1 Luk mi, Moronae, mi finisim histri blong papa blong mi, Momon. Luk, mi mi gat be ol smol samting nomo blong raetem, we i ol samting ia we papa blong mi i bin givim oda long mi blong mekem.

2 Mo nao i bin hapen se, afta long bigfala mo strong faet long Kumora, luk, Ol Man blong Nifae we oli ronwe i go long kantri long Saot, Ol Man blong Leman oli lukaotem olgeta kasem taem we oli kilimded evriwan.

3 Mo olgeta oli kilimded papa blong mi tu, mo mi mi stap miwan nomo blong raetemdaon sore stori ia long saed blong ded blong ol pipol blong mi. Be luk, oli go finis, mo mi mi mekem komanmen blong papa blong mi i hapen. Mo sapos bae oli kilimded mi, hemia mi no save.

4 From hemia, bae mi raetemdaon mo haedem ol histri ia long graon; mo weaples mi go, hemia i nomata.

5 Luk, papa blong mi i bin mekem histri ia, mo hem i raetem plan blong samting ia. Mo luk, bae mi raetem samting ia tu sapos mi gat spes long ol buk, be mi mi no gat; mo mi mi nomo gat ol ston blong aean, from mi stap miwan nomo. Oli bin kilimded papa blong mi long faet, wetem evri famli blong mi, mo mi mi no gat ol fren o eni ples blong go; mo hamas taem bae Lod i letem se mi save stap laef, hemia mi no save.

6 Luk, fo handred yia i pas nao, afta we Lod mo Sevya blong yumi i bin kam.

7 Mo luk, Ol Man blong Leman oli lukaotem ol pipol blong mi, Ol Man blong Nifae, daon long wan bigtaon i go long narafala bigtaon, mo long wan ples i go long narafala ples, kasem taem we oli nomo gat; mo foldaon blong olgeta i bin bigwan; yes, ded blong ol pipol blong mi, Ol Man blong Nifae hem i wan ded we i bigfala mo man i no save andastanem.

8 Mo luk, i han blong Lod nao we i bin mekem samting ia. Mo luk tu, Ol Man blong Leman oli stap faet wan wetem narawan; mo ful fes blong graon ia i wan sekol we i no stap blong fasin blong kilim man i ded mo blad i ron; mo i no gat wan i save wetaem wo ia bae i finis.

9 Mo nao, luk, mi no talem moa long saed blong olgeta ia, from i no gat wan man moa be Ol Man blong Leman mo ol stilman we oli stap laef long fes blong graon.

10 Mo i no gat eniwan we i save tru God, be ol disaepol blong Jisas nomo, we oli stastap long graon kasem taem we fasin nogud blong ol pipol i bin bigwan tumas, we i mekem se Lod i no letem olgeta blong gohed blong stap wetem ol pipol; mo sapos oli stap long fes blong graon o no, hemia i no gat wan man i save.

11 Be luk, papa blong mi mo mi, i bin luk olgeta, mo oli givim seves long mitufala.

12 Mo huia we bae i kasem histri ia, mo bae hem i no toktok agensem samting ia from ol samting we oli no klia gud insaed long hem, mo hem ia bae i save ol samting we oli moa bigfala bitim hemia. Luk, mi mi Moronae, mo sapos i save hapen, bae mi talemaot evri samting, blong yufala i save.

13 Luk, mi mi mekem wan en blong toktok long saed blong ol pipol ia. Mi mi boe blong Momon, mo papa blong mi i bin wan we i kamaot long laen blong Nifae.

14 Mo mi mi semfala man ia we i stap haedem histri ia wetem Lod; ol buk blong hem oli no gat praes blong olgeta, from komanmen blong Lod. From i tru we hem i talem se i no gat wan we bae i holem olgeta blong kasem mane; be histri blong olgeta, praes blong hem i hae tumas; mo huia we bae i tekem histri i kam long laet, hem bae Lod i blesem.

15 From i no gat wan i save gat paoa blong tekem histri ia i kam long laet, sapos God i no givim long hem; from God i wantem se samting ia i mas hapen wetem wan ae we i lukluk nomo long glori blong hem, o long gudlaef blong ol olfala mo ol kavenan pipol blong Lod we oli bin seraot olbaot longtaem finis.

