1 Ma o lenei, faauta, ou te fia tautala atu lava i le vaega o totoe o lenei nuu o e ua faasaoina, pe afai e faapea e tuu atu e le Atua ia te i latou a’u upu, ina ia mafai ona latou iloa mea e uiga i o latou tamā; ioe, ou te tautala atu ia te outou, outou le vaega o totoe o le aiga o Isaraelu; ma o upu nei ou te tautala atu ai:

2 Ia outou iloa o outou o le aiga o Isaraelu.

3 Ia outou iloa e ao ina outou salamo, a leai e le mafai ona faaolaina outou.

4 Ia outou iloa e ao ina outou tuu i lalo a outou auupega o taua, ma ia le toe fiafia i le faamasaaina o le toto, ma ia le toe avea i latou, vagana ua poloaiina ai outou e le Atua.

5 Ia outou iloa e ao ina outou malamalama e uiga i o outou tamā, ma salamo ia outou agasala uma ma amioletonu, ma talitonu ia Iesu Keriso, o ia o le Alo o le Atua, ma sa fasiotia o ia e tagata Iutaia, ma ua toetu mai o ia e ala i le mana o le Tama, o lea ua maua ai e ia le manumalo i le tuugamau; ma ua faaumatia ai foi ia te ia le tui o le oti.

6 Ma ua faataunuuina e ia le toetutu mai o e ua oti, o lea o le a faatuina a’e ai le tagata e tulai i luma o lona nofoa-faamasino.

7 Ma ua faataunuuina e ia le togiolaina o le lalolagi, lea o le a tuu atu ai ia te ia o le e maua e le ta’usalaina i ona luma i le aso faamasino, e mau i luma o le Atua i lona malo, e pese viiga le motusia faatasi ma aufaipese i luga, i le Tamā, ma i le Alo, ma i le Agaga Paia, o e o ni Atua ua tasi, i se tulaga o le fiafia lea ua leai se iuga.

8 O lea salamo, ma ia papatiso i le suafa o Iesu, ma opogi le talalelei a Keriso, lea o le a tuu atu i o outou luma, e le gata i lenei talafaamaumau, ae i le talafaamaumau foi lea o le a oo atu i Nuuese mai tagata Iutaia, o se talafaamaumau lea o le a sau mai Nuuese ia te outou.

9 Aua faauta, ua tusia lenei talafaamaumau mo le faamoemoe ia outou talitonu i lena; ma afai tou te talitonu i lena, o le a outou talitonu foi i lenei; ma afai tou te talitonu i lenei o le a outou iloa e uiga i o outou tamā, ma galuega ofoofogia foi ia na faia i le mana o le Atua i totonu o i latou.

10 Ma o le a outou iloa foi o outou o se vaega o totoe o le fanau a Iakopo; o lea ua faitauina ai outou i totonu o tagata o le feagaiga muamua; ma afai e faapea o le a outou talitonu ia Keriso, ma papatisoina, muamua i le vai, ona sosoo ai lea ma le afi ma le Agaga Paia, e mulimuli i le faataitaiga a lo tatou Faaola, e tusa ma mea ua ia poloaiina ai i tatou, o le a lelei lea ia te outou i le aso o le faamasinoga. Amene.