Aesea
Wan profet blong OlTesteman we i bin stap talem ol profesi stat long 740 kasem 701 B.K.B. Olsem jif advaesa blong King Hesekia, Aesea i bin gat bigfala paoa blong lidim ol tingting long saed blong relijin, mo tu, long saed blong politik.
Jisas i talem ol toktok blong Aesea plante taem bitim we Hem i talem ol toktok blong ol nara profet. Pita, Jon mo Pol tu long Niu Testeman, oli stap ripitim ol toktok blong Aesea plante taem. Insaed long Buk blong Momon mo Doktrin mo Ol Kavenan i gat moa toktok we oli kam long Aesea bitim eni nara profet, mo i givim plante help blong save talem mining blong ol toktok blong Aesea. Nifae i bin tijim ol pipol blong hem aot long ol toktok we Aesea i raetem (2 Nif 12–24; Aes 2–14). Lod i bin talem long Ol Man blong Nifae se “ol toktok blong Aesea oli bigwan tumas” mo se evri samting we Aesea i profesae bae i kamtru (3 Nif 23:1–3).
Buk blong Aesea
Wan buk long OlTesteman. Plante long ol profesi blong Aesea oli lukluk long taem we Ridima bae i kam, long seves blong Hem long wol ia (Aes 9:6), mo olsem Hae King long las dei (Aes 63). Hem i bin talem profesi tu abaot plante samting we bae i hapen long Isrel.
Japta 1 i wan fas toktok long ful buk. Aesea 7:14; 9:6–7; 11:1–5; 53; mo 61:1–3 oli tokbaot finis misin blong Sevya. Ol japta 2, 11, 12 mo 35 oli lukluk long ol samting we bae i hapen long las dei, taem gospel i kambak, Isrel bae i kam tugeta, mo taem graon ia we i tosta bae i kam antap fulwan semmak olsem ros flaoa we i open gud. Japta 29 i gat wan profesi long saed blong taem we Buk blong Momon bae i kamtru (2 Nif 27). Ol japta 40–46 oli talemaot se Jehova i gat olgeta paoa mo i tru God ova long ol aedol god blong ol man we oli no biliv. Ol japta we oli stap, ol japta 47–66, oli tokbaot ol samting we bae i hapen long las taem we Isrel i kambak mo Saeon i stanap, wetem Lod we i stap long medel blong ol pipol blong Hem.