1 Dóó kʼad éí shidineʼé, Nephi bidineʼé, ałtso naaztseedígíí ałtso baa nahodeeshnih. Áádóó Laman bidineʼé éí bidááh niikai.

2 Dóó shí, Mormon, éí Laman bidineʼé binaatʼáanii bichʼįʼ iʼiishłaa, kóbidishníigo ńléí kéyah Cumorahjįʼ nihidineʼé bił áłah ádííʼnííł, Cumorah wolyéego dah yiskʼidę́ę́ʼ bíighahjįʼ, áadi índa daʼahidiigą́ą́ł.

3 Áádóó Laman bidineʼé binaatʼáanii éí bííníshkeedę́ę lą́ shidííniid.

4 Áádóó kéyah Cumorahgóó niiʼná, dóó áadi Cumorah dah yiskʼid binaagóó nihiníbaal ndahsiiʼnil; dóó ákweʼé kéyah bikáaʼgi tooh tʼóó ahayóí danaazyį́h, dańlíní, dóó hadaazlį́; dóó kweʼé éí Laman bidineʼé bikʼeh dadidiidleeł daniidzį́į́ʼ.

5 Dóó táadi neeznádiin dóó baʼaan tseebídiin dóó baʼaan dį́į́ʼ ałtso nááhaigo, nihidineʼé tʼah daadziihígíí ałtso áłah ádeiilyaa ńléí Cumorahjįʼ.

6 Áádóó nihidineʼé ałtso tʼáá łáháíjí kéyah Cumorahjįʼ áłah ádeiilyaago, jó shí, Mormon, éí hashiʼniitih; dóó díí éí tsʼídá nihichʼįʼ ndahwiiʼnáa dooleełgo shił bééhózin, dóó Bóhólníihii éí kóshidííniid díí nihizhéʼé baa haneʼ, diyingo hadilyaaígíí, éí Laman bidineʼé doo bílákʼedooltsʼił da, (háálá Laman bidineʼé éí ałtso deidoołchǫǫł) éí bąą díí éí Nephi bi béésh tʼą́hí haneʼ bikááʼ sinilę́ę łaʼ bikááʼ haneʼ íishłaa, dóó tʼáá ałtso haneʼ Bóhólníihii yee shaa joozlíʼígíí éí ńléí Cumorah dah yiskʼidę́ęʼdi ńdéłʼį́į́ʼ, tʼáá hazhóʼó béésh tʼą́hí tʼáá díkwíhígo éí shiyeʼ Moroni baa nínil.

7 Áádóó shidineʼé, beʼesdzáán danilínígíí dóó badaʼáłchíní bił, éí kʼad Laman bidineʼé ndaabaahígíí éí bichʼįʼ yinéełgo dayiiłtsą́; dóó diné bąąhági átʼéii yaa naakaiígíí biyid biyiʼdi anoonééł yéédaadzidígi átʼáo, éí yibaʼ naháaztą́ą́ ńtʼę́ę́ʼ.

8 Áádóó nihaatiih yíkai, dóó atsʼíís dóó ayiʼsizíinii tʼáá átʼé ndajisdzííd háálá áájí tʼóó ahayóígíí biniinaa.

9 Áádóó shidineʼé yił daʼahiʼniigą́ą́ʼ bééshhał, dóó ałtį́į́ʼ, dóó kʼaaʼ, dóó tsénił, dóó tʼáá haʼátʼííshį́į́ bee daʼahijigáanii.

10 Áádóó shidiné bił ndaashbaaʼą́ą tsʼídá tʼóó ahayóí ndabiʼdistseed, aooʼ, azhą́ neeznáadi mííl yázhí bił naashkai yę́ę ndi, dóó shídóʼ tsʼídá atídashiilaago bitah naaʼíítłizh; dóó tʼóó shíighahgóó chʼíheeskai áko tʼáadoo dashiisxį́į da.

11 Dóó nihikʼi chʼékaigo dóó shidineʼé yę́ę ałtso ndeistseed tʼáá hazhóʼó naadiin dį́įʼgo tʼéiyá chʼéédzííʼ, (Moroni shiyeʼdóʼ yidzíʼí) dóó nihí tʼéiyá nihidineʼé yę́ę bitahdóó deidzíʼígíí, éí biiskání, Cumorah bílátahdóó, dadíitʼį́į́ʼ, Laman bidineʼé ńléí dabiiskánę́ęgóó anáákaigo, neeznáadi mííl yázhígo dah yishʼishę́ę, éí ałtso ndaaztseedgo deiiltsą́.

