1 Ut kik’ulman naq laa’in xkohin sa’ xyanqeb’ laj Nefita, ut kinjal ink’a’uxl chirix li aatin kinxaqab’ chaq naq ink’a’ chik tintenq’aheb’; ut ke’xk’e wi’chik we xtaqlankil lix teepeb’ aj pleet, xb’aan naq kine’ril jo’ raj naq taaruuq teb’inkol chiru chaq lix ch’a’ajkilaleb’.

2 A’b’an k’ehomaq reetal, maak’a’ inyo’onihom, xb’aan naq kinnaw lix raqb’a-aatin li Qaawa’ li taachalq sa’ xb’eeneb’; xb’aan naq ink’a’ ke’xjal xk’a’uxl chirix lix maa’usilaleb’; ke’xyal ru b’an re xkolb’al lix yu’ameb’ chi ink’a’ neke’xpatz’ xk’ab’a’ li ani kiyo’ob’tesink chaq reheb’.

3 Ut kik’ulman naq eb’ laj Lamanita ke’chal sa’ qab’een chirix naq koo’eelelik toj sa’ li tenamit Jordan; a’b’an k’ehomaq reetal, ke’sutq’isiik chirixeb’, jo’kan naq ink’a’ ke’xchap li tenamit sa’ li kutan a’an.

4 Ut kik’ulman naq ke’chal wi’chik sa’ qab’een, ut kiqak’uula li qawankil sa’ xb’een li tenamit. Ut wankeb’ ajwi’ chik li tenamit li k’uulanb’il wankilal sa’ xb’eeneb’ xb’aaneb’ laj Nefita, ut rik’in li kawil na’ajej a’an, ramb’ileb’ ru re naq ink’a’ ke’ru chi nume’k sa’ li ch’och’ li wan chiqu, re xsachb’al li ani wankeb’ sa’ li qach’och’.

5 A’b’anan kik’ulman naq yalaq b’ar chi ch’och’ li ak koonume’ wi’, ut ink’a’ ke’ch’utub’aak li ani wankeb’ chi sa’, ke’sache’ xb’aaneb’ laj Lamanita, ut ke’k’ate’ lix tenamiteb’, ut lix k’aleb’aaleb’, ut lix ninqi tenamiteb’ rik’in xam; ut chi jo’kan kinume’ chaq oxib’ cient rik’in b’elelaju xkaak’al chihab’.

6 Ut kik’ulman naq sa’ li rox cient rik’in kaak’al chihab’ ke’chal wi’chik laj Lamanita sa’ qab’een re pleetik, ut kiqaxaqab’ qib’ chi kaw qach’ool chiruheb’, a’b’anan maak’a’ ki’ok wi’ chixjunil, xb’aan naq q’axal k’i rajlankileb’ jo’kan naq ke’xyeq’i lix tenamiteb’ laj Nefita rub’eleb’ li roq.

7 Ut kik’ulman naq koo’eelelik wi’chik, ut eb’ li ani seeb’ wi’chik reelelikeb’ chiruheb’ laj Lamanita ke’kole’, ut eb’ li ink’a’ ke’q’axok reheb’ laj Lamanita sa’ reelelikeb’ ke’mesuuk chaq ut ke’sache’.

8 Ut anajwan k’ehomaq reetal, laa’in, aj Moroni, ink’a’ nawaj xtawasinkil li raameb’ li winq rik’in xk’utb’al sa’ rilob’aaleb’ xkomon li xik’ob’aal kik’ ut kamsink-ib’ li kik’ojob’aak chiru li wilob’aal; a’b’an laa’in, rik’in naq ninnaw naq tento taak’ehe’q chi nawmanq chi yaal li k’a’aq re ru a’in, ut naq chixjunil li k’a’ru muqmu tento taak’utb’esimanq sa’ xb’eeneb’ chaq li kab’l—

9 Ut jo’kan ajwi’ naq tento taak’ehe’q chi nawmank li k’a’aq re ru a’in chiru li rela’ li tenamit a’in, ut chiruheb’ ajwi’ laj Gentil, li yeeb’il xb’aan li Qaawa’ naq te’jek’inq re li tenamit a’in, ut li tenamit a’in te’ile’q jo’ maak’a’eb’ ru sa’ xyanqeb’—jo’kan naq nintz’iib’a jun ch’ina k’osb’il esil, ut moko wan ta inch’ool xk’eeb’al chi tz’aqal resilal li k’a’aq re ru kiwil, xb’aan li taqlahom kink’ul, ut jo’kan ajwi’ re naq ink’a’ taanumtaaq xrahil eech’ool xb’aan xmaa’usilal li tenamit a’in.

10 Anajwan ut k’ehomaq reetal, a’in ninye reheb’ li riyajileb’, ut reheb’ ajwi’ laj Gentil li te’k’oxlanq re lix junkab’al laj Israel, li neke’xk’e reetal ut neke’xnaw b’ar nachal wi’ chaq li rosob’tesinkileb’.

11 Xb’aan naq ninnaw naq eb’ a’in te’raho’q xch’ool xb’aan xnimal li rahilal kixk’ul lix junkab’al laj Israel; relik chi yaal, te’raho’q xch’ool xb’aan xsachlijik li tenamit a’in; te’raho’q xch’ool naq li tenamit a’in ink’a’ ke’xjal xk’a’uxl re ke’ru raj chi q’aluuk sa’ ruq’ li Jesus.

