Baebol

Plante buk we oli putum tugeta blong ol raeting blong Ol Man Hibru mo ol Kristin man, we insaed long ol buk ia, i gat ol tabu revelesen. Toktok ia, Baebol i minim “ol buk.” Baebol i wok blong plante profet, mo ol man blong raet we oli kasem insperesen anda long paoa blong Tabu Spirit (2 Pita 1:21).

Kristin Baebol i gat tufala pat long hem, we oli save gud tufala olsem OlTesteman mo Niu Testeman. OlTesteman i gat insaed ol buk blong ol skripja we Ol Man Jiu blong Palestaen oli yusum long taem blong seves blong Lod long wol ia. Niu Testeman i holem ol raeting we i blong taem blong Ol Aposol, mo oli tekem se i tabu mo i gat semfala atoriti olsem ol skripja blong Ol Man Jiu. Ol buk blong OlTesteman oli kamaot long ol buk blong kantri we oli raetem ova long plante handred yia, mo oli bin raetem olgeta long lanwis blong Hibru, be ol buk blong Niu Testeman, oli wok blong wan jeneresen nomo, mo oli bin raetem plante long olgeta long lanwis blong Gris.

Long OlTesteman, toktok ia, testeman, i ripresentem wan toktok long Hibru, we i minim “kavenan.” Olfala kavenan, i loa ia we God i bin givim long Moses taem Isrel i bin sakemaot ful gospel we ol pipol blong Lod oli bin gat stat long stat blong laef long wol ia. Niu Kavenan, i gospel ia we Jisas Kraes i bin stap tijim.

Long Baebol blong Ol Man Hibru (OlTesteman) oli bin serem ol buk long trifala grup: Loa, Ol Profet, mo Ol Raeting. Baebol, we Kristin wol i yusum, i putum ol buk oli folem ol topik, olsem histri, ol poem, mo ol profesi.

Ol buk blong Niu Testeman, plante taem oli stap long oda ia: ol fofala Gospel mo Ol Wok; ol leta blong Pol; ol jeneral leta blong Jemes, Pita, Jon mo Jud; mo Revelesen blong Jon.

Jos Ia blong Jisas Kraes blong Ol Lata-dei Sent i laekem mo respektem Baebol, mo i talem se i tru, se Lod i gohed blong givim moa revelesen tru long ol profet blong Hem long ol las dei ia we i sapotem mo i konfemem ol stori long Baebol long saed blong ol wok blong God wetem ol man.