Jeremaea

Ol japta 1–6 oli gat ol profesi we hem i givim long taem blong rul blong Josaea. Ol japta 7–20 oli ol profesi long taem blong Jehoeakim. Ol japta 21–38, oli lukluk long rul blong Sedekaea. Ol japta 39–44 oli gat ol profesi mo i tokbaot ol taem blong histri afta long foldaon blong Jerusalem. Japta 45 i tekem wan promes we God i mekem long Baruk, man blong hem we i stap raet, se bae Hem i sevem laef blong Baruk. Laswan, ol japta 46–51 oli ol profesi agensem ol narafala nesen. Japta 52 i wan las toktok long saed blong histri. Samfala long ol profesi blong Jeremaea oli bin stap long ol buk we oli wokem long bras we Leban i bin gat mo Nifae i tekem (1 Nif 5:10–13). Oli tokbaot Jeremaea tu, tufala nara ples long Buk blong Momon (1 Nif 7:14; Hil 8:20).

Insaed long buk blong Jeremaea, i gat tu wan ples we i luksave se man i bin laef bifo hem i laef long wol ia, mo God i bin odenem Jeremaea finis bifo hem i kam long wol (Jerem 1:4–5); i gat wan profesi se Isrel bae i kambak tugeta wanples, oli nomo seraot olbaot, mo bae i karem i kam tugeta wan blong wan taon, mo tu blong wan famli i go long Saeon, we i wan gudfala graon we Isrel mo Juda, tufala i save stap long hem i sef mo long pis (Jerem 3:12–19); mo i gat wan profesi blong Lod we i stap karem tugeta Isrel aot long ol kantri long Not taem hem i sendem plante man blong pulum fis mo plante man blong lukaotem mit long bus blong faenem olgeta (Jerem 16:14–21). Samting ia i bae i hapen long ol lata dei bae i bigbigwan i bitim taem ia we Moses i tekem Isrel i go aot long Ijip (Jerem 16:13–15; 23:8).