Elaeja

Wan profet long OlTesteman we i kambak long ol las dei blong givim ol ki blong siling paoa long Josef Smit mo Oliva Kaodri. Long taem blong hem, Elaeja i bin tij long Not Kingdom blong Isrel (1 King 17–22; 2 King 1–2). Hem i bin gat bigfala bilif long Lod mo oli save hem from plante merikel. Long rikwes blong hem, God i bin stopem ren blong 3 mo haf yia. Hem i mekem wan boe i girap long ded, mo hem i bin singaotem faea i kam long heven i kamdaon (1 King 17–18). Ol pipOl Jiu oli stap wet yet blong Elaeja i kambak, olsem we Malakae i bin profesae se bae hem i kambak (Mal 4:5). Hem i stap yet olsem wan man we oli stap invaetem hem, hemia long ol lafet blong Pasova blong Ol Jiu; oli livim wan open doa i stap mo oli putum wan emti jea i stap wet long hem oltaem.

Profet Josef Smit i bin talem se Elaeja i holem siling paoa blong Melkesedek Prishud, mo hem nao i las profet blong mekem hemia bifo taem blong Jisas Kraes. Hem i bin kamaot long Hil we Jisas I Jenis i Kam Narafala wetem Moses mo givim ol ki blong prishud long Pita, Jemes mo Jon (Mat 17:3). Hem i bin kamaot bakegen, wetem Moses mo ol narafalawan, long 3 Epril 1836, long Ketlan Ohaeo Tempol, mo i bin givim ol semfala ki ia long Josef Smit mo Oliva Kaodri (D&K 110:13–16). Evri samting ia, i blong rere from Seken Kaming blong Lod, olsem we oli tokbaot long Malakae 4:5–6.

Paoa blong Elaeja i siling paoa blong prishud, we tru long hem, oli joenem samting o oli brekem samting long wol mo long heven (D&K 128:8–18). Ol wokman blong Lod we Hem i bin jusum olgeta long wol tedei oli gat siling paoa ia, mo oli mekem ol odinens blong gospel we i sevem man, tugeta blong olgeta we oli laef mo olgeta we oli ded (D&K 128:8).