1 Nei achengicheng, ua mak ngonuk sefan pwe kopwe sinei pwe ngang mi chok manau; nge ua ekis mak usun met minne mi enetipengaw.

2 Pun nengeni, ua fen ani ew eriaffoun maun ngeni ekkewe chon Leiman, non minne am ause akkufur; iwe Arkiantas a fen turuno me ren ewe ketinas, me pwan Luram me Emron; ewer, iwe a fen mano senikem ew chommong chochon nöum kewe mwan mi kefinita.

3 Iwe iei nengeni, nei anuon, ua nuokus ika ekkewe chon Leiman repwene nieno ekkei aramas; pun rese aier, iwe Setan a soposopono ne amwasangereta ngeni song emon ngeni pwan emon.

4 Nengeni, ngang ua soposopono ne angang rer; iwe nupwen ua apasa ewe kapasen Kot ren pochokun ra chechech me song ngeniei; iwe nupwen use aea pochokun ra apochokunano netiper ngeni; ina minne, ua nuokus ika ewe Ngunun ewe Samon a fen kouno ne nonnom rer.

5 Pun fokkun watte ar song iwe usun me rei pwe ese wor ar nuokusun mano; iwe ese chiwen wor ar tong, emon ngeni pwan emon; iwe ra soposopono ne kaka mwirin cha me angei niwinin an ekkoch foffor ngeni ir.

6 Iwe iei, nei achengicheng, inamo ren ar netipforea, sipwe achocho ne angang; pun ika sipwe kouno ne angang, sipwe watiw inisich fan nemenien kapung; pun mi wor ew angang sipwe fori nupwen kich mi nom non ei inisin puun, pwe sipwe tongeni akkufu ewe chon koum ngeni unusen wenechar, me asosoi ngunuch non ewe muun Kot.

7 Iwe iei ua ekis mak usun riaffoun ekkei aramas. Pun anongonong won ewe mirit minne ua fen angei seni Amoron, nengeni, ekkewe chon Leiman a wor rer chommong chon kanapus, minne ra angei seni ewe towerun Serraisa; iwe mi wor mwan, fefin, me semirit.

8 Iwe punuwen ekkewe fefin me semen ekkewe fefin me semirit ra fen ninnino; iwe ra amwongoni ekkewe fefin ngeni futuken punuwer kewe, me ekkewe semirit ngeni futuken semer kewe; me ese wor konik, tiwenon ekis chok, ra ngeni ir.

9 Iwe inamo ei ennetin anieput an ekkewe chon Leiman, ese nap seni anieputen nouch kewe aramasen Moriantum. Pun nengeni, chommong me nein ekkewe fopun noun ekkewe chon Leiman ra fen ono ngeni kanapus; iwe mwirin ar angei seni ir met minne mi unusen achengicheng mi auchea nap seni mettoch meinisin, minne nimenimoch me nimenimoch seni nisou—

10 Iwe mwirin ar fori ei mettoch, ra nii manauereno non ew unusen napanap mi emmetek, ra eriaffou inisir pwan mwo tori mano; iwe mwirin ar fori ei ra ochei futuker usun chok man mwacho, pokiten tipeforean netiper; iwe ra fori pwe esisinen pwara.

11 O nei achengicheng, ifa usun ew aramas usun ei, ese wor ar napanapen mirit—

12 (Iwe fite chok ier a wesino, nupwen ir mi mirit me ew aramas murino)

13 Nge O nei anuon, ifa usun ew aramas usun ei, ar pwapwa a fis non watten anieput—

14 Ifa usun sia tongeni ekieki pwe Kot epwe amwochu poun non kapung senikich?

15 Nengeni, netipei a puchor: Riaffou ngeni ekkei aramas. Tou non kapung, O Kot, me opano ar tipis, me fofforungaw, me anieput seni mwen mesom!

