Hosana

Wan toktok long lanwis blong Hibru we i minim “plis sevem yumi” mo oli yusum blong presem God mo blong prea.

Long Lafet blong Ol Wansaed Haos, we i selebretem taem Lod i mekem Isrel i kam fri mo i tekem olgeta long graon blong promes, ol pipol oli singsing long ol toktok we oli stap long buk blong Sam 118, mo oli tekem ol lif blong pamtri oli saksakem. Long taem we Lod i maj i kam insaed long Jerusalem, ol bigfala grup blong ol pipol oli singaot: “Hosana” mo oli putum ol lif blong pamtri long rod blong dongki we Jisas i sidaon long hem i wokbaot antap long hem, mo long wei ia, oli bin stap soem se oli andastanem se Jisas ia i sem Lod we i bin mekem Isrel i fri long bifo (Sam 118:25–26; Mat 21:9, 15; Mak 11:9–10; Jon 12:13). Ol pipol ia oli bin luksave Kraes olsem Mesaea we oli bin wet from longlongtaem finis i kam. Toktok ia, Hosana i kam wan wei blong selebretem Mesaea longtaem finis i kam kasem naoia (1 Nif 11:6; 3 Nif 11:14–17). Singaot blong hosana i bin stap long dedikesen blong Ketlan Tempol (D&K 109:79) mo naoia i pat blong dedikesen blong ol tempol blong tedei.