Tok Agensem God, Fasin blong Tok Agensem God

Blong toktok long fasin we i no gat respek, o long fasin we i no stret abaot God, o ol tabu samting.

Ol Jiu oli talem plante taem se Jisas i rong from se Hem i stap gat fasin blong tok agensem God from se Hem i stap klemem raet ia blong save fogivim ol sin (Mat 9:2–3; Luk 5:20–21), from se Hem i singaotem Hemwan, Pikinini blong God (Jon 10:22–36; 19:7), mo from se Hem i talem se bae oli luk Hem i sidaon long raet han blong paoa, mo bae Hem i kam long ol klaod blong heven (Mat 26:64–65). Bae ol rong ia we oli akiusum Hem long hem, ating bae oli tru sapos Hem i no bin stap evri samting ia we Hem i talem. Rong ia we oli putum long Hem tru long ol giaman witnes long kot long fored blong Kaonsel (Mat 26:59–61) i we Hem i gat fasin blong tok agensem tempol blong God. Fasin blong tok agensem Tabu Spirit, we i blong tanem baksaed long Kraes wetem ful tingting afta we wan i kasem wan stret save abaot Hem; hemia i sin we Lod i no save fogivim (Mat 12:31–32; Mak 3:28–29; D&K 132:27).