Tabenakol

Wan haos blong Lod, senta blong wosip blong Isrel long taem blong Eksodas aot long Ijip. Tabenakol ia i wan tempol we oli save karem i go olbaot mo oli save tektekemaot mo putumbak bakegen. Ol pikinini blong Isrel oli yusum wan tabenakol kasem taem oli bildim tempol blong Solomon (D&K 124:38).

God i talemaot paten blong tabenakol blong Moses (Eks 26–27), mo ol pikinini blong Isrel oli bildim tempol ia folem paten ia (Eks 35–40). Taem tabenakol i finis, wan klaod i kavremap tenet, mo glori blong Lod i fulumap tabenakol (Eks 40:33–34). Klaod i wan saen we God i stap. Long naet, i olsem wan faea. Taem klaod i stap ova long tenet, ol pikinini blong Isrel oli kamp i stap. Taem hem i muv, oli muv i go wetem (Eks 40:36–38; Nam 9:17–18). Ol pikinini blong Isrel oli bin tekem tabenakol i go wetem olgeta long taem we oli stap wokbaot olbaot long ol draeples mo long taem we oli holem graon blong Kenan. Afta we oli holem graon ia, tabenakol i stap long Silo, ples we Lod i bin jusum (Jos 18:1). Afta we ol pikinini blong Isrel oli bildim tempol blong Solomon, tabenakol ia i lus, i nomo gat wan histri blong hem.

Lod mo Aesea oli yusum tabenakol olsem simbol blong ol taon blong Saeon mo Jerusalem long taem blong Seken Kaming blong Lod (Aes 33:20; Moses 7:62).