1 Ma sa oo i lena lava tausaga, sa toe amata ona i ai o se taua i le va o sa Nifaē ma sa Lamanā. Ma e ui ina sa ou talavou, sa ou tino ese; o lea na tofia ai a’u e le nuu o Nifae ia avea a’u ma o latou ta’ita’i, po o le ta’ita’i o a latou autau.

2 O lea sa oo ai i le sefulu ma le ono o o’u tausaga na ou alu atu ai e taimua i se autau a sa Nifaē, e faasagatau ia sa Lamanā; o lea ua mavae atu le tolu selau luasefulu ma le ono tausaga.

3 Ma sa oo i le tausaga e tolu selau luasefulu ma le fitu na o mai ai sa Lamanā i luga o i matou ma le malosi tele lava, sa oo ina latou faamatatauina au autau; o lea sa latou le mananao ai e tau, ma amata ona latou solomuli agai i laueleele i matu.

4 Ma sa oo ina matou tau atu i le aai o Anekala, ma sa matou pulea le aai, ma faia sauniuniga e puipuia ai i matou lava e faasaga ia sa Lamanā. Ma sa oo ina matou tu’ioloina le aai e tusa ma lo matou malosi; peitai e ui ia matou tu’iologa uma ae sa o mai lava sa Lamanā i o matou luga ma tutuli ese i matou mai le aai.

5 Ma sa latou tutuli ese foi i matou mai le laueleele o Tavita.

6 Ma sa matou savavali ma taunuu atu i le laueleele o Iosua, lea sa i ai i tuaoi i sisifo i tafatafa ane o le matafaga.

7 Ma sa oo ina matou faapotopoto o matou tagata i le vave sa mafai ona faia ai, ina ia mafai ona matou faapotopoto faatasi i latou o se tino e tasi.

8 Ae faauta, sa tumu le laueleele i faomea ma sa Lamanā; ma e ui i le faafanoga tele sa faamalumalu ifo i luga o lo’u nuu, sa latou le salamo i a latou mea leaga; o lea na lofia ai le laueleele atoa i le toto ma tagata oti, i le vaega a sa Nifaē ma le vaega foi a sa Lamanā; ma o se fouvalega lea e tasi sa faatumulia ai le laueleele atoa.

9 Ma o lenei, sa i ai se tupu o sa Lamanā, ma o lona igoa o Arona; ma sa ia faasagatau mai ia te i matou ma se autau e fasefulu ma le fa afe. Ma faauta, sa ou tetee atu ia te ia ma se autau e fasefulu ma le lua afe. Ma sa oo ina o a’u ma la’u autau ua faatoilaloina o ia ma sa oo ina sola ese o ia mai o’u luma. Ma faauta, sa faia nei mea uma, ma ua mavae atu le tolu selau ma le tolugafulu o tausaga.

10 Ma sa oo ina amata ona salamo sa Nifaē i lo latou amioletonu, ma amata ona oi e pei lava ona sa valoia e Samuelu le perofeta; aua faauta, sa le mafai e se tagata ona tausi i ana lava mea, ona o tagata gaoi, ma faomea, ma fasioti tagata, ma fai mea faamaneta, ma faataulaitu sa i ai i le laueleele.

11 Sa faapea ona amata ona i ai o le faanoanoa ma le tagiauē i le laueleele atoa ona o nei mea, ma sa sili atu lava ona faapitoa i le nuu o Nifae.

12 Ma sa oo ina o au, o Mamona, sa vaai i lo latou tagiauē ma lo latou faavauvau ma lo latou faanoanoa i luma o le Alii, sa amata ona olioli o lo’u loto i totonu ia te a’u, i lo’u iloa o le alofa mutimutivale ma le tali-tiga o le Alii, o lea na ou manatu ai o le a ia alofa mutimutivale mai ia te i latou, ina ia toe avea i latou ma ni tagata amiotonu.

13 Ae faauta, sa lē aoga lo’u nei olioli, ona o lo latou faanoanoa sa le tupu mai i le salamo, ona o le agalelei o le Atua; ae o se faanoanoa o tagata tausalaina, ona e le tuua pea i latou e le Alii i taimi uma ia latou fiafia i le agasala.

14 Ma sa latou le o mai ia Iesu ma le loto momomo ma le agaga salamo, ae sa latou fetu’u i le Atua, ma mananao ina ia feoti. Ae ui i lea o le a latou tau ma le pelu mo o latou ola.