16 Mo hem we i tekem samting ia i kam long laet, bae i kasem blesing; from bae i tekem i aot long tudak i kam long laet, folem toktok blong God; yes, bae i tekemaot long graon, mo bae i stap long tudak i saen i go aot, mo i kam long save blong ol pipol; mo samting ia bae i hapen tru long paoa blong God.

17 Mo sapos i gat ol mistek, hem i ol mistek blong wan man. Be luk, mifala i no save wan mistek; be God i save evri samting; from hemia, hem we i tok agensem, hem i mas lukaot, from nogud bae hem i stap long denja blong faea blong hel.

18 Mo hem we i talem: “Soem long mi, o bae mi kilim yufala”—bae hem i mas lukaot, from nogud hem i givim oda long samting we Lod i blokem.

19 From luk, man ia we i jajem kwiktaem bae i kasem jajmen kwiktaem bakegen; from bae hem i kasem pei folem ol wok blong hem; from hemia, hem we i stap kilim man, bae Lod i kilim hem bakegen.

20 Luk wanem skripja i talem—man i no mas kilim, o i no mas jaj; from jajmen i blong mi, Lod i talem, mo fasin blong pembak i blong mi tu, mo bae mi pembak.

21 Mo hem we long kros blong hem, bae i tok agensem mo givim hadtaem agensem ol wok blong Lod, mo agensem kavenan pipol blong Lod we i laen blong Isrel, mo bae i talem: “Bae yumi smasem gud wok blong Lod, mo bae Lod bae i no tingbaot kavenan blong hem we hem i bin mekem wetem laen blong Isrel”—semfala man ia i stap long denja blong oli katemdaon hem mo sakem hem i go long faea;

22 From ol stamba tingting we oli no save finis blong Lod bae oli gohed blong rol i go, kasem taem we evri promes blong hem oli mas hapen.

23 Stadi ol profesi blong Aesea. Luk, mi no save raetemdaon olgeta. Yes, luk mi talem long yufala, se ol sent ia we oli bin go bifo mi, we oli bin holem graon ia, bae oli singaot, yes, mo tu, aot long das, bae oli singaot long Lod; mo olsem we Lod i stap laef, bae hem i tingbaot kavenan we hem i bin mekem wetem olgeta.

24 Mo hem i save ol prea blong olgeta, we oli blong helpem ol brata blong olgeta. Mo hem i save fet blong olgeta, from long nem blong hem, oli save muvumaot ol bigfala hil, mo long nem blong hem, oli save mekem graon i seksek; mo tru long paoa blong toktok blong hem, oli mekem ol kalabus oli foldaon long graon; yes, mo tu, faea blong oven i no bin save spolem olgeta, mo tu, ol wael animol o ol posen snek, from paoa blong toktok blong hem.

25 Mo luk, ol prea blong olgeta oli from hem we Lod bae i letem hem blong tekem ol samting ia oli kamaot.

26 Mo i no gat wan we i mas talem se ol samting ia bae oli no kam, from i tru we bae ol samting ia oli mas kam, from Lod i bin talem samting ia; from aot long graon bae oli kamaot tru long han blong Lod, mo i no gat wan we i save stopem samting ia; mo bae i kam long wan dei we bae oli talem se i nomo gat ol merikel; mo bae samting ia i kam olsem wan dedman i stap toktok.

27 Mo bae i kam long wan dei, we blad blong ol sent bae i singaot long Lod, from ol sikret grup mo ol wok blong tudak.

28 Yes, bae i kam long wan dei we, paoa blong God, bae ol pipol oli tanem baksaed long hem, mo ol jos oli nomo klin, mo oli kam hae long ol hae tingting blong hat blong olgeta; yes, hem i long wan dei we ol lida blong ol jos mo ol tija bae oli girap long hae tingting blong hat blong olgeta, go kasem we oli jalus long olgeta we oli blong ol jos blong olgeta.

