1 Jó shí, Moroni, éí shizhéʼé, Mormon, baa haneʼę́ę ałtso íishłaa. Jó, shí éí tʼáá áłchʼį́į́dígo tʼéiyá nááhásóóh, éí éí shizhéʼé bikááʼ ádíílííł shidííniidę́ę tʼéiyá.

2 Áádóó kʼad tʼóó báhádzidgo Cumorahdi daʼahijoogą́ą́ʼ dóó bikʼijįʼ, jó, Nephi bidineʼé shádiʼáájígo adahineezhchą́ʼą́ą éí Laman bidineʼé hadabinitáago, ałtso ndabistseedjįʼ.

3 Dóó shizhéʼé ałdóʼ dayiisxį́, dóó tʼáá sáhí éí naasháago díí shidineʼé ałtso ásdįįdę́ę nááhásóóh. Jó ndi, éí ałtso ásdįįd, dóó shizhéʼé áshidííniidę́ę ałtso íishłaa. Dóó dashidiyoołhééł daatsʼí éí, doo shił bééhózin da.

4 Éí bąą nʼdeesoh dóó nahasdzáán biyiʼ ńdideeshʼį́į́ł; dóó háajigo deesháłígíí éí doo baa ntséskees da.

5 Jó, shizhéʼé éí díí haneʼ áyiilaa, dóó íinízinígíí éí yiiʼ nááyíizo. Jó áádóó, shídóʼ éí biniiyé nááhídéesoh nisin ndi béésh tʼą́hí bikááʼ haneʼígíí, éí doo bikááʼ hazʼą́ą́góó biniinaa, doo ádeeshłíił da; dóó tsé béésh tʼą́hí bitsʼą́ą́dóó álʼínígíí éí shee ádin, háálá tʼáá sáhí éí naashá. Shizhéʼé éí daʼahijoogą́ąʼgo biʼdiisxį́, dóó tʼáá ałtso shikʼéí, dóó áhánígo bił ahéédahasinę́ę ádaadin doodago háajigo deesháłígíí éí doo shił bééhózin da; dóó haashį́į́ nízahjįʼ Bóhólníihii hinishnáa dooleełígíí yee shá hoołʼaʼígíí éí doo shił bééhózin da.

6 Jó, dį́įʼdi neeznádiin éí ałtso nááhai nihiBóhólníihii dóó Yisdáʼiiníiłii níyáhą́ądą́ą́ʼ dóó wóshdę́ę́ʼ.

7 Jó áádóó, Laman bidineʼé éí shidineʼé, Nephi bidineʼé, tʼáá ałtso, kindaatahgóó, dóó háajilá, hadeinitáago, tsʼídá ałtso ásdįįdjįʼ ndi; dóó ayóo adadaatłizh; aooʼ, ayóó átʼáo shidineʼé, Nephi bidineʼé, ndabiʼdistseed.

8 Jó áádóó, díí éí Bóhólníihii bílaʼ bikʼehgo áhóótʼįįd. Jó áádóó Laman bidineʼé ałdóʼ tʼáá bí ałkʼiijééʼ; dóó díí kéyah tʼáá ałtso bikááʼgóó diné ndaʼahiltseedgo hahoolzhiizh; doo díí daʼahijigą́ ndootʼihígíí éí doo bił bééhózin da.

9 Jó, dóó kʼad, éí doo baa yánáádeeshtih da dooleeł, háálá kéyah bikááʼgóó éí Laman bidineʼé dóó daʼniʼįįhii tʼéiyá hólǫ́.

10 Dóó tʼáá háiida Diyin God tʼáá aaníí hináago dayoodlánígíí éí ádin tʼáá hazhóʼó Jesus yikééʼ naazínę́ę tʼéiyá, háálá éí éiyá tʼáá íiyisíí diné bąąhági átʼéii yaa ńdiikaijįʼ yitahgóó ndaakai ńtʼę́ę́ʼ áko Bóhólníihii nahjįʼ ayíínil; dóó tʼahdii daatsʼí kéyah yikááʼ naakaiígíí éí tʼáá háiida doo bił bééhóziní da.

