Sakrifaes

Long taem blong bifo, sakrifaes i minim blong mekem wan samting o wan man, o woman i kam tabu. Naoia, i kam blong minim blong givim o lusum ol samting blong wol blong givim long Lod mo kingdom blong Hem. Ol memba blong Jos Ia blong Lod oli mas glad blong sakrifaesem evri samting blong Lod. Josef Smit i tijim se “wan relijin i no askem sakrifaes blong evri samting, neva bae i gat inaf paoa blong givim fet we i nid blong kasem laef mo fasin blong sevem man.” Long lukluk i go long laef we i no save finis, ol blesing we yumi kasem tru long sakrifaes, i no inaf komperem long eni samting we yumi save givim i go.

Afta we God i sakemaot Adam mo Iv aotsaed long Garen blong Iden, Lod i givim long tufala, loa blong sakrifaes. Loa ia, i blong givim ol fasbon blong grup blong animol blong olgeta. Sakrifaes ia i saen blong sakrifaes we bae Wan Stret Pikinini blong God bae i mekem (Moses 5:4–8). Praktis ia i bin gohed kasem taem we Jisas Kraes i ded, mo hemia i en blong sakrifaes blong ol animol olsem wan odinens blong gospel (Alma 34:13–14). Tedei, long Jos, ol memba oli tekem sakramen blong bred mo wota blong tingbaot sakrifaes blong Jisas Kraes. Ol memba blong Jos Ia blong Kraes tedei, oli askem olgeta tu blong mekem sakrifaes blong wan hat we i fulap long sore mo wan spirit we i wantem sakem sin (3 Nif 9:19–22). Hemia i minim se oli mas gat tingting i stap daon, oli sakem sin, mo oli glad blong obei long ol komanmen blong God.