16 Iwe pwan, nei anuon, mi chommong ekkewe fefin mi mano punuwer me nour kewe fopun ekkewe ra nomwetiw non Serraisa; iwe ewe kinikinin pisekin mwongo minne ekkewe chon Leiman rese uweiano, nengeni, ewe mwichen sounfiun Senifai a uweiano, me nikitireno ar repwe mwanech fetan ian chok ra tongeni fan iten mwongo; iwe chommong chinnap fefin ra peno me won ewe aan me mano.

17 Iwe ewe mwichen sounfiu minne mi nom rei mi apwangapwang; iwe ekkewe sounfiun ekkewe chon Leiman ra nom nefinen Serraisa me ngang; iwe meinisin ekkewe ra suno ngeni ewe mwichen sounfiun Aaron ra winiti chon riaffoun ngeni ar anoninenin nemenemengaw.

18 O ewe ngawenon nei aramas! Ese wor ar tetten me ar umoumoch. Nengeni, ngang emon chok mwan, iwe a wor rei ewe chok pochokunen emon mwan, iwe use chiwen tongeni apochokuna ai kewe annuk.

19 Iwe ra fen pochokununo non ar ngaweno; me ra nonno fengen non ar nemenemengaw, rese amanaua emon, ekkewe mi chinnap me ekkewe mi kukkun; me ra pwapwa non mettoch meinisin tiwenon chok met minne mi öch; iwe riaffoun nouch kewe fefin me nouch kewe semirit won unusen unungen ei fonu a kon nap seni mettoch meinisin; ewer, channaw ese tongeni aporousa, ese pwan tongeni makketiw.

20 Iwe iei, nei anuon, usap chiwen soposopono won ei anoninenin nikinik. Nengeni, ka sinei fofforungawen ekkei aramas; ka sinei pwe ese wor ar nongonong, me rese chiwen tongeni memef; me ar fofforungaw a kon nap seni an ekkewe chon Leiman.

21 Nengeni, nei anuon, use tongeni kapas usur ngeni Kot ren nuokusun ika epwe wichiei.

22 Nge nengeni, nei anuon, ua kapas usum ngeni Kot, me ua apinukunuk non Kraist pwe kopwe manau; me ua iotek ngeni Kot pwe i epwe amanaua manauom, pwe kopwe kuna niwinton noun aramas ngeni i, are ar unusen kiteterino; pun ngang mi sinei pwe repwe fokkun mano tiwenon chok ika repwe aier me niwin ngeni i.

23 Iwe ika repwe mano epwe usun chok ekkewe chon Jared, pokiten nukumachen netiper, ra kutta cha me niwinin an ekkoch foffor ngeni ir.

24 Iwe ika pwe repwe mano, sia sinei pwe chommong me nein pwich kewe ra fen rikino ngeni ekkewe chon Leiman, me chommong repwe pwan rikino ngeni ir; ina minne, ekis makkei ekkoch mettoch, ika kopwe manau me ngang upwe mano me usap chiwen kunok; nge ngang mi apinukunuk pwe upwe mwitir kunok; pun mi wor rei ekkoch uruo mi monomon upwe ngonuk.

25 Nei anuon, kopwe nikitu non Kraist; iwe amwo ekkewe mettoch minne ua fen makketiw resap enetipengawok, ar repwe achouketiw ngeni mano; nge amwo Kraist epwe seikoketa, me amwo an riaffou me mano, me an we pwarano inisin ngeni semach kewe, me an umoumoch me engino, me ewe apinukunukun an ning me manau esemuch, repwe nonnom non om ekiek feinfeino chok.

26 Iwe amwo ewe chenin Kot ewe Sam, ewe an nenien mwottun king mi tekia non ekkewe nang, me ach Samon Jises Kraist, ewe a mwomwot won peniemwanin an manaman, tori an mettoch meinisin repwe nom fan nemenian, repwe, me nonnom reom feinfeino chok. Amen.