Smit, Josef Junia

Profet we God i jusum blong putumbak tru Jos Ia blong Jisas Kraes long wol. Josef Smit i bon long stet blong Vemon long Yunaeted Stet blong Amerika mo i laef stat long 1805 kasem 1844.

Long 1820, God we i Papa mo Jisas Kraes, Tufala i kamaot long Josef, mo hem i lanem se i no gat wan long ol jos ia long wol we i tru (JS—H 1:1–20). Afta, enjel Moronae i visitim hem; mo Moronae i talemaot ples we ol buk we oli wokem long gol oli stap long hem; ol buk ia oli tekem histri blong ol pipol blong bifo long graon blong Amerika (JS—H 1:29–54).

Josef i transletem ol buk we oli wokem long gol mo long 1830, hem i pablisim olgeta olsem Buk blong Momon (JS—H 1:66–67, 75). Long 1829, hem i kasem prishud atoriti we i kam long Jon Baptaes mo long Pita, Jemes, mo Jon (D&K 13; 27:12; 128:20; JS—H 1:68–70).

Olsem we God i daerektem, long 6 Epril 1830, Josef mo samfala nara man, oli oganaesem Jos we i Kambak blong Jisas Kraes (D&K 20:1–4). Anda long lidasip blong Josef, Jos i kam bigwan long Kanada, Inglan, mo Is pat blong Yunaeted Stet, speseli Ohaeo, Misuri, mo Ilinoa. Ol bigfala fasin blong agens oli folem Josef mo olgeta Sent long weaples we oli go stap long hem. Long 27 Jun 1844, oli kilimded Josef mo brata blong hem Haeram from bilif blong tufala; hemia i hapen long Katej, Ilinoa, long Yunaeted Stet blong Amerika.

From save blong Hem abaot ol bigfala trabol we bae oli kam, Lod i singaotem wokman blong hem Josef Smit, D&K 1:17 (D&K 19:13).
Oli odenem Josef Smit i kam wan Aposol blong Jisas Kraes mo i kam fas elda blong Jos ia, D&K 20:2.
Pita, Jemes, mo Jon oli odenem Josef i kam aposol, D&K 27:12.
Josef mo Sidni Rigdon, tufala i testifae se tufala i luk Wan Stret Pikinini Ia Nomo blong Papa, D&K 76:23.
Wetem Oliva Kaodri, Josef Smit i bin luk Lod long wan visen, D&K 110:1–4.
Lod i singaotem Josef olsem wan prisaeding elda, wan transleta, wan reveleta, wan sia, mo wan profet, D&K 124:125.
Josef Smit i bin mekem moa, be i no moa bitim Jisas, from wok ia blong fasin blong sevem man long wol ia bitim eni narafala man we i bin laef long wol ia, D&K 135:3.

Skripja we Profet Josef Smit i tekem i kam

Josef i transletem samfala pat blong buk we oli wokem long gol, we enjel Moronae i bin givim long hem; translesen ia oli printim long 1830 olsem Buk blong Momon. Hem i kasem tu plante revelesen we i kam long Lod we i givim ol stamba doktrin mo oganaesesen blong Jos. Plante long ol revelesen ia oli putum tugeta long wanem we oli save olsem Doktrin mo Ol Kavenan. Hem i bin responsibol tu blong tekem Perel we I Gat Bigfala Praes i kam, we i tekem ol translesen we i kam tru long insperesen blong samfala raeting blong Moses, Ebraham, mo Matiu, we oli samfala storian blong histri blong hemwan mo testemoni blong hem, mo ol tetin toktok blong bilif blong doktrin mo bilif we Jos i gat.