Elda

Toktok ia, elda, oli yusum long ol defren wei long Baebol. Long OlTesteman, plante taem i tokbaot ol olfala man insaed long wan traeb o laen, we oli stap putum olgeta blong lukaot long ol wok blong gavman (Jen 50:7; Jos 20:4; Rut 4:2; Mat 15:2). Yia blong olgeta mo eksperiens blong olgeta i mekem se advaes blong olgeta i impoten tumas. Posisen blong olgeta i no oltaem wan prishud koling.

I bin gat tu ol elda we oli odenem olgeta long Melkesedek Prishud long taem blong OlTesteman (Eks 24:9–11). Long Niu Testeman, oli tokbaot ol elda olsem wan ofis blong prishud insaed long Jos (Jem 5:14–15). Long medel blong Ol Man blong Nifae, i bin gat tu ol elda we oli odenem olgeta long prishud (Alma 4:7, 16; Moro 3:1). Long dispensesen ia, Josef Smit mo Oliva Kaodri nao oli bin ol fas elda we oli odenem olgeta (D&K 20:2–3).

Naoia, elda i taetol we oli givim long evri man we i kasem Melkesedek Prishud. Eksampol, ol misinari we oli ol man, oli singaotem olgeta, elda. Mo tu, wan Aposol i wan elda, mo i stret blong singaotem ol memba blong Kworom blong Olgeta Twelef Aposol, o ol Kworom blong Olgeta Seventi wetem taetol ia (D&K 20:38; 1 Pita 5:1). Ol diuti blong ol elda we oli odenem olgeta long Jos tedei, Lod i givim olgeta long revelesen blong lata-dei (D&K 20:38–45; 42:44; 46:2; 107:12).