King, Ol
Tufala buk long OlTesteman. Tufala buk ia i talemaot histri blong Isrel, stat long taem we Adonaeja, nambafo boe blong King Deved i agens (samples 1015Â B.K.B.), i go kasem taem we oli holem Juda (samples 586Â B.K.B.). Oli tekem ful histri blong Not kingdom (ol tenfala traeb blong Isrel) stat long taem we oli seperet kasem taem Ol Man Asiria oli tekem olgeta i prisena i go long ol kantri long Not. Luk long long Oda Folem Deit we i stap long Apendiks.
Fas King
Japta 1 i tokbaot ol las dei blong laef blong King Deved. Ol japta 2–11 oli tokbaot laef blong Solomon. Ol japta 12–16 oli tokbaot tufala i we kam afta hem, Rehoboam mo Jeroboam. Jeroboam i mekem se kingdom blong Isrel i seperet. Oli tokbaot sam narafala king tu. Ol japta 17–21 oli tokbaot samfala pat blong seves blong Elaeja taem hem i stap tok strong long Ehab, king blong Isrel. Japta 22 i tokbaot wan wo agensem Siria, we Ehab mo Jehosafat, king blong Juda, tufala i joen wanples. Profet Mikaea i profesae agensem ol king.
Seken King
Ol japta 1:1–2:11 oli gohed blong tokbaot laef blong Elaeja, wetem taem ia we Elaeja i go long heven long wan hankat blong faea. Ol japta 2–9 oli tokbaot seves blong Elisa we i wan seves blong fet mo bigfala paoa. Japta 10 i tokbaot Jehu, we i king, mo olsem wanem hem i prapa spolem gud haos blong Ehab mo ol pris blong Bal. Ol japta 11–13 oli tokbaot stret mo gud rul blong Jehoas mo ded blong Elisa. Ol japta 14–17 oli talem abaot samfala king we oli bin rul long Isrel mo Juda, plante taem long fasin we i no stret mo i no gud. Japta 15 i tokbaot taem Ol Man Asiria oli holem ol tenfala traeb blong Isrel. Ol japta 18–20 oli tokbaot stret mo gud laef blong Hesekia, king blong Juda, mo profet Aesea. Ol japta 21–23 oli tokbaot king Manase mo king Josaea. Folem kastom, Manase nao i responsibol long taem we oli kilimded Aesea from gospel. Josaea i wan king we i stret mo gud we i putumbak loa long medel blong Ol Jiu. Ol japta 24–25 oli tokbaot taem Ol Man Babilonia oli holem ol man.