Setan. Devel i enemi blong stret mo gud fasin mo i enemi blong olgeta we oli stap lukaot blong mekem tingting blong God. Hem i stret spirit boe blong God, mo long wan taem, hem i bin wan enjel we i bin gat atoriti long ples blong God (Aes 14:12; 2 Nif 2:17). Be, hem i bin agensem God long laef bifo laef long wol ia, mo hem i bin winim tingting blong wan pat aot long tri blong ol spirit pikinini blong Papa blong oli go agens wetem hem (D&K 29:36; Moses 4:1–4; Ebr 3:27–28). God i bin sakem olgeta aot long heven, i no letem olgeta blong kasem janis blong gat wan bodi blong mit mo bun, mo blong gat eksperiens long laef long wol ia, mo bae God i no save mekem olgeta oli kam antap samtaem blong taem we i no save finis. Stat long taem ia we God i sakem devel aot long heven, hem i lukaot oltaem blong giaman long evri man mo woman, mo i lidim olgeta longwe long wok blong God blong mekem se evri man oli harem nogud semmak olsem hem (Rev 12:9; 2 Nif 2:27; 9:8–9).
Jos blong devel
Evri oganaesesen long wol we i nogud mo i folem fasin blong wol we i spolem gospel ia we i klin gud mo i stret gud, mo i stap faet agensem Smol Sipsip blong God.