12 Anajwan li k’a’aq re ru a’in tz’iib’anb’il choq’ re li rela’ lix junkab’al laj Jakob; ut tz’iib’anb’il chi jo’ka’in, xb’aan naq nawb’il xb’aan li Dios naq li maa’usilal ink’a’ taak’utuq re chiruheb’; ut taamuqe’q choq’ re li Qaawa’ re naq taak’utmanq chaq sa’ li kutan k’oxlanb’il xb’aan a’an.

13 Ut a’in li taqlahom li kink’ul; ut k’ehomaq reetal, taak’utmanq chaq jo’ chanru lix taqlahom li Qaawa’, naq tixk’oxla a’an naq us, rik’in xchaab’ilal xna’leb’.

14 Ut k’ehomaq reetal, taaxik rik’ineb’ lix komoneb’ laj Judio li ink’a’ neke’paab’an; ut choq’ re li ajom a’in taaxik—re taaruuq te’q’unb’esiiq xch’ool naq li Jesus a’an li Kristo, li Ralal li yo’yookil Dios; re naq li Yuwa’b’ej taaruuq tixk’e chi uxmaank, rik’in li q’axal Raaro xb’aan, lix nimal ru ut junelikil rajom, sa’ xk’ojob’ankileb’ wi’chik laj Judio, malaj chixjunil lix junkab’al laj Israel, sa’ xch’och’il li reechanihomeb’, li kixk’e reheb’ li Qaawa’ lix Dios, choq’ re xtz’aqob’resinkil ru lix sumwank;

15 Ut jo’kan ajwi’ re naq li riyajil li tenamit a’in q’axal chik naq te’xpaab’ lix evangelio, li taaxik rik’ineb’ chi chalenaq chaq rik’ineb’ laj Gentil; xb’aan naq li tenamit a’in te’jek’imanq, ut te’ok choq’ jun tenamit q’ojyin ru, ut tz’aj ru, ut yib’ob’aal ru, chi numtajenaq wi’chik chiru li yeeb’il naq wanjenaq chaq jun sutaq sa’ qayanq; relik chi yaal, chiru li wanjenaq ajwi’ chaq sa’ xyanqeb’ laj Lamanita, ut a’in xb’aan naq maak’a’eb’ xpaab’aal ut neke’loq’onin pak’b’il dios.

16 Xb’aan naq k’ehomaq reetal, lix Musiq’ li Qaawa’ ak xkanab’ xyalb’al xq’e rik’ineb’ lix yuwa’eb’; ut wankeb’ chi maak’a’eb’ xKristo ut xDios sa’ li ruchich’och’, ut k’amb’ileb’ jo’ xmulel q’olom chiru li iq’.

17 Ke’wan chaq jun sut choq’ jun tenamit sa rilb’al, ut kiwan li Kristo choq’ aj ilol karneer chiruheb’; relik chi yaal, ke’b’eresiik xb’aan ajwi’ li Dios Yuwa’b’ej.

18 A’b’an anajwan k’ehomaq reetal, b’eresinb’ileb’ yalaq b’ar xb’aan laj Satanas, jo’ chanru nak’ame’ lix mulel q’olom chiru li iq’, malaj jo’ chanru naqujleek jun jukub’ chiru xb’oolam li palaw, chi maak’a’ xk’amleb’ xt’ikr chi moko xaqleb’, malaj chi maak’a’ k’a’ru taab’eresiiq wi’, ut jo’ chanru naq wan a’an, jo’kan ajwi’ wankeb’.

19 Ut k’ehomaq reetal, li Qaawa’ kixk’uula li rosob’tesinkileb’ a’an, li ke’ru raj chixk’ulb’al sa’ li ch’och’, choq’ reheb’ laj Gentil li te’eechaninq re li ch’och’.

20 A’ut k’ehomaq reetal, taak’ulmanq naq te’alinasiiq ut te’jek’iiq xb’aaneb’ laj Gentil; ut chirix naq alinasinb’ileb’ ut jek’inb’ileb’ xb’aaneb’ laj Gentil, k’ehomaq reetal, chirix a’an li Qaawa’ taajultiko’q re li sumwank li kixk’uub’ choq’ re laj Abraham ut choq’ re chixjunil lix junkab’al laj Israel.

21 Ut jo’kan ajwi’, li Qaawa’ taajultiko’q re lix tijeb’ li tiikeb’ xch’ool, li ke’taqsiik chaq re a’an choq’ reheb’.

22 Ut chirix a’an, ex aj Gentil, chan tab’i’ ru naru texxaqliiq chiru lix wankil li Dios, wi ink’a’ nekejal eek’a’uxl ut nekex’el chaq sa’ lee maa’us aj b’e?

23 Ma ink’a’ tab’i’ nekenaw naq wankex sa’ ruq’ li Dios? Ma ink’a’ tab’i’ nekenaw naq a’an wan chixjunil xwankilal, ut rik’in xnimal ru lix taqlahom taab’olob’aaq li ruchich’och’ chanchan jun b’otb’ookil hu?

24 Jo’kan ut, jalomaq eek’a’uxl, ut tuulanob’resihomaq eerib’ chiru, maare anchal taachalq a’an rik’in raqb’a-aatin sa’ eeb’een—maare anchal jun rela’ li riyajil laj Jakob taaxik sa’ eeyanq jo’ jun kaqkojl, ut texxpeji, ut maajun wan re kolok.