Alma, Boe blong Alma

Wan buk we i seperet insaed long Buk blong Momon, we i tekem histri, we oli katem sot, blong ol profet ia, Alma, boe blong Alma, mo boe blong hem Hileman. Ol stori insaed long buk oli tekem ples samples long Yia 91 go kasem 52 B.K.B. (Bifo Kraes i Bon). Buk ia i gat 63 japta long hem. Ol japta 1–4 oli tokbaot taem ol man we oli folem Nehor mo Amlisae oli go agensem Ol Man blong Nifae. Ol wo we oli kamaot long hemia oli ol wo we oli bin prapa spolem gud ol samting long histri blong Ol Man blong Nifae. Ol Japta 5–16, oli tokbaot stori blong ol fas wokbaot blong Alma olsem wan misinari, wetem tabu toktok long saed blong Gudfala Man blong Lukaot long Sipsip (Alma 5), mo tu, prijing blong hem wetem Amulek long taon blong Amonaeha. Ol japta 17–27 oli tokbaot histri blong ol boe blong Mosaea mo seves blong olgeta long medel blong Ol Man blong Leman. Insaed long ol japta 28–44 i gat sam long ol tabu toktok blong Alma we oli moa impoten bitim ol narawan. Long japta 32, Alma i komperem tabu tok long wan sid; long japta 36, hem i tokbaot bakegen stori blong hem we hem i tokbaot long boe blong hem, Hileman, long saed blong taem we hem i jenisim laef blong hem i kam long Lod. Ol japta 39–42 oli rekodem advaes blong Alma i go long boe blong hem Korianton, we i foldaon long sin blong no folem loa blong fasin blong stap klin; impoten tabu tok ia i eksplenem, jastis, sore, Laef bakegen long Ded, mo Atonmen. Ol japta 45–63 oli tokbaot gud ol wo blong Ol Man blong Nifae blong tetaem ia, mo taem we oli muv i go long ol defren ples long taem blong rul blong Hagot. Ol bigfala lida olsem Kapten Moronae, Tiankum mo Lihae oli bin help blong holemtaet gud i stap Ol Man blong Nifae tru long ol aksen blong olgeta we oli mekem wetem paoa long tingting mo long stret taem.