29 Yes, bae i kam long wan dei we bae ol pipol oli harem long saed blong ol faea, mo ol hariken, mo ol hot stim blong smok long ol narafala graon;

30 Mo bae i gat tu ol pipol we oli harem long saed blong ol wo, ol toktok olbaot abaot ol wo, mo ol graon oli seksek long ol ples olbaot.

31 Yes, bae i kam long wan dei we bae i gat plante doti samting long fes blong wol; bae i gat ol fasin blong kilim man i ded, mo stil, mo giaman, mo ol trik, mo ol fasin blong slip olbaot, mo evri kaen fasin blong rabis sin; taem we bae i gat plante we bae oli talem, Mekem samting ia, o mekem narafala samting ia mo i nomata, from Lod bae i sapotem olgeta olsem long las dei. Be sore tumas long olgeta olsem, from oli stap long konkon rabis ples mo long ol rop blong rabis fasin.

32 Yes, bae i kam long wan dei, we bae i gat ol jos we oli bildimap we bae i talem: “Kam long mi mo from mane blong yufala, bae God i fogivim ol sin blong yufala.”

33 O yufala ol nogud mo rabis mo stronghed pipol, ?from wanem yufala i bin bildimap ol jos long yufala bakegen blong kasem mane? ?From wanem yufala i bin jenisim tabu toktok blong God, blong mekem se yufala i mekem sol blong yufala i kasem fasin blong no save kam antap samtaem? Luk, yufala i lukluk long ol revelesen blong God; from luk, taem ia bae i kam long dei ia, we evri samting ia oli mas hapen.

34 Luk, Lod i bin soem long mi, ol bigfala mo gudfala samting long saed blong wanem we i mas kam i no longtaem, long dei ia, taem we ol samting ia bae oli kamaot long medel blong yufala.

35 Luk, mi toktok long yufala olsem se yufala i stap long ples ia, be yufala i no stap yet. Be luk, Jisas Kraes i bin soem yufala long mi, mo mi save ol wok blong yufala.

36 Mo mi save se yufala i stap wokbaot long hae tingting blong hat blong yufala; mo i no gat wan, be wan smol namba nomo we i no leftemap olgeta antap long hae tingting blong hat blong olgeta, go kasem we oli werem ol klos we i naes tumas, go kasem jalus, mo ol rao, mo oli wantem blong smasem gud narafala man, mo gat fasin blong givim hadtaem, mo evri kaen rabis fasin; mo ol jos blong yufala, yes, evriwan, oli kam doti from hae tingting blong hat blong yufala.

37 From luk, yufala i lavem mane, mo ol samting blong yufala, mo ol naes klos blong yufala, mo blong flasem ol jos blong yufala, bitim we yufala i lavem olgeta we oli pua, mo we oli nidim samting, olgeta we oli sik mo olgeta we oli gat hadtaem.

38 O yufala ol doti, yufala ol man we i gat tufes, yufala ol tija, we i stap salem yufala bakegen from ol samting we bae i roten, ?from wanem yufala i mekem tabu jos ia blong God i doti? ?From wanem yufala i sem blong tekem long yufala nem blong Kraes? ?From wanem yufala i no ting se praes blong glad we i no gat en i moa bigwan bitim harem nogud we i neva ded—from ona blong wol?

39 From wanem yufala i flasem yufala bakegen wetem samting we i no gat laef, mo gohed blong letem olgeta we oli hanggri, mo olgeta we oli nidim samting, mo olgeta we oli neked, mo olgeta we oli sik, mo olgeta we oli gat hadtaem blong pas kolosap long yufala, mo yufala i no lukluk long olgeta.

40 Yes, ?from wanem yufala i bildimap ol sikret grup blong yufala, blong kasem mane, mo mekem se ol wido oli mas krae long fored blong Lod, mo tu, ol pikinini we oli no gat papa o mama blong oli krae long fored blong Lod, mo tu, blad blong ol papa blong olgeta mo ol hasban blong olgeta blong krae long Lod aot long graon, blong pembak yufala wetem panis antap long hed blong yufala?

41 Luk, naef blong pembak i stap hang ova long yufala; mo taem ia i stap kam kolosap blong hem i pembak blad blong ol sent long yufala, from bae hem i nomo save gohed blong harem ol krae blong olgeta i go moa.