1 Mo i bin hapen se long semfala yia ia, i stat blong gat wan wo bakegen bitwin Ol Man blong Nifae mo Ol Man blong Leman. Mo i nomata we mi mi yangfala, bodi blong mi i bigwan; from hemia, ol pipol blong Nifae oli jusum mi se mi mi mas kam lida blong olgeta, o lida blong ol ami blong olgeta.

2 From hemia, i bin hapen se long nambasikstin yia blong mi, mi stap olsem hed blong wan ami blong Ol Man blong Nifae, mo mi go agensem Ol Man blong Leman; from hemia, tri handred mo twante mo sikis yia i bin pas i go.

3 Mo i bin hapen se long nambatri handred mo twante mo seven yia, Ol Man blong Leman oli kam agensem mifala wetem bigfala paoa we i bigwan tumas, inaf blong mekem se oli mekem ol ami blong mi oli fraet; from hemia, oli no wantem faet, mo oli stat blong ronwe i go long ol kantri long Not.

4 Mo i bin hapen se mifala i kam long bigtaon blong Angola, mo mifala i tekem bigtaon ia, mo mifala i mekem rere ol samting blong difendem mifala agensem Ol Man blong Leman. Mo i hapen se mifala i mekem bigtaon ia i kam strong moa wetem paoa blong mifala; be i nomata long ol strong wol blong mifala, Ol Man blong Leman oli kam agensem mifala mo oli ronem mifala aot long bigtaon ia.

5 Mo tu, oli bin ronem mifala i go aot long graon blong Deved.

6 Mo mifala i bin maj i go mo kam long graon blong Josua, we i stap long ol boda long Wes, kolosap long so blong solwota.

7 Mo i bin hapen se mifala i karem ol pipol blong mifala oli kam tugeta long wan ples kwiktaem olsem we mifala i save mekem, blong mekem se mifala i save karem olgeta oli kam tugeta long wan grup.

8 Be luk, graon i bin fulap wetem ol stilman mo wetem Ol Man blong Leman; mo i nomata long bigfala fasin blong prapa spolem gud samting we i bin stap ova long ol pipol blong mi, oli no sakem ol rabis fasin blong olgeta; from hemia, i gat blad mo bigfala fasin blong kilim man i ded we i stap kavremap ful fes blong graon, tugeta long pat blong Ol Man blong Nifae, mo tu, Ol Man blong Leman; evri pipol long kantri ia oli go agens long gavman, mo hemia i hapen raon long ful fes blong graon.

9 Mo nao, Ol Man blong Leman oli bin gat wan king, mo nem blong hem i Eron, mo hem i kam agensem mifala wetem wan ami blong foti mo fo taosen. Mo luk, mi bin stanap agensem hem wetem foti mo tu taosen. Mo i bin hapen se mi winim hem wetem ami blong mi, mekem se hem i ronwe long fored blong mi. Mo luk, evri samting ia i bin hapen, mo tri handred mo teti yia i bin pas i go.

10 Mo i bin hapen se Ol Man blong Nifae oli stat blong sakem rabis fasin blong olgeta, mo oli stat blong krae olsem we profet Samuel i bin profesae; from luk i no gat eni man we i save holemtaet samting we i blong hem, from ol stilman, mo ol man blong stil, mo ol man blong kilim man i ded, mo wok blong mekem majik, mo fasin blong mekem nakaemas we i stap long graon.

11 Olsem ia nao i bin stat blong gat wan harem sore, mo wan kraekrae long ful graon from ol samting ia, mo i hapen moa long medel blong ol pipol blong Nifae.

12 Mo i bin hapen se taem we mi, Momon, mi luk kraekrae blong olgeta mo harem sore blong olgeta mo bigfala harem nogud blong olgeta long fored blong Lod, hat blong mi i stat blong glad insaed long mi, from mi save ol sore mo fasin blong Lod blong save go tru long hadtaem wetem longfala tingting, from hemia, from mi bin ting se bae hem i gat sore long olgeta, blong mekem se bae oli kam bakegen, wan pipol we oli gat stret mo gud fasin.

13 Be luk hemia, glad blong mi i bin blong nating, from bigfala harem nogud blong olgeta i no mekem oli sakem sin, from gudfala fasin blong God; be hem i from bigfala harem nogud blong olgeta we devel i stap kontrolem olgeta, from Lod bae i no letem olgeta oltaem blong oli filim glad long sin.

14 Mo oli no kam long Jisas wetem hat we i fulap wetem sore mo spirit blong wantem sakem sin, be oli talem rabis toktok agensem God, mo oli wantem blong ded. Be, bae oli traehad wetem naef blong faet from laef blong olgeta.

