Hangem Man long Kros, Fasin blong

Wan wei blong Ol Man Rom blong kilim man i ded olsem panismen; hemia oli stap mekem oltaem long taem blong Niu Testeman; oli kilim ded man taem oli fasem, o nilim han mo leg blong hem long wan kros. Plante taem oli stap mekem hemia long ol slef nomo, mo ol man we oli mekem ol kraem. Bifo oli hangem man long kros, plante taem oli stap tok nogud long hem, o oli stap wipim hem (Mak 15:15). Hem we bae oli hangem hem long kros, plante taem bae oli mekem hem i tekem kros blong hemwan bakegen i go long ples we bae oli hangem hem long hem (Jon 19:16–17). Ol klos blong hem, ol soldia we oli mekem panismen ia i hapen oli stap tekem i go (Mat 27:35). Bae oli berem kros ia insaed long graon blong mekem se leg blong man i stap nomo haf mita antap long graon. Ol soldia bae oli bodigad long man long kros ia kasem taem we bae hem i ded, mo samtaem, i save tekem tri dei (Jon 19:31–37).

Oli bin hangem Jisas Kraes long kros from se wan grup blong ol man we oli no biliv long Hem oli akiusum Hem long fasin blong tanem baksaed long Sisa, mo fasin blong yusum nogud nem blong God, from se Hem i stap talem se Hem i Pikinini blong God. Oli bin givim wan pepol longfala klos (Jon 19:2), wan hat blong king we oli wokem long nilrop, mo oli bin swea long Jisas (Mat 26:67; Mak 14:65).