Jon, Boe blong Sebedi
Wan long Olgeta Twelef long Niu Testeman; hem i wan boe blong Sebedi, mo wan brata blong Jemes. Long stat blong laef blong hem, hem i wan man blong hukum fis (Mak 1:17–20). Ating hem i disaepol ia blong Jon Baptaes we oli no givim nem blong hem, we oli tokbaot long Jon 1:40. Afta long hemia, hem i kasem koling blong stap wan disaepol blong Jisas Kraes (Mat 4:21–22; Luk 5:1–11). Hem i raetem Gospel blong Jon, trifala leta, mo buk blong Revelesen. Hem i wan long olgeta tri we i bin stap wetem Lod long taem we Lod i mekem gel blong Jaeras i girap bakegen (Mak 5:35–42), i bin stap long Hil we Jisas I Kam Narafala (Mat 17:1–9), mo long Getsemane (Mat 26:36–46). Long ol raeting blong hemwan, hem i tokbaot hemwan olsem disaepol we Jisas i laekem tumas (Jon 13:23; 21:20) mo olsem “narafala disaepol” (Jon 20:2–8). Mo tu, Jisas i singaotem hem mo brata blong hem, Boanejes, “Tanda” (Mak 3:17). I gat samfala taem we oli tokbaot hem long ol stori blong taem we oli hangem Jisas long kros mo long taem we Jisas i laef bakegen long ded (Luk 22:8; Jon 18:15; 19:26–27; 20:2–8; 21:1–2). Afta, Jon i nomo gat raet blong go long Patmos, mo long ples ia nao hem i raetem buk blong Revelesen (Rev 1:9).
Oli tokbaot Jon fulap long ol lata-dei revelesen (1 Nif 14:18–27; 3 Nif 28:6; Ita 4:16; D&K 7; 27:12; 61:14; 77; 88:141). Ol skripja ia oli konfemem rekod blong Baebol abaot Jon, mo tu, i givim niu tingting long olsem wanem hem i bin impoten, mo olsem wanem wok we Lod i bin givim long hem blong mekem long wol ia long taem blong Niu Testeman mo long ol las dei, i impoten tumas. Ol lata-dei skripja oli mekem i klia se Jon i no bin ded be Lod i letem hem blong stap long wol ia olsem wan wokman we bae i stap givim seves kasem taem blong Seken Kaming blong Lod (Jon 21:20–23; 3 Nif 28:6–7; D&K 7).
Ol leta blong Jon
Nomata man we i raetem ol trifala leta ia i no talemaot stret nem blong hem, lanwis blong hem i semmak bigwan long hemia blong Jon, we i Aposol, mekem se oli ting se hem nao i raetem olgeta trifala leta ia.
Fas Jon, Japta 1 i askem strong olgeta Sent blong kam felosip wetem God. Japta 2 i tokbaot bigwan se olgeta Sent oli save God tru long fasin blong obei mo i givim toktok blong olgeta blong no lavem wol. Japta 3 i askem evriwan blong kam ol pikinini blong God mo blong lavlavem olgeta. Japta 4 i eksplenem se God, Hem i lav, mo i stap insaed long olgeta we oli lavem Hem. Japta 5 i eksplenem se olgeta Sent oli bon long God tru long bilif long Kraes.
Seken Jon, i semmak long Fas Jon. Insaed long buk ia, Jon i stap glad from se ol pikinini blong “sista we God i jusumaot hem” oli stap fetful.
Nambatri Jon i presen wan man we nem blong hem i Gaeas, from hem i stap fetful mo i stap helpem olgeta we oli lavem trutok.
Gospel blong Jon
Long buk ia blong Niu Testeman, Jon we i Aposol i testifae se (1) Jisas Hem i Kraes o Mesaea mo (2) Jisas i Pikinini blong God (Jon 20:31). Ol taem blong laef blong Jisas we hem i tokbaot, hem i jusum gud olgeta mo i putum gud olgeta wetem tingting ia long maen. Buk ia i stat wetem wan toktok we i talemaot huia Kraes long laef bifo laef long wol: Hem i stap wetem God, Hem i God, mo Hem i krieta blong evri samting. Hem i bon long wol i kasem bodi blong mit mo bun olsem Wan Stret Pikinini Nomo blong Papa. Jon i tokbaot rod blong seves blong Jisas, i tokbaot bigwan se Hem i kam long heven, mo Hem i laef bakegen long ded. Long klia fasin, hem i talemaot stret se Jisas i Pikinini blong God, mo i gat pruf tru long ol merikel, ol witnes, ol profet, mo voes blong Kraes Hemwan i talemaot. Jon i tij taem hem i soem laet mo tudak, trutok mo giaman tok, gud mo nogud, God mo devel. Ating i no gat wan narafala histri we i soemaot klia se Jisas i tabu, mo i soemaot klia se Ol Man Jiu we oli rul oli no gat fet.
Jon i raetem fulap abaot seves blong Kraes long Judia, speseli las wik blong seves blong Hem long wol ia, be Matiu, Mak, mo Luk, olgeta oli raet fulap abaot seves blong Kraes long Galili. Plante samting long Gospel ia, revelesen blong lata-dei i bin mekem i klia (D&K 7 mo D&K 88:138–141).
Blong kasem wan lis blong ol samting we i bin hapen long laef blong Sevya we oli tokbaot long Gospel blong Jon, luk long Agrimen Bitwin Ol Buk blong Gospel we i stap long Apendiks.