1 Dóó kʼad, éí Christ doo dayoodlánígíí ałdóʼ baa yáshtiʼ doo.

2 Jó, ákoósh nihá ndahwiitʼaah bijį́įdi índa daʼiidoodląął—jó, áajįʼ ayííłką́ągo Bóhólníihii níyáago, aooʼ, tsʼídá ayóó átʼéego ayííłką́ągo ndi nahasdzáán éí dínóolmas haneʼ daasdisę́ę nahalingo éí ałchʼįʼ kódoonííł, dóó nahasdzáán bee hadilyaaígíí ałtso didoołhį́į́h, aooʼ, éí áajįʼ ayííłką́ągo Diyin God biDibé Yázhí bidááhdóó danihiʼdiilzįʼgo—índa daatsʼí Diyin God éí ádin dadohníi doo?

3 Índa daatsʼí tʼahdii Christ doo deinohdlą́ą da doo, éí doodagoósh Diyin God biDibé Yázhí deidoołtsééł? Ákoósh bąąhági átʼéii baa nisíníyáhą́ą baa yínííł nanináago bił kééhashtʼį́į doo nínízin? Daʼ bibeehazʼáanii yę́ę kʼíhínítiʼígíí yéigo baa yínííł nanináago daatsʼí Diné diyinii shił hózhǫ́ǫgo bił kééhashtʼį́į doo nínízin?

4 Jó, shí ánihidishníigo éí tsʼídá hózhǫ́ yinííł dóó achʼįʼ nahwiiʼná bikééʼ njigháa doo Diyin God bił hazʼą́ądi hojílǫ́ǫgo, háálá bąąhági átʼéii baa njiyáhą́ą éí bee tʼóó baaʼihii hąąhgo bee ádaa ntsíjíkees doo, áko chʼį́įdiitahdi bił hazʼą́ą́jígo éí tʼáá nihá yáʼátʼéeh doo.

5 Jó áko, Diyin God bidááhdóó nihiʼdiilzįʼgo nihibąąhági átʼéii ałtso baa ákodínóohsįįł, tʼáá jilchííʼ nahalingo, dóó ałdóʼ Diyin God biyáʼátʼéehii, dóó Jesus Christ bidiyinii, éí kǫʼ doo nitsésígíí nihikʼijįʼ kwíidoolííł.

6 O índa nihí doo daʼoohdlánígíí, Bóhólníihii éí deinohdlą́; Jesus bízhiʼ binahjįʼ éí aTaaʼ íiyisíí bichʼįʼ sodadoołzin, áko doo nihąąh chingóó, nihiyiʼ daniłtólígo danohshónígo, danołgaigo, nihaa ákodínóozįįł, Dibé Yázhí bidił deeznaʼą́ą bee táʼníhíʼdísgisgo, éí ákótʼé ayóó átʼéii dóó akéeʼdi honíłką́ągo.

7 Dóó nááná shí éí ánihidishní, éí éí Diyin God tʼáadoo leʼé ííshjání áyoolíłí doo deinohdlánígíí, dóó nahjįʼ kólyaa, ííshją́ą́ álʼíinii kʼad ádin dadohnínígíí, doodago náásgóó ádahodooníłígíí yaa halneʼę́ę doo baa haneʼ da, doodago diyingo ádaatʼéii aa halyéhígíí ałdóʼ ádin, doodago diyinkʼehgo haałtʼé ánáʼoolnííł ałdóʼ ádin, doodago diyinkʼehgo ałʼąą átʼéego yátiʼígíí ałdóʼ ádin, dóó ataʼ haneʼígíí ałdóʼ ádin dadohnínígíí;

8 Jó ánihidishníigo, éí tʼáá háiida díí doo yoodlánígíí éí Christ binaʼnitin doo bił bééhózin da; aooʼ, tʼah doo éí Diyin bizaad yółtaʼ da; yiyííłtaʼgo éí, tʼáadoo yikʼiʼdiitįįh da.

9 Háálá Diyin God éí tʼáá adą́ą́dą́ą́ʼ, dóó díí jį́, dóó hoolʼáágóó, tʼááłáhági átʼé, dóó doo ałʼąą ánááʼníił da dóó áłtsʼíísígo ndi doo ałʼąą ááníił dago, baa daʼííníiltaʼ yaʼ?