15 Ma sa oo ina faapea ona toe oo mai lo’u faanoanoa ia te au, ma sa ou vaai ua mavae atu le aso o le alofa tunoa mai ia te i latou, faaletino ma faaleagaga; ona sa ou vaai i afe o i latou ua taia i lalo ona o le fouvale faaaliali e faasaga i lo latou Atua, ma ua faaputu e pei o otaota o manu i luga o le laueleele. Ma ua faapea ona mavae atu le tolu selau fasefulu ma le fa o tausaga.

16 Ma sa oo i le tausaga e tolu selau fasefulu ma le lima, sa amata ona sosola ese o sa Nifaē mai luma o sa Lamanā; ma sa tuliloaina i latou seia oo ina latou o mai i le laueleele o Iasona, faatoa mafai ai ona taofi i latou mai la latou solaaga.

17 Ma o lenei, o le aai o Iasona sa latalata ane i le laueleele lea sa teu ai e Amorona talafaamaumau mo le Alii, ina ia le faaleagaina. Ma faauta sa ou alu atu e tusa ma le upu a Amorona, ma ave papatusi a Nifae, ma ou faia se talafaamaumau e tusa ma upu a Amorona.

18 Ma o luga o papatusi a Nifae na ou faia ai se tala atoa o le amioleaga ma mea inosia uma; ae o luga o papatusi nei sa ou le faia ai se tala atoa o lo latou amioleaga ma mea inosia, aua faauta, sa i luma o o’u mata talu mai le taimi na mafai ai ona ou vaai i ala o le tagata, se vaaiga faaauau pea o le amioleaga ma mea inosia.

19 Ma auoi, ita e, ona o lo latou amioleaga; ona ua tumu lo’u loto i le faanoanoa, i o’u aso uma, ona o lo latou amioleaga; ae ui i lea, ua ou iloa o le a siitia a’e a’u i luga i le aso gataaga.

20 Ma sa oo ina toe sailia ma tulia tagata o Nifae i le tausaga lenei. Ma sa oo ina tutulia i matou seia oo ina matou oo mai i le laueleele i matu sa ta’ua o Semu.

21 Ma sa oo ina matou tu’iolo aai o Semu, ma sa matou faapotopotoina o matou tagata i le tele sa mafai ona faia ai, ina atonu e mafai ai ona matou faasaoina i latou mai le faaumatiaina.

22 Ma sa oo i le tausaga e tolu selau fasefulu ma le ono, sa amata ona latou toe osofa’ia i matou.

23 Ma sa oo ina ou tautala atu i o’u tagata, ma uunai atu ia te i latou ma le malosi tele, ia latou tutulai atu ma le totoa i luma o sa Lamanā ma tau mo a latou avā, ma a latou fanau, ma o latou fale, ma o latou aiga.

24 Ma sa faaosoina i latou i le malosi lava i a’u upu, sa oo ina latou le sosola mai luma o sa Lamanā, ae sa tutulai atu ma le totoa e faasaga ia te i latou.

25 Ma sa oo ina matou tau ma se autau e tolusefulu afe e faasaga i se autau e limasefulu afe. Ma sa oo ina matou tutulai atu i o latou luma ma le mausali tele ma sa oo ina latou sosola ese mai o matou luma.

26 Ma sa oo ina ua latou sosola, sa matou tuliloa i latou faatasi ma a matou autau, ma matou toe fetaiai ma i latou, ma faatoilalo i latou; ae ui i lea sa le faatasi le malosi o le Alii ma i matou; ioe, sa tuua i matou ia i matou lava, sa lei mafuta le Agaga o le Alii ia te i matou; o lea na matou vaivai ai e pei o o matou uso.

27 Ma sa faanoanoa lo’u loto ona o lenei malaia tele o lo’u nuu, ona o lo latou amioleaga ma a latou mea inosia. Ae faauta, sa matou o atu e faasaga ia sa Lamanā ma le au faomea a Katianetona, seia oo ina matou toe maua laueleele o o matou tofi.

28 Ma ua mavae atu le tausaga e tolu selau fasefulu ma le iva. Ma i le tausaga e tolu selau ma le limasefulu, na matou osia ai se feagaiga ma sa Lamanā ma le aufaomea a Katianetona, lea na matou vaevaeina ai laueleele o o matou tofi.

29 Ma sa tuu mai e sa Lamanā ia te i matou le laueleele i matu, ioe, e oo atu lava i le ala lauitiiti lea e tau atu i le laueleele i saute. Ma sa matou tuu atu ia sa Lamanā le laueleele atoa i saute.