11 Jó ndi, shizhéʼé dóó shí éí yiiltsą́, dóó nanihineeztą́ą́ʼ dóó nihikʼijisdliʼ.

12 Dóó tʼáá háiida díí haneʼ beítʼą́ągo, dóó doo niʼiilzííh biiʼ hólónígíí biniinaa dóó tʼáá ádzaagóó yá haadzíʼígíí, éí diné náásgóó ayóó átʼéii ádahodooníłígíí ałdóʼ bił bééhodoozįįł. Jó, shí éí Moroni áshtʼį́; dóó bíighahgo, éí tʼáá ałtsoní nihił ííshją́ą́ ádeeshłííł ńtʼééʼ.

13 Jó, éí tʼáá ákótʼéhégo díí diné baa hodeeshnih. Shí éí Mormon biyeʼ nishłį́, dóó shizhéʼé éí Nephi yitsʼą́ą́dóó hazlį́į́ʼ.

14 Dóó shí éí tʼáá éí diné díí haneʼ Bóhólníihii bichʼįʼ ńdéłʼį́ʼę́ę áshtʼį́; díí béésh tʼą́hí éí doo bą́ą́h ílíní da, háálá Bóhólníihii ádííniidígíí biniinaa. Háálá tʼáá aaníí ádííniid tʼáá háiida éí doo yee ńdiʼdoodléeł da; ndi haneʼ biiʼígíí éí tsʼídá ayóó ílį́; dóó tʼáá háiida hootʼį́įjįʼ chʼíiníʼánígíí, éí Bóhólníihii bikʼihojidoodliił.

15 Háálá tʼáá háiida éí doo yikʼidínóotʼáał da tʼáá hazhóʼó Diyin God beiníʼą́ągo tʼéiyá; háálá éí diné Diyin God binaanishígíí tʼéiyá yaa ntsékeesgo aláahdi baa haʼniih; éí doodago ałkʼidą́ą́ʼ dineʼé dóó taooskai yę́ę, Bóhólníihii yił ałhadaʼdeestʼánę́ę yaa ntsékeesgo ałdóʼ tʼéiyá yił ííshjání íidoolííł.

16 Dóó tʼáá háiida díí ííshją́ą́ íidoolíiłgo éí bikʼihojidoodliił; háálá Diyin God bizaad áníigo, éí díí chahałheeł biyiʼdóó dóó ńléí adinídíín biyiʼjįʼ hadootʼááł; aooʼ, tʼáá aaníí nahasdzáán biyiʼdę́ę́ʼ hadootʼááł, dóó chahałheełdę́ę́ʼ bee idiʼdooldlał, dóó diné bił béédahodoozįįł; dóó díí éí Diyin God bibee adziilii binahjįʼ ákódoonííł.

17 Dóó niʼiisdzíiʼgo éí diné átʼį́į dooleeł. Jó ndi, nihí nihił béédahózingo éí niʼiisdzíʼígíí biyiʼ ádin; ákótʼée ndi Diyin God éí tʼáá ałtsoní bił bééhózin; éí bąą, díí haneʼ bikʼijįʼ yájíłtiʼígíí éí tʼáá ádaa áhojilyą́ą doo háálá éí chʼį́įdiitah hodookʼą́ą́ł wolyéii éí tʼáá áhánígi nahojíleʼ doo.

18 Dóó tʼáá háiida kónínígíí: Shił ííshją́ą́ óhłééh, éí doodago atínihideeshłííł—éí hazhóʼó ádaa ákoznidzin dooleeł háálá éí Bóhólníihii dooda nínę́ę éí yee hadoodzih ńtʼę́ę́ʼ.

