Revelesen blong lata-dei i tokbaot hel long tufala wei. Faswan, hem i ples ia we i blong sot taem insaed long spirit wol; ples ia i blong olgeta we oli no bin stap obei long taem we oli bin stap long wol. Long wei ia, hel i gat en blong hem. Ol spirit we oli stap ia, bae oli tijim gospel long olgeta, mo samfala taem afta we oli sakem sin, bae oli laef bakegen long ded oli go long wan digri blong glori we oli naf long hem. Olgeta we bae oli no sakem sin, be oli no ol pikinini blong tudak, bae oli stap long hel nomo long taem blong Mileniom. Afta long wan taosen yia blong harem nogud, bae oli laef bakegen long ded oli go long wan telestial glori (D&K 76:81–86; 88:100–101).
Sekenwan, hem i ples ia we i stap gogo i no gat en blong olgeta we Atonmen blong Jisas Kraes i no pemaot olgeta. Long wei ia, hel i stap we i stap. Hem i blong olgeta we Lod i faenem olgeta se “oli gohed blong stap doti nomo” (D&K 88:35, 102). Hemia i ples we Setan, ol enjel blong hem, mo ol pikinini blong tudak—olgeta we oli tanem baksaed blong olgeta long Pikinini afta we Papa i soemaot Hem long olgeta—ples ia nao bae oli stap long hem blong taem we i no save finis (D&K 76:43–46).
Samtaem, ol skripja oli tokbaot hel olsem bigfala tudak.