1 O se tusi a lo’u tamā o Mamona, na tusi mai ia te a’u, o Moronae; ma sa tusi mai ia te a’u ae le’i pine ona uma ona valaauina o a’u i le galuega. Ma sa faapenei ona ia tusi mai ia te a’u, fai mai:

2 Lo’u atalii pele e, Moronae, ou te olioli tele ona ua manatu mai lou Alii o Iesu Keriso ia te oe, ma ua ia valaauina oe i lana auaunaga, ma i lana galuega paia.

3 Ou te manatu pea ia te oe i a’u talosaga, ma tatalo atu pea i le Atua le Tamā, i le suafa o lona Alo Paia, o Iesu, ia ona tausia oe, e ala i lona agalelei e le gata ma lona alofa tunoa, i le tumau i le faatuatua i lona suafa e oo i le iuga.

4 Ma o lenei, lo’u atalii e, ou te tautala atu ia te oe e uiga i lena mea ua ou faanoanoa tele ai: auā ou te faanoanoa ina ne’i tula’i mai ni finauga i totonu ia te outou.

5 Auā, afai ua ou iloaina le mea moni, sa i ai ni finauga i totonu ia te outou e uiga i le papatisoina o a outou fanau laiti.

6 Ma o lenei, lo’u atalii e, ou te manao ia e galue ma le filigā, ina ia aveeseina lenei sese matuia mai totonu ia te outou; auā, o le faamoemoe lenei ua ou tusia ai lenei tusi.

7 Auā e le’i pine ona mavae ona ou iloa o nei mea mai ia te oe, sa ou ole atu i le Alii e uiga i le mataupu. Ma sa oo mai ia te a’u le afioga a le Alii e ala i le mana o le Agaga Paia, ua fetalai mai:

8 Faalogo mai i upu a Keriso, lou Togiola, lou Alii ma lou Atua. Faauta, ou te le’i sau i le lalolagi e valaau atu i e amiotonu ae o e agasala ia salamo; ua le manaomia e e ua maloloina se fomai, ae o i latou o e ua mama’i; o le mea lea, ua atoatoa tamaiti laiti, ona ua le mafai ona latou faia se agasala; o le mea lea ua aveese ai le fetuu o Atamu, mai ia te i latou, e ala ia te a’u, ona ua leai sona mana i luga ia te i latou; ma ua aveeseina le tulafono o le peritomeina, e ala ia te a’u.

9 Ma o le ala lenei na faaali mai ai e le Agaga Paia ia te a’u le afioga a le Atua; o le mea lea, lo’u atalii pele e, ua ou iloa ai o se faifai tugā i luma o le Atua, lo outou papatisoina o fanau laiti.

10 Faauta ou te fai atu ia te outou o le mea lenei ia outou a’oa’o atu—o le salamo ma le papatisoga ia i latou o e ua mafai ona tali atu ma mafai ona faia le agasala; ioe, a’oa’ o atu i matua e tatau ona latou salamo ma papatisoina, ma faalotomaualalalo i latou lava e pei o a latou fanau laiti, ma o le a faaolaina ai i latou uma faatasi ma a latou fanau laiti.

11 Ma e le manaomia e a latou fanau laiti se salamo, po o le papatisoga. Faauta, o le papatisoga ua mo le salamo i le faataunuuina o poloaiga mo le faamagaloina o agasala.

12 Ae o fanau laiti ua ola ia Keriso, mai lava i le faavaega o le lalolagi; afai ua le faapea, o le Atua o se Atua e faaituau, ma o se Atua fesuisuiai foi, ma o sē ua faailoga tagata; ona e to’a fia fanau laiti ua feoti e aunoa ma le papatisoga!

13 O le mea lea, afai e le mafai ona faaolaina o fanau laiti e aunoa ma le papatisoga, atonu ua o atu i latou i le seoli e le gata.

14 Faauta ou te fai atu ia te oe, o ia o lē ua manatu ua manaomia e fanau laiti le papatisoga, ua i ai o ia i le au oona ma noataga o le amioletonu; auā ua le i ai ia te ia le faatuatua, faamoemoe, po o le alofa mamā; o le mea lea, afai e vavae ese o ia a’o i ai ia te ia lea manatu, o le a alu ifo o ia i seoli.

15 Ona ua matautia le amioleaga e manatu faapea e faaolaina e le Atua se tasi tamaitiiti ona ua papatisoina, ae o le a fano le isi ona ua le papatisoina.