19 Jó háálá, tʼáá háiida tʼáadoo hazhóʼó baa ntsáhákeesí á nahaʼáhígíí éí ałdóʼ tʼáadoo hazhóʼó baa ntsáhákeesí bá nihodootʼááł; háálá naanish áyiilaaígíí éí binahjįʼ bichʼįʼ nʼdoolyééł; éí bąą, tʼáá háiida atíʼáłʼínígíí éí Bóhólníihii ałdóʼ atíbidoolííł.

20 Jó Diyin God bizaad éí ání—diné éí doo atíʼáłʼį́į da dooleeł, doo ndóʼ ánihwiiʼaah da; háálá Bóhólníihii áníigo éí, ánihwiitʼaah éí shí lá, dóó kʼéédidooʼníłígíí ałdóʼ shí, dóó shí éí kʼéédideeshʼnííł.

21 Dóó tʼáá háiida Bóhólníihii binaanish bikʼee há háchįʼgo dóó bikʼijįʼ yájíłtiʼgo, dóó Bóhólníihii bidineʼé yił ałhaʼdeetʼánę́ę da éí éí Israel bighandóó danilínígíí, kódajiníigo: Bóhólníihii binaanish éí dadiilchxǫǫł, dóó Bóhólníihii éí Israel bighandóó danilíinii yił ałhaʼdeetʼánę́ę doo yénálniih da dooleeł—éí áko jinínígíí éí Diyin God bidineʼé bitahdóó nahjįʼ hodookʼą́ąłjįʼ kóhodiʼdoolnííł;

22 Háálá Bóhólníihii hoolʼáágóó bohootʼáłígíí éí tʼáá náás yiltsʼił dooleeł, ńléí yee nihoníʼą́ ałtso bidaʼalyaajįʼ.

23 Isaiah náásgóó ádahodoonííł níigo yaa halneʼę́ę éí deínóhłtaʼ. Jó shí bikááʼ ádeeshłíłígíí éí doo bihónéedzą́ą da. Aooʼ, jó shí éí ánihidishní, tʼáá ałtso diné Jesus yá naazínę́ę shilą́ąjįʼ aheeskai yę́ę, dóó díí kéyah yikááʼ kéédahatʼínę́ę, aooʼ, éí łeezh biyiʼdóó Bóhólníihii yichʼįʼ daacha dooleeł; dóó Bóhólníihii hinánígíí éí yił ałhadaʼdeestʼánę́ę éí yéédoolnih.

24 Dóó éí bikʼisóó yá sodadoolzinę́ę bił bééhózin. Dóó éí éí bidaʼoodląʼ bił bééhózin, háálá bízhiʼ binahjįʼ éí dził nahgóó kódeiléehgo yídaneelʼą́; dóó éí bízhiʼ binahjįʼ nahasdzáán ndeidiyoołʼnáałgo yídaneelʼą́; dóó bizaad bibee adziilígíí binahjįʼ éí awáalyaa niʼjįʼ ndahaasdááz; aooʼ, kǫʼ dookʼą́łígíí ndi doo atídabiiłʼį́į da, dóó naaldlooshii daʼałchinii doodago naʼashǫʼii ndaʼałtseedígíí ałdóʼ doo baa áńdaatʼį́į da, háálá bizaad ayóó bidziilígíí biniinaa.

25 Jó áádóó, Bóhólníihii náasdi díí haneʼ yichʼįʼ kwíidoołíłígíí ałdóʼ yá sodadilzin.

26 Dóó doo ádahodooníił da tʼáadoo dadohníní, háálá éí tʼáá aaníí ádahodoonííł, Bóhólníihii bílaʼ yee yiʼdoolííł, háálá Bóhólníihii yee haadzííʼ; nahasdzáán biyiʼdę́ę́ʼ, doo éí háiida niʼíidoolíił da; áadi yoołkáałgo baa hodoolzhish álílee ádin haʼníi doo; dóó éí andahaskai yę́ę yádaałtiʼ nahalingo éí áhodoonííł.

