Pita

Long Niu Testeman, oli save Pita bifo olsem Simeon, o Saemon (2 Pita 1:1), we hem i wan man blong pulum fis long Betsaeda long Kapaneam wetem waef blong hem. Jisas i hilim mama blong waef blong Pita (Mak 1:29–31). Kraes i singaotem Pita mo brata blong hem, Andru, blong tufala i kam disaepol blong Jisas Kraes (Mat 4:18–22; Mak 1:16–18; Luk 5:1–11). Nem blong hem long lanwis Aremia i Sefas, we i minim “Wan Sia” o “ston,” mo Lod nao i givim nem ia long hem (Jon 1:40–42; JST, Jon 1:42 [Apendiks]). Nomata Niu Testeman i stap tokbaot samfala samting we Pita i no strong long olgeta long wol ia, i tokbaot tu se hem i bin winim olgeta samting ia mo hem i bin kam strong tru long bilif blong hem long Jisas Kraes.

Pita i bin konfes se Jisas i Kraes mo i Pikinini blong God (Jon 6:68–69), mo Lod i bin jusum hem blong i holem ol ki blong kingdom long wol (Mat 16:13–19). Antap long Hil we Jisas i Jenis i Kam Narafala, Pita i bin luk Sevya we i bin jenis i kam niu, mo tu, hem i bin luk Moses mo Elaeas (Elaeja) (Mat 17:1–9).

Pita i jif Aposol long taem blong hem. Afta we Sevya i bin ded, i laef bakegen long ded, mo i go antap long heven, Pita i bin singaotem Jos i kam tugeta mo i lidim wok blong singaotem wan Aposol blong i tekem ples blong Judas Iskariot (Wok 1:15–26). Pita mo Jon i hilim wan man we i no save wokbaot stat long taem we hem i bon (Wok 3:1–16), mo tru long wan merikel, tufala i kam fri long kalabus (Wok 5:11–29; 12:1–19). Hem i tru long seves blong Pita nao se oli openem gospel blong fas taem long olgeta Jentael (Wok 10–11). Long ol lata dei, Pita, wetem Jemes mo Jon, oli aot long heven oli kamdaon mo givim Melkesedek Prishud mo ol ki blong hem long Josef Smit mo Oliva Kaodri (D&K 27:12–13; 128:20).

Fas leta blong Pita

Fas leta ia, hem i bin raetem taem hem i stap long “Babilon” (ating Rom) mo hem i sendem i go long olgeta Sent long ples ia we, naoia, oli singaotem Esia Maeno, stret afta we Nero i stat blong givim hadtaem long ol Kristin man.

Japta 1 i tokbaot rol blong Kraes we oli odenem hem finis long hem olsem Ridima. Ol japta 2–3 oli eksplenem se Kraes i jif konaston blong Jos, se olgeta Sent oli holem wan prishud blong laen blong King, mo se Kraes i bin prij long ol spirit long kalabus. Ol japta 4–5 oli eksplenem from wanem oli stap prijim gospel long olgeta dedman mo from wanem ol elda oli mas fidim grup blong ol sipsip.

Seken leta blong Pita

Japta 1 i askem strong long olgeta Sent blong mekem koling mo diuti blong olgeta insaed long Jos i stret gud. Japta 2 i givim woning agensem ol giaman tija. Japta 3 i tokbaot ol las dei mo Seken Kaming blong Kraes.