10 Dóó kʼad, łaʼ diyin éí ałʼąą ánááʼníiłgo baa ntsídadoohkéezgo, dóó łaʼ éí diyin áłtsʼíísígo ałʼąą ánááʼnííł danohsin, índa Diyin God doo álílee naʼanishgóó baa ntsídadoohkééz.

11 Jó ndi, Diyin God álílee naalnishígíí éí nihił ííshją́ą́ ádeeshłííł, éí éiyá Abraham biDiyin God, dóó Isaac biDiyin God, dóó Jacob biDiyin God; dóó tʼáá éí tʼéiyá Diyin God yádiłhił dóó nahasdzáán áyiilaa, dóó tʼáá ałtso biiʼ naazláhígíí.

12 Jó, éí éiyá Adam áyiilaa, dóó Adam asiihgo adáátłizh biniinaa diné Diyin God yitsʼákai. Dóó diné adáátłizhígíí biniinaa Jesus Christ níyá, éí éí aTaaʼdóó aYeʼ nilínígo ndi; dóó Jesus Christ binahjįʼ ninaʼídlaʼii silį́į́ʼ.

13 Dóó háálá Jesus Christ yá nináʼídláhígíí biniinaa, éí bee, diné Bóhólníihii bił hazʼą́ góneʼ bił yah anaʼiildeeh; aooʼ, díí éí bee diné tʼáá ałtso bá nináʼílyá, háálá Christ seesyínę́ę binahjįʼ diné tʼáá ałtso náádidoojah, éí éiyá diné anoonééł bidaʼiiłhaazh yę́ędę́ę́ʼ yá nináʼídlá; díí diné tʼáá ałtso daʼałhoshę́ędę́ę́ʼ éí Diyin God bibee adziilii binahjįʼ chʼéédabidiʼdooldził dilní diistsʼą́ąʼgo; diné tʼáá aʼohgo ádaatʼéii dóó ayóó ádaatʼéii éí ńdidoojah, tsʼídá tʼáá ałtso beʼánihwiitʼaah dasitánígíí bidááhdóó náhizhdookah, éí éí hoolʼáágóó ánoonéłę́ę bitsʼą́ą́dę́ę́ʼ bá nináʼdoolyééł, éí ánoonéłígíí éí atsʼíísę́ę bikʼehgo.

14 Dóó índa biDiyin Ayóó Átʼéii bá nihodooʼááł; dóó índa éí tʼáá háiida doo yáʼátʼéehgo njigháhą́ą éí tʼahdii doo yáʼájítʼéeh da doo, dóó tʼáá háiida diyinkʼehgo hinánę́ę éí tʼáá diyinkʼehgo hináa dooleeł; tʼáá háiida bił hózhónę́ę éí tʼahdii bił hózhǫ́ǫ dooleeł, dóó doo bił hózhónę́ę éí tʼahdii doo bił hózhǫ́ǫ da dooleeł.

15 Dóó kʼad, O tʼáá ánółtso łaʼ Diyin God doo álíleekʼeh naalnishgóó baa ntsídaahkeesígíí, éí nanihídíshkid dooleeł, díí baa hweeshneʼígíísh tʼáá íídą́ą́ʼ ádahóótʼįįd? Tʼah doósh nihoolzhíish da? Jó shí ánihidishníigo éí, Ndagaʼ; dóó Diyin God éí tʼah doo álílee naanish niʼkwíiléeh da.

16 Jó, daʼ Diyin God tʼáadoo leʼé áyiilaaígíísh doo nihił ayóó ánoolnin da doo? Áko háísh éí Diyin God binaanish ayóó átʼéii yikʼiʼdidootį́į́ł?

17 Háísh díí yádiłhił dóó nahasdzáán bizaad bee dahazlį́ʼígíí doo álílee naʼanishígíí átʼée da; dóó bizaad bidziilii binahjįʼ éí doo nahasdzáán bitsʼą́ą́dóó diné ályaa da; dóó doo bizaad bidziilii binahjįʼ álílee ndaʼazhnish didoohniił?

18 Dóó háísh éí doo Jesus Christ álílee naanish ayóó ádaatʼéii áyiilaa dadidoohniił? Dóó hastóí naakitsʼáadah álílee naʼanish ayóó ádaatʼéii tʼóó ahayóí ádayiilaa.

19 Dóó álíleekʼehgo naanish ádaalyaago índa, haash yitʼáo éí Diyin God kʼad doo álílee naalnish da dóó ákondi doo Diné éí łahgo ánááʼníił da? Jó áádóó shí ánihidishníigo éí doo éí łahgo ánááʼníił da; łahgo ánááʼníiłgo éí doo Diyin God nilį́į da doo ńtʼę́ę́ʼ; ákondi Diyin God éí tʼahdii Diyin nilį́, dóó Diyin God álílee naalnishii nilį́.