27 Dóó áadi yoołkáałgo baa hodoolzhish Diyin God yá naazínę́ę bidił dadeesnaʼąą Bóhólníihii yichʼįʼ sodadilzin doo, háálá chahałheełjįʼ nanilʼingo naʼanishígíí hólǫ́ǫgo biniinaa.

28 Aooʼ, áadi yoołkáałgo baa hodoolzhish Diyin God bibee adziilii doo dayoosdląądgóó, dóó sodizin bá hooghan ałtso tʼóó baaʼih daazlį́įʼgo dóó ádaa dahaʼniih daazlį́įʼgo; aooʼ, áadi yoołkáałgo ndi sodizin bá hooghan alą́ąjįʼ ndaazínígíí dóó yá ndaʼnitinígíí éí ádaa dahasnihgo, yił yah ańdaajahígíí da yidááh danilį́į dooleeł ndi.

29 Aooʼ, áadi yoołkáałgo baa hodoolzhish ndahodiiltłʼiʼ haʼníigo baa dahaneʼ, dóó níyoltsoh ndaakai doo, dóó ayóó átʼáo łid danízaadgo kédaayah bikááʼgóó dahólǫ́ǫgo, éí áko ákódeitsʼaʼgo.

30 Dóó daʼahijigą́ haʼníi doo, ałkʼináájiijééʼ jiní haʼníi doo, dóó ałʼąą ádahootʼéégóó kéyah ndahaʼná dahaʼníigo ádahodoonííł.

31 Aooʼ, áadi yoołkáałgo baa hodoolzhish tʼáá ałtso kéyah bikááʼgóó níłchʼi dóó tó dóó kéyah da tʼóó bahooʼih dahólǫ́ǫ doo; dóó diné ndaʼałtseedii, dóó daʼniʼįįhii, dóó dabiyoochʼíidii, dóó bindaʼadloʼii, dóó diné dóó asdzání bee tsíʼnaʼadáh hólǫ́ǫ doo, dóó tsʼídá aláahdi joodláhí ałʼąą ádaatʼéhígíí baa naʼaldeeh dooleeł; tʼóó ahayóí kódaaní silį́įʼgo, Díí ánílééh, éí doodago éí ánílééh, doo éí átʼéhé da, háálá tʼáá háiida kónínígíí éí Bóhólníihii bá nihodooʼááł. Ndi yíi ákódaanínígíí, háálá éí doo yáʼáhóshǫ́ǫgi dóó bąąhági átʼéii dabótąʼ dooleeł.

32 Aooʼ, áadi yoołkáałgo baa hodoolzhish sodizin bá hooghan tʼóó ahayóí ałʼąą bee dah daʼíldééh silį́įʼgo éí, kódaaníi dooleeł: Wóshdę́ę́ʼ shaa hohkááh, dóó nihibéeso binahjįʼ bąąhági átʼéii baa naahkaiígíí nihá ndiʼdootʼááł.

33 O nihí diné bąąhági átʼéii dóó doo yáʼátʼéehii baa naahkaiígíí dóó doo nihiʼdadidzil da dasoolį́ʼígíí, haʼátʼíísh éí biniiyé sodizin bá hooghan achʼįʼ ádaoołyaago bee béeso ádaołʼį́? Haʼátʼíísh biniiyé Diyin God bizaadę́ę łahgo átʼáo ádaoohłaa, áko binahjįʼ doo dadínóhsééłgóó ádaʼdoołyaa? Jó, Diyin God bizaad ííshją́ą́ ííłʼínígíí éí danółʼį́; jó háálá, díí tʼáá ałtso baa dahodoolzhish doo bidaʼdoolnííł.

34 Jó, Bóhólníihii éí ląʼída naanish ayóó ádaatʼéhígíí tʼáadoo hodinaʼgo nihitahgóó ádahodooníiłgo, baa dahodoolzhishígíí dóó bidaʼdoolníłígíí, shił ííshją́ą́ áyiilaa.

