1 Ma sa oo ina ou alu atu i totonu o tagata sa Nifaē, ma sa ou salamo i le tautoga na ou faia ou te le toe fesoasoani ia te i latou; ma sa latou toe tuu mai ia te au le pulega o a latou autau, ona sa latou vaai mai ia te au e peiseai e mafai ona ou laveaiina i latou mai i o latou puapuaga.

2 Ae faauta, sa aunoa au ma se faamoemoe, aua sa ou iloa faamasinoga ia a le Alii o le a oo mai i luga ia te i latou; ona sa latou le salamo ia latou amioletonu, ae sa latou tau mo o latou ola e aunoa ma le valaau atu i le Atua lena o le na faia i latou.

3 Ma sa oo ina o mai sa Lamanā e faasaga mai ia te i matou ina ua matou sosola atu i le aai o Ioritana; ae faauta, sa tutulia i latou i tua sa latou le avea ai le aai i le taimi lena.

4 Ma sa oo ina latou toe o mai e faasaga mai ia te i matou, ma sa matou pulea le aai. Ma sa i ai foi isi aai sa pulea e sa Nifaē, o pa malu puipuia ia na puipuia mai ai i latou, sa le mafai ai ona latou o atu i le laufanua lea sa i o matou luma, e faaumatia tagata o lo matou laueleele.

5 Ae sa oo ina o soo se laueleele na matou ui atu ai, ma sa lei faapotopotoina faatasi o latou tagata, sa faaumatia e sa Lamanā, ma o o latou faoa aai, ma nuu, ma aai sa susunuina i le afi; ma sa faapea ona mavae atu o le tolu selau fitusefulu ma le iva o tausaga.

6 Ma sa oo i le tausaga e tolu selau ma le valusefulu, sa toe o mai ai sa Lamanā e faasagatau mai ia te i matou, ma sa matou tetee atu i te i latou ma le lotoa; peitai sa lē aoga uma lava, ona sa matuā toatele lava lo latou aofai sa oo ina latou soli i lalo o o latou vae ia tagata sa Nifaē.

7 Ma sa oo ina matou toe sosola, ma o i latou o e na televavave atu la latou solaaga nai lo sa Lamanā sa sosola ese, ae o i latou o e sa le televavave atu la latou solaaga nai lo sa Lamanā sa ave ifo i lalo ma faaumatiaina.

8 Ma o lenei faauta, o a’u, o Mamona, ou te le manao e atuatuvale agaga o tagata i le lafoaiina atu i o latou luma o se vaaiga matautia o le totomasaa ma le soifua maumau e pei ona folasia i luma o o’u mata; ae o a’u, i lo’u iloa o nei mea e ao lava ona faaalia, ma o mea uma ua natia o le a faaalia lava i luga o tumutumu o fale—

9 Ma e ao foi ona oo atu se malamalama e uiga i nei mea i le vaega o totoe o nei tagata, ma i Nuuese foi, o e na fetalai mai le Alii o le a faataapeapeina lenei nuu, ma o le a faitauina nei tagata o ni meanoa i totonu o i latou—o lea ou te tusia ai se otootoga laitiiti, ma ou le sopo e tuuina atu se tala atoa o mea na ou vaaia, ona o le poloaiga lea na ou mauaina, ma ina ia le oo foi ia te outou le faanoanoa tele ona o le amioleaga o lenei nuu.

10 Ma o lenei faauta, o le mea lenei ou te tautala atu ai ia latou fanau, ma Nuuese foi o e o le a i ai le tausiga o le aiga o Isaraelu, o e e malamalama ma iloa le mea e sau ai o latou faamanuiaga.

11 Aua ua ou iloa o tagata faapena o le a faanoanoa i le malaia o le aiga o Isaraelu; ioe, o le a latou faanoanoa mo le faaumatiaga o lenei nuu; o le a latou faanoanoa ona sa le salamo lenei nuu semanu po ua mafai ai ona fusia i latou i aao o Iesu.

