Nifae, Boe blong Nifae we I Boe blong Hileman

Wan buk we Nifae i bin raetem; Nifae ia we i boe blong Nifae long Buk blong Momon. Ol japta 1–10 oli soemaot se ol profesi long saed blong kaming blong Lod i stap hapen. Saen blong taem we Kraes i bon i kamaot; ol pipol oli sakem sin; be oli gobak long ol nogud fasin. Laswan, ol strong win, graon i seksek, strong strong win, mo bigfala prapa nogud taem bae i givim saen blong ded blong Kraes. Ol japta 11–28 oli rekodem taem we Kraes i go long ol Amerika. Hemia i stamba blong pat blong buk blong 3 Nifae. Plante long ol toktok blong Kraes oli semmak long ol toktok blong hem we oli rekodem long Baebol (eksampol Mat 5–7 mo 3 Nif 12–14). Ol japta 29–30 oli ol toktok blong Momon i go long ol lata dei nesen.

Buk ia i gat fotinaen ves nomo, evriwan we i stap long wan japta, be yet, i kavremap tri handred yia blong histri blong Ol Man blong Nifae (34–321 A.K.B.). Plante jeneresen blong ol man we oli raet oli givhan long histri ia. Ol ves 1–19 oli tokbaot se afta we Kraes we i laef bakegen i visitim olgeta, evri man blong Nifae mo Ol Man blong Leman ioli jenisim olgeta i kam long gospel. Pis, lav mo gud fasin i bin stap rul. Olgeta trifala man blong Nifae, we Kraes i letem olgeta blong stap long wol kasem Seken Kaming blong hem (3 Nif 28:4–9), oli tijim ol pipol. Nifae i livim rekod i stap wetem boe blong hem, Amos. Ol ves 19–47, oli histri blong seves blong Amos (84 yia) mo histri blong boe blong hem Amos (112 yia). Long 201 A.K.B., hae tingting i stat blong mekem problem long medel blong ol pipol, we oli seraotem olgetawan long ol klas, mo oli statem ol giaman jos blong kasem samting (4 Nif 1:24–34).

Ol las ves blong 4 Nifae oli soem se ol pipol oli gobak long nogud fasin (4 Nif 1:35–49). Long 305 A.K.B., Amos, boe blong Amos i ded mo brata blong hem Amaron i haedem evri tabu rekod blong lukaot gud olgeta. Amaron, afta, i holem ol rekod blong Momon, we i bin raetemdaon plante samting blong taem blong hem, mo afta raetem sot olgeta (Momon 1:2–4).