauwe rej ajeeded ilo aolepān mejān āneo, jim̧or ioon m̧ōttan eo an riNipai ro im barāinwōt ioon m̧ōttan eo an riLeman ro; im eaar juon jum̧ae edipiio ilo aolepān mejān āneo.

9 Im kiiō, riLeman ro eaar wōr juon aer kiin̄, im etan eaar Aron; im eaar itok ņae kōm kōn juon jarin tariņae in en̄oul im emān to̧ujin. Im lo, iaar jutak ņae e kōn en̄oul im ruo to̧ujin. Im ālikin men kein iaar anjo̧ ioon e kōn jarin tariņae eo aō jon̄an eaar ko im̧aō. Im lo, aolep men in eaar kōm̧m̧an, im jilubukwi im jiln̄uul iiō ko raar eļļāļo̧k.

10 Im ālikin men kein riNipai ro raar jino ukeļo̧k jān nana eo aer, im kar jino in kūr em̧ool āinwōt ekar kanaan jān Samuel rikanaan eo; bwe lo ejjeļo̧k juon armej emaron̄ kar kōjparok men eo eaar an make, bwe riko̧o̧t ro, im rirakim ro, im riuror ro, im rianijnij eo, im riekkōpal ro eaar pād ilo āneo.

11 Āindein eaar jino wōr juon būrom̧ōj im liaajlo̧ļ ilo aolepān āneo kōnke kar men kein, im eļapļo̧k ilubwiljin armej in Nipai ro.

12 Im ālikin men kein ke n̄a, Mormon, iaar lo aer liaajlo̧ļ im aer būrom̧ōj im aer n̄ijlo̧k im̧aan Irooj, buruō eaar jino in m̧ōņōņō ilo n̄a, kōnke iaar jeļā bwe tūriam̧okake ko im kem̧m̧aanwa an Irooj, kōn menin iaar kōtmāne bwe Enaaj kar tūriam̧o n̄an er bwe ren maron̄ bar erom juon armej e wānōk.

13 A lo lan̄lōn̄ in aō eaar waan, bwe aer būrom̧ōj eaar jab n̄an ukeļo̧k, kōnke em̧m̧an eo an Anij; a eaar ijello̧kun būrom̧ōj an riatajinemjen, kōnke Irooj e jamin kar kōtļo̧k er iien otemjej n̄an lo m̧ōņōņō ilo jero̧wiwi.

14 Im raar jab itok n̄an Jisōs kōn bōro ko rerup im jetōb ko rettā, a raar kanejneje Anij, im kōņaan mej. Mekarta raar kōņaan ire kōn jāje eo kōn mour ko aer.

15 Im ālikin men kein aō būrom̧ōj eaar bar ro̧o̧l tok n̄an eō, im iaar lo bwe raan in jouj eaar eļļāļo̧k jān er, jim̧or ilo kanniōk im ilo jetōb; bwe iaar lo to̧ujin ko in er raar okjak ilo jum̧ae ņae aer Anij, im kar ejoujik āinwōt kūbween alōōr ioon mejān āneo. Im āindein jilubukwi im en̄oul im emān iiō ko raar eļļāļo̧k.

16 Im ālikin men kein ilo jilubukwi im en̄oul im ļalem iiō eo riNipai ro raar jino in ko im̧aan riLeman ro; im rekar lukwarkware er m̧ae raar itok em̧ool n̄an āneen Jason, m̧okta jān an kar maron̄ in kabbōjrak er ilo jenlikļo̧k eo aer.

17 Im kiiō, jikin kwelo̧k in Jason eaar epaake āneo ijo Ammaron eaar kalbwin ļo̧o̧k ko n̄an Irooj, bwe ren maron̄ jab kar ko̧kkuri. Im lo iaar jako ekkar n̄an naan eo an Ammaron, im kar būki pileij ko an Nipai, im kar kōm̧m̧ane juon ļo̧o̧k ekkar n̄an naan ko an Ammaron.

