Kolosi, Leta I Go long Ol Kristin Man long

Wan buk insaed long Niu Testeman. Fastaem, hem i wan leta we Aposol Pol i bin raetem long ol Kristin man long Kolosi afta we ivanjelis blong Jos long Kolosi, Epafras i bin visitim hem (Kol 1:7–8). Epafras i bin talem long Pol se ol man long Kolosi oli bin stap foldaon long bigfala mistek—oli stap ting se oli moa gud bitim ol narafala pipol from se oli stap folem gud sam odinens we oli save mekem long pablik (Kol 2:16), from se oli sakrifaesem olgeta blong no tekem sam samting, mo oli stap wosipim ol enjel (Kol 2:18). Ol praktis ia, oli stap mekem ol man Kolosi oli filim se oli mekem olgeta i kam tabu. Oli bin filim tu se oli stap andastanem ol sikret blong yunives i moa gud bitim ol narafala memba blong Jos. Long leta blong hem, Pol i stretem olgeta taem hem i tijim olgeta se fasin blong pemaot man i kam nomo tru long Kraes, mo yumi mas waes mo yumi mas wok blong Hem.

Japta 1 i griting blong Pol long ol man Kolosi. Ol japta 2–3 oli talem doktrin mo i holem ol toktok long saed blong Kraes olsem Ridima, denja blong stap mekem giaman wosip, mo olsem wanem fasin blong laef bakegen long ded i impoten tumas. Japta 4 i tijim se olgeta Sent oli mas waes long saed blong evri samting.