Eksodas

Wan buk we Moses i bin raetem long OlTesteman we i tokbaot taem ia we Ol Man Isrel oli aot long Ijip. Fas histri blong Isrel olsem we oli raetemdaon long Eksodas, oli save serem long trifala pat: (1) taem ol pipol oli bin stap slef long Ijip, (2) taem oli aot long Ijip anda long lidasip blong Moses, mo (3) ful tingting mo paoa we oli givim long wok blong Lod long laef blong olgeta long saed blong relijin, mo tu, long saed blong politik laef blong olgeta.

Fasfala pat, Eksodas 1:1–15:21, i eksplenem taem we Isrel i safa long fasin blong stap slef long Ijip; fas histri mo singaot blong Moses; taem oli aot i go, mo taem oli statem Pasova; mo maj i go long Red Si, taem we ami blong Fero i bin lus evriwan, mo singsing blong viktri blong Moses.

Nambatu pat, Eksodas 15:22–18:27, i tokbaot fasin blong pemaot Isrel mo ol samting we oli bin hapen long rod aot long Red Si i go long Sinae; ol konkon wota blong Mara, taem Lod i givim ol smol pijin mo mana, taem oli bin stap holem Sabat, merikel presen blong kasem wota long Refidim, mo faet ia longwe wetem ol man blong Amalakae; taem Jitro i kasem kamp mo advaes blong hem long saed blong lokol gavman blong ol pipol.

Nambatri pat, ol japta 19–40 (19 kasem 40) oli lukluk long taem we Isrel i konsekretem hem long wok blong God long ol tabu taem long hil Sinae. Lod i setem ol pipol apat olsem wan kingdom blong ol pris mo wan tabu nesen; Hem i givim Olgeta Ten Komanmen; mo Hem i givim instraksen long saed blong tabenakol, ol fenija insaed, mo wosip insaed long hem. Afta, i gat stori blong ol sin blong ol pipol taem oli bin wosipim wan buluk we oli wokem long gol, mo laswan, stori blong taem we oli bildim tabenakol mo wanem nao tabenakol ia bae i givim.