Melkesedek Prishud

Melkesedek Prishud i prishud ia we i hae moa, o i bigwan moa; Aronik Prishud i prishud we i daon moa. Melkesedek Prishud i tekem ol ki blong ol blesing blong Jos long saed blong spirit. Tru long ol odinens blong prishud we i moa hae, paoa blong God i kamkamaot long ol man (D&K 84:18–25; 107:18–21).

God i soemaot prishud ia we i moa hae i go long Adam faswan. Ol petriak mo ol profet long evri dispensesen oli gat atoriti ia (D&K 84:6–17). Fastaem, oli singaotem Tabu Prishud, folem Oda blong Pikinini blong God. Afta, oli save long hem olsem Melkesedek Prishud (D&K 107:2–4).

Taem ol pikinini blong Isrel oli no stap laef folem ol spesel janis mo ol kavenan blong Melkesedek Prishud, Lod i tekemaot loa ia we i moa hae, mo i givim olgeta prishud ia we i moa daon, mo wan loa we i moa daon (D&K 84:23–26). Tufala ia, oli stap singaotem tu Aronik Prishud mo loa blong Moses. Taem Jisas i kam long wol, Hem i putumbak Melkesedek Prishud long Ol Man Jiu mo i stat blong bildimap Jos long medel blong olgeta. Be, prishud mo Jos, tufala i lus bakegen tru long apostasi. Samtaem afta, Lod i putumbak prishud mo Jos tru long Profet Josef Smit Junia (D&K 27:12–13; 128:20; JS—H 1:73).

Insaed long Melkesedek Prishud, i gat ol ofis blong elda, hae pris, petriak, Seventi, mo Aposol (D&K 107). Bae Melkesedek Prishud i stap oltaem olsem wan pat blong kingdom blong God long wol ia.

Presiden blong Jos Ia blong Jisas Kraes blong Ol Lata-dei Sent i presiden blong hae prishud o Melkesedek Prishud, mo hem i holem evri ki long saed blong kingdom blong God long wol. Koling blong Presiden, wan man nomo long wan taem i save holem, mo hem wan ia nomo long wol ia we i gat raet blong yusum evri ki blong prishud (D&K 107:64–67; 132:7).