20 Dóó biniinaa doo álílee bee bílaʼashdlaʼii baʼáłchíní yitahgóó naalnishígíí éí doo daʼoodlą́ą da daazlį́į́ʼ, dóó yáʼátʼéehgo honítʼiʼjí yę́ę yitsʼákai, dóó Diyin God yadaʼólíi dooleełę́ę éí doo bił béédahózingóó biniinaa.

21 Jó, shí ánihidishníigo éí tʼáá háiida tsʼídá tʼáá aaníí Christ yoodlą́ągo, tʼáadoo bił naaki nilíní, haʼátʼííshį́į́ aTaaʼ Christ bízhiʼ binahjįʼ yíyókeedígíí éí baa doolyééł; dóó tʼáá ałtso nihookááʼ dineʼé ndi, éí díí kótʼáo tʼáá ałtso bee bił ahaʼdeetʼą́.

22 Jó áko, Diyin God biYeʼ, Jesus Christ, éí táaʼgo naakitsʼáadahii danilínę́ę tʼáá nahadzáán yikááʼ neiikai doo dadííniidę́ę, dóó łahjįʼ tʼáá ałtso naakitsʼáadahii, nahdę́ę́ʼ diné daʼíístsʼą́ąʼgo, kóyidííniid: Tsʼídá tʼáá ałtso nihookááʼ bikááʼgóó éí Jesus Christ binaʼnitin bíndaʼnołtin dooleeł.

23 Dóó tʼáá háiida oosdląądgo dóó tó bee biʼdoolzį́įʼgo éí yisdáńdoodááł, ndi tʼáá háiida doo oodlánígíí éí doo náásgóó íhoołʼaah da dooleeł.

24 Dóó díí binahjįʼ ééhózinii daʼoodlánígíí éí bikééʼgóó ádahooníił doo—shízhiʼ binahjįʼ éí chʼį́įdii bidaʼiiníziinii atsʼádéiniiyood doo; łaʼ nááná saad ániidígíí éí yee yádaałtiʼ doo; naʼashǫʼii bádahadzidii ndeijaah doo; dóó tʼáá haʼátʼííshį́į́ atsʼíís doo bá yáʼátʼéhígíí dayoodlą́ą ndi doo ádabidoolíłí da; dóó doo bitah dahatsʼídígíí éí yitsiitʼáá dah ńdadilnihgo éí hadaałtʼé ninádahádléeh doo;

25 Dóó tʼáá háiida shízhiʼ yinahjįʼ oodlą́ągo, dóó tsʼídá doo bił naakiígíí, éí díí shizaad bił ííshjání ádeeshłííł, índa nahasdzáán bikááʼgóó adahwiisʼáago, díí shizaad bił ííshją́ą́ ádeeshłííł.

26 Jó, dóó kʼad, háísh éí kʼad Bóhólníihii binaanish yikʼijįʼ sizį́į dooleeł? Saad yee haadzíʼígííshąʼ éí háí doo yidoodląął da? Háísh éí Bóhólníihii bibee adziilii yikʼijįʼ yidoozįįł? Háísh éí Bóhólníihii binaanish yikʼijįʼ yáłtiʼ dooleeł? Háísh éí Christ baʼáłchíní yikʼijįʼ yáłtiʼ dooleeł? Jó, Tʼáá ánółtso Bóhólníihii binaanish bikʼijįʼ yádaałtiʼígíí dóó ndaahłnishígíí, háálá nihí éí dooládóʼ doodada danohsin dóó dadínóonééł.

27 O índa tʼáadoo éí bikʼijįʼ yádaałtiʼí, dóó dooládóʼ doodada tʼáadoo danohsiní, ndi Bóhólníihii bizaad éí deísínóołtsʼą́ą́ʼ, dóó aTaaʼ haʼátʼííshį́į́ bee nihichʼįʼ ańdahaztʼiʼígíí éí Jesus bízhiʼ binahjįʼ deínóhkeed. Tʼáadoo nihił ndaakaií, ákondi daʼiinohdlą́, dóó ałkʼidą́ą́ʼ yę́ęgi átʼáo, dóó tʼáá átʼé nihijéí bee Bóhólníihii bichʼįʼ nihookááʼ, dóó bińdaałdzid dóó nihitah dahoditłidgo yisdánáhidoohkahígíí bindaałnish.