16 Oi talofa ia te i latou e faapi’opi’o ala o le Alii e tusa ma lenei faiga, ona o le a fano i latou vagana ai ua latou salamo. Faauta, ou te tautala atu ma le lotoa, ona ua ou maua le pule mai le Atua; ma ou te le fefe po o a mea e mafai ona faia e tagata; ona e lafoaiina i fafo e le alofa ua atoatoa le fefe uma.

17 Ma ua tumu a’u i le alofa mamā, le alofa tumau e faavavau lea; o le mea lea, ua tutusa fanau laiti uma ia te a’u; o le mea lea, ua ou alofa i fanau laiti i se alofa ua atoatoa; ma ua tutusa i latou uma ma ua maua e i latou le faaolataga.

18 Ona ua ou iloa o le Atua e le o se Atua e faaituau, po o se tagata ua fesuisuiai; ae ua le fesuisuiai lava o ia mai le vavau atoa e oo i le faavavau atoa.

19 E le mafai e fanau laiti ona salamo; o le mea lea, o se amioleaga tele le faafitia o le alofa mutimutivale mamā o le Atua ia te i latou, ona ua ola uma i latou ia te ia ona o lona alofa mutimutivale.

20 Ma o ia o lē e fai mai e manaomia e fanau laiti le papatisoga ua faafitia le alofa mutimutivale o Keriso, ma fai ma meanoa lana togiola ma le mana o lana faaolataga.

21 Oi talofa i ē faapea, ona ua lamatia i latou e le oti, seoli, ma le mafatia e le gata. Ou te tautala atu ia upu ma le lotoa; ua poloaiina ai a’u e le Atua. Ia outou faalogo ia i latou ma ua’i i ai, po ua latou teena outou i le nofoa-faamasino o Keriso.

22 Auā faauta, ua ola fanau laiti uma ia Keriso, ma i latou uma foi o ē ua aunoa ma le tulafono. Auā e oo mai le mana o le togiola i luga o i latou uma o ē ua aunoa ma le tulafono; o le mea lea, o ia o lē ua le ta’usalaina, po o ia o lē ua le i lalo o se ta’usalaga, e le mafai ona salamo; ma o ē faapena ua le aogā i ai le papatisoga—

23 Ae o se faifai i luma o le Atua, ua faafitia ai le alofa mutimutivale o Keriso, ma le mana o lona Agaga Paia, ma le tuuina atu o le faalagolago i galuega mamate.

24 Faauta, lo’u atalii e, e le tatau lava ona i ai o lenei mea; ona o le salamo e mo i latou ua i ai i lalo o le ta’usalaga ma lalo o le fetuu o se tulafono ua solia.

25 Ma o fua muamua o le salamo o le papatisoga; ma o le papatisoga e oo mai e ala i le faatuatua e faataunuu ai poloaiga; ma o le faataunuuina o poloaiga e maua ai le faamagaloina o agasala;

26 Ma o le faamagaloina o agasala e maua ai le agamalu, ma le maualalo o le loto; ma o le agamalu ma le maualalo o le loto e oo mai ai le asiasiga a le Agaga Paia, o le Fesoasoani lea na te faatumuina le tagata i le faamoemoe ma le alofa atoatoa, o le alofa lea e tumau e ala i le filigā i le tatalo, seia oo mai le iuga, pe a mau le au paia uma faatasi ma le Atua.

27 Faauta, lo’u atalii e, o le a ou toe tusi atu ia te oe pe a le vave ona ou alu atu e faasagatau ia sa Lamanā. Faauta, o le faamaualuluga o lenei atunuu, po o tagata o sa Nifaē, ua faamaonia ai lo latou faaumatiaga vagana ai o le a latou salamo.

28 Ia e tatalo mo i latou, lo’u atalii e, ina ia oo mai le salamo ia te i latou. Peitai faauta, ou te fefe ne’i le toe finafinau le Agaga ma i latou; ma i le vaega lenei o le laueleele, o loo latou saili foi e faatoilalo le mana ma le pule atoa lea e mai le Atua; ma ua latou teena le Agaga Paia.

29 Ma ina ua uma ona latou teena se malamalama tele naua, lo’u atalii e, o le a vave ona fano o i latou, i le faataunuuina o valoaga na fetalai i ai perofeta, faapea foi ma fetalaiga a lo tatou Faaola lava ia.

30 Tofa ia, lo’u atalii e, seia ou tusi atu ia te oe, pe seia ta toe feiloai. Amene.