Josef, Boe blong Jekob

Insaed long OlTesteman, hem i fasbon boe blong Jekob mo Rejel (Jen 30:22–24; 37:3).

Josef i kasem raet blong fasbon long Isrel from se Ruben, fasbon boe blong fas waef blong Jekob i bin lusum spesel janis from hem i brekem loa (1 Kron 5:1–2). From se hem i klin inaf, Josef, olsem fasbon boe blong seken waef blong Jekob, i nekiswan blong kasem blesing ia. Josef i bin kasem tu wan blesing long papa blong hem i no longtaem bifo Jekob i bin ded (Jen 49:22–26).

Josef i wan man we hem i gat gudfala strong fasin, wan man we i “waes mo i luksave samting” (Jen 41:39). Taem ia hem i sakemaot waef blong Potifa i wan eksampol blong fet, fasin blong stap klin, mo tru fasin (Jen 39:7–12). Long Ijip, taem Josef i talemaot huia hem stret long ol brata blong hem, hem i talem tangkyu long olgeta be hem i no poenem fingga long olgeta from wei we oli bin mekem hem. Hem i bilivim se aksen blong olgeta i bin help blong mekem tabu tingting blong God i hapen (Jen 45:4–15).

Revelesen blong lata-dei i soemaot misin we i moa bigwan blong famli blong Josef long ol las dei (JST, Jen 50:24–38 [Apendiks]; 2 Nif 3:3–24; 3 Nif 20:25–27).

Jekob i lavem Josef tumas mo i givim hem wan kot we i gat plante kala long hem, Jen 37:3.
From se oli bin jalus, ol brata blong Josef oli kam blong no laekem hem nating mo oli plan blong kilim hem i ded, be afta, oli salem hem long sam bisnis man we oli stap go long Ijip, Jen 37:5–36.
Long Ijip, Lod i mekem Josef i kam antap mo hem i kam bos blong ol samting long haos blong Potifa, Jen 39:1–4.
Waef blong Potifa i giaman, i talem se Josef i traem blong fosem hem blong slip wetem hem; Josef i no rong be oli putum hem long kalabus, Jen 39:7–20.
Josef i talemaot mining blong ol drim blong man blong lukaot long waen blong king, mo drim blong man blong king blong mekem bred, Jen 40.
King blong Ijip i stat blong laekem Josef from se Josef i talem mining blong wan long ol drim blong hem; hem i mekem Josef i kam nambawan haeman long Ijip, Jen 41:14–45.
Efrem mo Manase, tufala i bon i kam long wol, Jen 41:50–52.
Josef i joen bakegen long papa mo ol brata blong hem, Jen 45–46.
Josef i ded long Ijip taem hem i gat 110 yia, Jen 50:22–26.