18 Im ioon pileij ko an Nipai iaar kōm̧m̧ane juon bwebwenato edipiio in aolep jero̧wiwi im mennin jōjō ko; ak ioon pileij kein iaar bōjrak n̄an kōm̧m̧ane juon bwebwenato edipiio in jero̧wiwi im mennin jōjō ko aer, bwe lo, juon jekjek in jero̧wiwi im mennin jōjō eaar jab bōjrak eaar pād im̧aan meja jān iien eo eaar bwe aō meļeļe n̄an lo iaļ ko an armej.

19 Im wo ej n̄a kōnke aer jero̧wiwi; bwe būruōn em̧ōj an obrak kōn būrom̧ōj kōnke jero̧wiwi eo aer, aolep raan ko aō; mekarta, ijeļā bwe naaj kotak eō ilo raan eo āliktata.

20 Im ālikin men kein ilo iiō in armej in Nipai kar bar kakiduduik im kokak er. Im ālikin men kein kar kokakļo̧k kōm m̧ae am kar itok iōn̄ļo̧k n̄an āneo kar etan Sem.

21 Im ālikin men kein kōm ar kapenļo̧k jikin kwelo̧k in Sem, im kōm ar aintok armej ro am jon̄an wōt eo eaar maron̄, bwe bōlen kōm in maron̄ lo̧mo̧o̧ren er jān ko̧kkure.

22 Im ālikin men kein ilo jilubukwi im en̄oul im jiljino iiō eo raar jino in itok ioom̧ bar juon alen.

23 Im ālikin men kein iaar kōnono n̄an armej ro aō, im kōketak er kōn eļap kajoor, bwe ren jutak pen im̧aan riLeman ro im ire kōn kōrā ro pāleer, im ro nejier, im m̧ōko im̧weer, im jikin ko jikier.

24 Im naan ko aō raar karuj er jidik n̄an iruj, jon̄an raar jab ko jān im̧aan riLeman ro, a jutak kōn peran ņae er.

25 Im ālikin men kein kōm ar tariņae ippān juon jarin tariņae in jiln̄uul to̧ujin ņae juon jarin tariņae in lemn̄oul to̧ujin. Im ālikin men kein kōm ar jutak im̧aer kōn eļap pen jon̄an raar ko jān im̧aam.

26 Im ālikin men kein ke raar ko kōm ar lukwarkware er kōn jarin tariņae ko am, im kar bar iioon er, im kar m̧an er; mekarta kajoor eo an Irooj eaar jab pād ippām; aaet, kōm kar makeļo̧k iaam, bwe jetōb eo an Irooj eaar jab pād wōt ilo kōm; kōn menin kōm ar erom m̧ōjņo̧ āinwōt ro jeiūm̧ im jatūm̧.

27 Im buruō eaar būrom̧ōj kōnke jorrāān in eļap an armej ro aō, kōnke jero̧wiwi eo aer im mennin jōjō ko aer. A lo, kōm ar kōm̧m̧alijar ņae riLeman ro im riko̧o̧t ro an Kadiantōn ro, m̧ae kōm ar bar bōk āne ko āneen am jolōt.

28 Im jilubukwi im en̄oul im ruwatimjuon iiō eaar eļļāļo̧k. Im ilo jilubukwi im lemn̄oul iiō eo kōm ar kōm̧m̧an e juon bujen jem̧jerā ippān riLeman ro im riko̧o̧t ro an Kadiantōn, ilo eo kōm ar bōk āne ko āneen am jolōt im kar ajeji.

29 Im riLeman ro raar letok n̄an kōm āneo ituiōn̄, aaet, em̧ool n̄an iaļ aidik eo eaar tōlļo̧k ilo āneo iturōk. Im kōm ar leļo̧k n̄an riLeman ro aolep āneo iturōk.