12 Dóó shiyeʼ Moroni shidineʼé neeznáadi mííl yázhígo dah yooʼishę́ę ałdóʼ deiiltsą́.

13 Jó áádóó, Gidgiddonah neeznáadi mííl yázhígo neiʼeeshę́ę, dóó bídóʼ, ałtso ndabiʼdistseed.

14 Dóó Lamah dóó neeznáadi mííl yázhígo diné dah yooʼishę́ę ałdóʼ yił neezná; dóó Gilgal dóó neeznáadi mííl yázhígo diné dah yooʼishę́ę ałdóʼ yił neezná; dóó Limhah dóó neeznáadi mííl yázhígo diné dah yooʼishę́ę éí ałdóʼ yił neezná; dóó Joneam dóó neeznáadi mííl yázhígo diné dah yooʼishę́ę éí ałdóʼ yił neezná; dóó Cumenihah, dóó Moronihah, dóó Antionum, dóó Shiblom, dóó Shem, dóó Josh, éí tʼáá ałtso neeznáadi mííl yázhígo diné ndeiʼeeshę́ę yił daneezná.

15 Áádóó nááná neeznáago ndaʼaʼeeshę́ę ałdóʼ béésh bee ndabiʼdistseed neeznáadi mííl yázhígo ndeiʼeeshę́ę bił, aooʼ, shidineʼé yę́ę ałtso ásdįįd, tʼáá hazhóʼó naadiin dį́įʼgo bił naashkai yę́ę tʼéiyá, dóó shádiʼááhjígo kéyah naaznilígo ałdóʼ łaʼ adahineezhchą́ą́ʼ, dóó łaʼ éí Laman bidineʼé yichʼiʼjí daazlį́į́ʼ, łahjįʼ éí ndaastseed; dóó éí bitsʼíís, dóó bitsʼin, dóó bidił niʼ bikáaʼgo nikidébéézh, tʼáá ndabistseedę́ęgo éí kéyah bikááʼgóó dadííłdzid, dóó łeezh ńdadoodleeł dóó binahasdzáán yichʼįʼ kóńdoolnííł.

16 Dóó tʼáá íiyisíí baa shitsʼíís dóó shiyiʼsizíinii yínííł niizį́į́ʼ, háálá shidineʼé ndabiʼdistseedígíí biniinaa, dóó yícha:

17 O diné yáʼátʼéehii danohłínę́ę, haʼátʼíísh éí biniiyé Bóhólníihii bóhońtʼiʼígíí bitsʼáhisoohkai! O diné yáʼátʼéehii danohłínę́ę, haash yitʼáo éí Jesus tʼáá nihichʼįʼ dah doolnih ndi yóó adadooʼą́!

18 Jó, díí tʼáadoo ádáádzaagóó éí doo dasinoonáa da ńtʼę́ę́ʼ. Jó ndi, nihí éí dasinooná, dóó íiyisíí éí nihaa yinííł nisin.

19 O, yáʼátʼéehii ayeʼ dóó yáʼátʼéehii atsiʼ danohłínę́ę, dóó azhéʼé dóó amá danohłínę́ę, ahastįįh dóó eʼesdzáán danohłínę́ę, yáʼátʼéehii danohłínę́ę, haash yitʼáo éí dasinooná!

20 Jó ndi, éí ałtso dasinooná, dóó yínííł nisinígíí éí doo nánihidooldléeł da.

21 Dóó doo éí tsʼídá náhodidooʼnaał da díí nihitsʼíís éí doo daatsaahii dadoohłeełjįʼ, dóó díí atsʼíís kʼad dabidiʼniiłdzidígíí éí tʼáadoo hodíínaʼí doo dadííłdzid da dooleeł; dóó índa Christ bibee ánihwiitʼaah bikááʼdahʼasdáhí éí bidááhdóó soozį́įgo, éí naanish óohłaaígíí éí binahjįʼ nihá nihodootʼááł; dóó yáʼátʼéehgo hinohnáá ńtʼę́ęʼgo, índa nihizhéʼé danilínę́ę bił nihikʼidahojidoodliił.

22 O dooládóʼ tʼah doo atídanihiʼdilnééhdą́ą́ʼ niheʼiinaʼ łahgo áńdadoohdlííł ńtʼę́ę́ʼ. Jó ndi, éí ahisoohkai, dóó aTaaʼ, aooʼ, éí yáʼąąshdi Hoolʼáágóó aTaaʼ hólóonii, éí ádaoohłaaígíí bił bééhózin; dóó beʼajoobaʼ dóó bitʼáá ákogi átʼáo ánihwiitʼaah yinahjįʼ nihá nihodooʼááł.