Galili
Long taem blong bifo mo blong tedei, hem i Not distrik blong Isrel we i stap long Wes saed blong Jodan Reva mo Solwota blong Galili. Galili i samples naentiseven kilometa long, mo foti-eit kilometa waed. Long bifo, i gat sam long ol graon we oli gud moa bitim ol narawan, mo i gat ol taon we oli bisi moa bitim ol nara taon long Isrel. Ol impoten bigfala rod we i go long Damaskes, Ijip, mo Is Isrel oli stap pas tru long Galili. Gudfala weta mo gudfala graon blong hem i givim ol bigfala krop olsem olif, wit, bali, mo grepfrut. Ol ples blong salem fis long saed blong Solwota blong Galili oli givim bigfala ekspot maket mo i gat gudfala ples blong winim mane. Sevya i bin spenem plante taem blong Hem long Galili.
Solwota blong Galili
Solwota blong Galili i stap long Not blong Isrel. Oli bin singaotem tu se hem i ples kolosap long Solwota blong Jineret long OlTesteman, mo hem i Lugun blong Genesaret o Galili o Lugun blong Taebirias long Niu Testeman. Jisas i bin givim plante tijing long ples ia (Mat 13:2). Solwota ia, sep blong hem i olsem wan pea, longfala blong hem i 20 kilometa, mo waed blong hem i 12 kilometa long ples we i waed moa. Hem i slip 207 mita andanit long level blong solwota, we i mekem se plante taem, win we i stap raon long hem i hot lelebet. Kolkol win we i stap kamdaon folem ol hil mo i stap fas long hot win antap long wota i mekem se i gat strong win oltaem (Luk 8:22–24).