Hibru, Leta I Go long Ol Laen blong Isrel
Hem i wan buk long Niu Testeman. Pol i bin raetem leta ia i go long ol memba blong Jos we oli Ol Jiu, blong winim tingting blong olgeta se samfala pat blong loa blong Moses oli kamtru finis tru long Kraes, mo gospel blong Kraes we i hae moa i tekem ples blong loa blong Moses. Taem Pol i bin gobak long Jerusalem long en blong nambatri misin blong hem (samples 60Â A.K.B.), hem i bin faenem se plante memba blong Jos we oli Jiu oli bin stap folem yet loa blong Moses (Wok 21:20). Hemia i bin ten yia afta we wan konfrens blong Jos lon Jerusalem i putum se i gat samfala loa blong Moses we i no nid blong stap blong Ol Jentael Kristin oli kasem blong sevem olgeta. I luk se i no longtaem afta, Pol i bin raet i go long Ol Man Hibru blong soem stret skripja blong olgeta, mo tru long stret toktok, soem long olgeta from wanem oli nomo mas praktisim o folem loa blong Moses.
Ol japta 1 mo 2 oli eksplenem se Jisas i moa hae bitim ol enjel. Ol japta 3–7 oli komperem Jisas long Moses mo long loa blong Moses, mo oli testifae se Jisas i moa hae bitim tufala. Ol japta ia oli tijim tu se Melkesedek Prishud i moa hae long Aronik Prishud. Ol japta 8–9 oli tokabaot olsem wanem ol odinens blong taem blong Moses oli mekem ol pipol oli rere long seves blong Kraes, mo olsem wanem Kraes i medel man blong niu kavenan (Alma 37:38–45; D&K 84:21–24). Japta 10 i wan toktok askem man blong stap wok strong mo stap fetful. Japta 11 i wan toktok long saed blong fet. Japta 12 i givim ol strong tok o ol griting. Japta 13 i tokbaot tabu fasin blong mared mo hamas i impoten blong stap obei.