28 Nahasdzáán bikáaʼgi dahinohnáago hazhóʼó baa dahonohsą́; bąąhági átʼéii nahjįʼ ádąąh kódaahłééh; deínóhkeedígíí, ákondi tsʼídá tʼáá aaníí doo łahgo óhnéehgo, ndi tʼáadoo nihił ndaakaií, áko doo éí bąąhági átʼéii nihikʼehdidleehí, ndi Diyin God tʼáá aaníinii dóó hinánígíí bá naałnishgo sodadidoołzįįł.

29 Tʼahdii bąąhági átʼéii nihee dahólǫ́ǫgo tʼáadoo tó bee danihiʼdilzį́hí; bąąhági átʼéii nihee dahólǫ́ǫgo tʼáadoo Christ bibááh dóó bitoʼ daohsání; áko bąąhági átʼéii nihąąh ádaadingo tsʼídá tʼáá ałtsoní bindaałnish, Jesus Christ bízhiʼ binahjįʼ, Diyin God hináanii biYeʼ; dóó díí kótʼáo bidaʼołʼį́įgo, dóó są́ biyiʼjįʼ tʼáá áłahjįʼ yáʼátʼéehii bee nisoozį́įgo éí doo nahjįʼ kónihidiʼdoolníił da.

30 Jó, náádadiilyáhą́ą bitahdóó yáshtiʼ nahalingo éí nihichʼįʼ yáshtiʼ; háálá shizaad dadidoohtsʼį́įłgo éí shił bééhózin.

31 Shí dóó shizhéʼé, dóó ałdóʼ tʼáá ałtso bilą́ąjįʼ ndaʼasdzo yę́ę, éí haitʼáo da ndaʼiyeelzíʼígíí, tʼáadoo biniinaa nihikʼijįʼ yádaałtiʼí; ndi Diyin God éí bichʼįʼ ahééh danohsin háálá ndaʼsiyiilziʼígíí nihił ííshją́ą́ áyiilaa, binahjįʼ éí nihiláahdi hódzą́ bídahwiidoołʼááł.

32 Jó, dóó kʼad, díí haneʼ éí nihił béédahózinígíí binahjįʼ ádeiilyaa; díí bee ninádaʼiidzohígíí éí Egypt dineʼé bizaad ánályaaígíí dabidiiʼní, haashį́į́ nihizaadę́ę́ʼ náas yitʼááł dóó nihizaadígíí bikʼehgo łahgo ádeiilyaa.

33 Dóó díí béésh óola bikááʼ tʼáá hótsaago éí Hebrew bizaadkʼehjí ádeiilyaa doo ńtʼę́ę́ʼ; ndi Hebrew bizaad éí ałdóʼ łahgo áńdeiilyaa; ndi Hebrew bizaadkʼehjí ádeiilyaago éí díí nihaa haneʼ niʼiisdzíʼígíí biiʼ ádin dooleeł ńtʼę́ę́ʼ.

34 Ndi ndaʼsiidzooígíí éí Bóhólníihii bił bééhózin, dóó ałdóʼ tʼáá háiida dineʼé éí doo nihizaad bił béédahózin da; dóó háálá díí náánáłaʼ dineʼé nihizaad doo bił bééhózinígíí biniinaa, éí bąą Diyin God bee yídóoltʼáhígíí hashtʼeyiilaa.

35 Dóó díí éí nááháasdzo, áko nihikʼisóó doo daʼoodlą́ą́góó bąąhági átʼéii yaa naaskai yę́ę, éí doo nihąąh da doo biniiyé.

36 Jó áádóó, díí éí nihikʼisóó bá laanaa daniidzin, aooʼ, índa Christ baa haneʼígíí bił bénádahodoodzįįł daniidzin, díí éí tʼáá ałtso daʼoodlání kǫ́ǫ́ kéédahatʼínę́ę kótʼéego yaa ńdaʼooskan.

37 Dóó éí bedaʼoodląʼ binahjįʼ bisodizin Bóhólníihii Jesus Christ yá yidaʼdoolííł nisin; dóó Diyin God aTaaʼ nilíinii éí Israel bighandóó danilíinii yił ałhaʼdeetʼánę́ę éí yénálniih dooleeł nisin; dóó Jesus Christ dayoodlánígíí binahjįʼ, hoolʼáágóó yikʼihojidoodliił nisin. Amen.