12 O lenei ua tusia nei mea i le vaega o totoe o le aiga o Iakopo; ma ua tusia nei mea i lenei ala, ona ua silafia e le Atua o le amioleaga o le a le aumaia i latou ia te i latou; ae ia natia mau i latou mo le Alii ina ia oo mai i latou i lona lava taimi e tatau ai.

13 Ma o le poloaiga lenei na ou mauaina; faauta foi, o le a oo mai ia mea e tusa ma le poloaiga a le Alii, pe a silafia e ia i lona poto, ua tatau ai.

14 Faauta foi, o le a oo atu nei mea i e e le talitonu o tagata Iutaia; ma o le faamoemoe lenei o le a latou o atu ai—ina ia mafai ona faatauanauina ai i latou o Iesu o le Keriso, o le Alo o le Atua soifua; ina ia mafai ona faataunuuina e le Tamā, e ala i lana Pele sili, lana fuafuaga sili ma faavavau, i le toefuataiina o tagata Iutaia, po o le aiga uma o Isaraelu, i le laueleele o lo latou tofi, lea na tuuina mai ia te i latou e le Alii lo latou Atua, mo le faataunuuina o lana feagaiga.

15 Ma ia mafai ai foi e fanau o lenei nuu ona talitonu atoatoa i lana talalelei, lea o le a oo atu ia te i latou mai Nuuese; ona o le a faataapeapeina lenei nuu, ma o le a avea ma ni tagata uliuli, eleelea, ma inosia, e sili atu i le faamatalaga o mea sa i ai i totonu o i matou, ioe, e oo lava i mea sa i ai i totonu o sa Lamanā; ma o le pogai o lenei mea ona o lo latou le talitonu ma le ifo i tupua.

16 Aua faauta, ua le toe finau le Agaga o le Alii i o latou tamā; ma ua latou aunoa ma Keriso ma le Atua i le lalolagi; ma ua fetulinai solo i latou e pei o aputi o saito i luma o le matagi.

17 Sa avea i latou muamua o ni tagata moomia, ma sa latou avea Keriso mo o latou leoleo mamoe; ioe, sa taitaiina lava i latou e le Atua le Tamā.

18 Ae i le taimi nei, faauta, ua ta’ita’i solo i latou e Satani, e pei o aputi o saito ua lelea i luma o le matagi, pe pei o se vaa ua felafoa’iina solo i luga o peau, ua aunoa ma se la po o se taula, pe ua aunoa foi ma se mea e mafai ona uli ai o ia; ma e pei lava ona i ai o ia, ua faapea lava i latou.

19 Faauta foi, ua taofia e le Alii o latou faamanuiaga, ia semanu latou te maua i le laueleele, mo Nuuese o e o le a mauaina le laueleele.

20 Ae faauta, o le a oo ina tutulia ma faataapeapeina i latou e Nuuese; ma pe a uma ona tutulia ma faataapeapeina i latou e Nuuese, faauta, ona manatua ai lea e le Alii le feagaiga lea na ia faia ma Aperaamo ma le aiga uma o Isaraelu.

21 Ma o le a manatua foi e le Alii tatalo a e amiotonu, ia sa tuuina atu ia te ia mo i latou.

22 Ma o lea, Outou Nuuese e, e mafai faapefea ona outou tutulai atu i luma o le mana o le Atua, vagana ai ua outou salamo ma liliu ese mai i o outou ala leaga?

23 Tou te le iloa ea ua outou i ai i aao o le Atua? Tou te le iloa ea ua ia te ia le mana uma, ma o lana poloai silisili e taataai faatasi ai le lalolagi e pei o se tusitaai?

24 O lea, ia outou salamo, ma faamaualalo outou lava i ona luma, nei afio mai o ia i le faamasinotonu e faasaga ia te outou—nei o atu i totonu ia te outou se vaega o totoe o le fanau a Iakopo e pei o se leona, ma saeia ninii outou, ma e leai se e laveaiina.