15 Mo i bin hapen se harem nogud blong mi i kambak long mi bakegen, mo mi luk se dei blong sore i bin go i pasem olgeta, long saed blong laef ia mo blong spirit; from mi luk plante taosen long olgeta we oli katemdaon olgeta, taem we oli go agensem God blong olgeta long fes blong ol man, mo oli hivimap olgeta olsem sitsit blong animol long fes blong graon. Mo olsem ia nao tri handred mo foti mo fo yia i bin pas i go.

16 Mo i bin hapen se long nambatri handred mo foti mo faef yia, Ol Man blong Nifae oli bin stat blong ronwe long fored blong Ol Man blong Leman; mo oli folem olgeta kasem taem we Ol Man blong Nifae oli kam kasem long graon blong Jeson, bifo oli save stopem olgeta long ronwe blong olgeta.

17 Mo nao, bigtaon blong Jeson i stap kolosap long graon we Amaron i bin putum ol histri wetem Lod, blong oli no save prapa spolem gud olgeta. Mo luk, mi bin go, folem toktok blong Amaron, mo tekem ol buk blong Nifae, mo raetemdaon wan histri folem ol toktok blong Amaron.

18 Mo long ol buk blong Nifae, mi bin mekem wan ful histri blong evri fasin nogud mo ol rabis fasin; be long ol buk ia mi no mekem wan ful histri blong ol fasin nogud mo ol rabis sin blong olgeta, from luk, mi gohed blong stap luk fasin nogud mo ol rabis sin long fored blong ae blong mi stat long taem ia we mi bigwan inaf blong save luk ol fasin blong man.

19 Mo sore tumas i stap long mi from fasin nogud blong olgeta; from hat blong mi i kam fulap wetem harem nogud from fasin nogud blong olgeta, evri dei blong mi; be, mi save se bae Lod i leftemap mi long las dei.

20 Mo i bin hapen se long yia ia, ol pipol blong Nifae, bakegen, oli lukaotem mo ronemaot olgeta. Mo i bin hapen se oli ronemaot mifala kasem taem we mifala i kasem long graon long Not long graon we oli singaotem Sem.

21 Mo i bin hapen se mifala i mekem bigtaon blong Sem i kam strong, mo mifala i karem i kam tugeta ol pipol blong mifala olsem we i save hapen, blong mekem se maet mifala i save sevem olgeta blong oli no prapa spolem gud olgeta.

22 Mo i bin hapen long nambatri handred mo foti mo sikis yia, oli stat blong kam agensem mifala bakegen.

23 Mo i bin hapen se mi toktok long ol pipol blong mi, mo askem olgeta wetem bigfala paoa, blong oli stanap strong long fored blong Ol Man blong Leman mo faet from ol waef blong olgeta, mo ol pikinini blong olgeta, mo ol haos blong olgeta, mo ol hom blong olgeta.

24 Mo ol toktok blong mi oli bin givim smol paoa long olgeta, inaf blong mekem se oli no ronwe long fored blong Ol Man blong Leman, be oli stanap strong agensem olgeta.

25 Mo i bin hapen se mifala i faet wetem wan ami blong teti taosen agensem wan ami blong fifti taosen. Mo i bin hapen se mifala i stanap long fored blong olgeta strong we i mekem se oli ronwe long fored blong mifala.

26 Mo i bin hapen se taem oli ronwe, mifala i folem olgeta wetem ol ami blong mifala, mo mifala i mitim olgeta bakegen, mo mifala i kilim olgeta; be paoa blong Lod i no bin stap wetem mifala; yes, mifala i stap mifalawan nomo, mekem se Spirit blong Lod i no bin stap wetem mifala; from hemia, mifala i kam slak olsem ol brata blong mifala.

27 Mo hat blong mi i bin harem nogud from hemia, from bigfala trabol ia blong ol pipol blong mi, from ol fasin nogud blong olgeta mo ol rabis sin blong olgeta. Be luk, mifala i bin go aot agensem Ol Man blong Leman mo ol stilman blong Gadianton, kasem taem we bakegen mifala i bin tekem ol graon we i kam long ol papa blong mifala.

28 Mo nambatri handred mo foti mo naen yia i bin pas i go. Mo long nambatri handred mo fifti yia, mifala i mekem wan agrimen wetem Ol Man blong Leman mo ol stilman blong Gadianton, we tru long agrimen ia, mifala i bin mekem se oli serem ol graon blong mifala we i kam long ol papa blong mifala.

29 Mo Ol Man blong Leman oli bin givim long mifala graon long Not, yes, i go kasem smolfala graon we i lid i go long graon long Saot. Mo mifala i givim long Ol Man blong Leman, evri graon long Saot.