35 Jó, shił dahonohłǫ́ nahalingo éí nihichʼįʼ yáshtiʼ, dóó ákondi doo éí kǫ́ǫ́ dahonohłǫ́ǫ da. Jó ndi, Jesus Christ éí ádanohtʼéhígíí shił ííshją́ą́ áyiilaa, dóó baa naahkaiígíí shił bééhózin.

36 Dóó ádaa dahohniihgo ndaahkaigo shił bééhózin; dóó tʼáá hazhóʼó tʼáá díkwíhí éí doo ádaa dahohniih da; áko ééʼ daʼílíinii biih nishoojééʼ, dóó daʼoołchʼį́į́d, dóó saad dahonohłǫ́, dóó aa ńdaahtʼį́, dóó átídaʼółʼį́, dóó bąąhági átʼéii éí baa naahkai; dóó nihisodizin bá hooghan bee dah deínóhkahígíí, aooʼ, éí tʼáá átʼé, tʼóó baaʼih daazlį́į́ʼ háálá ayóó nihijéí biyiʼ ádaa dahohniihgo biniinaa.

37 Jó áko, béeso, dóó nihinaalyeʼé, dóó niheʼééʼ daʼílínígíí, dóó nihisodizin bá hooghan daʼílíinii bee ndaachʼąąhígíí éí, diné baa dahojoobáʼí yę́ę dóó bee bichʼįʼ ańdahaztʼiʼę́ę, doo bitah dahatsʼídę́ę dóó tiʼdahooníhę́ę, biláahdi ayóí ádeiínóhʼní.

38 O nihí diné doo yáʼátʼéehii baa naahkaiígíí, dóó tʼóó ádahoʼdohłʼíinii, dóó ndaʼnohtinígíí, tʼáadoo leʼé nihí deidoołchǫǫłgo bichʼįʼ ahohkáahii, haʼátʼíísh éí biniiyé Diyin God bisodizin bá hooghan diyin yę́ę doo yáʼátʼéehii bee dasoołchxǫʼ? Haʼátʼíísh éí biniiyé Christ bízhiʼ ákʼidadidoohtʼáłígíí baa yá danohsin? Haʼátʼíísh éí biniinaa hoolʼáágóó ił hózhóonii éí hoolʼáágóó tiʼhooʼníhígíí doo biláahdi ílį́įgo éí doo baa ntsídaahkees da—háálá nihookááʼ dineʼé aa haʼniihígíí daatsʼí biniinaa?

39 Haʼátʼíísh éí biniiyé tʼáadoo leʼé iiná bitsʼą́ą́dóó ádinígíí éí ayóó ádeiínóhʼní, dóó ákondi bíniʼdii diné dichin danízinígíí, dóó bichʼįʼ ańdahaztʼiʼígíí, dóó beʼééʼ ádaadinígíí, dóó bitah dahoneezgaiígíí dóó tiʼdahooníhígíí nihíighahgóó chʼíńdaahkahgo, doo baa ákodanohsin da?

40 Aooʼ, haʼátʼíísh éí biniiyé tsʼídá aláahdi joodláhígíí ndanohłʼingo ádaołʼį́įgo bee daʼohtʼį́, dóó díí bąą asdzání bąąh ádahasdįįdii éí Bóhólníihii yidááhdóó daachago ádeiínóhsin, dóó ałdóʼ áłchíní bimá dóó bizhéʼé ádaadinígíí éí Bóhólníihii yidááhdóó daacha, dóó ałdóʼ dabizhéʼé yę́ę dóó dabihastiinę́ę éí nahadzáán biyiʼdę́ę́ʼ Bóhólníihii yichʼįʼ daacha, éí doo bee nihá ndiníʼą́ą da?

41 Jó, bééshhał bee kʼééhooldǫǫłii nihikʼi dasitą́; dóó tʼáadoo hodinaʼí éí Diyin God yá naazínę́ę, daneeznánę́ę bidił nihikʼijįʼ yá kʼééʼdoołdǫǫł, háálá doo éí náásgóó náádaacha da doo.