1 Iwe non ewe fansoun mwirin ukukun ru ier Apinatai a feito neir non an asokkano nikinikin, iwe rese sinei pwe i, iwe a poputa ne osini me neir, a apasa: Iei ewe Samon a annuku ngeniei, a apasa—Apinatai, feino me osini ngeni nei kewe aramas, pun ra fen apochokunano netiper seni ai kewe kapas; rese aier seni ar kewe foffor mi ngaw; iei minne, upwe churi ir non ai song, ewer, non ai song mi pochokun upwe churi ir non ar angangangaw me angang mi anieput.

2 Ewer, riaffou ngeni ei tappin aramas! Iwe ewe Samon a apasa ngeniei: Aitieu poum me osini, a apasa: Iei anon ewe Samon, ewe fansoun epwe feito pwe ei tappin aramas, pokiten ar angangangaw, repwe katonong non fotek, me repwe wichiwich won saaper; ewer, me repwe su fetan me ren aramas, me repwe ninnino; iwe ekkewe machangen non asepwan mi ochoch futuk, me ekkewe konak, ewer, me ekkewe man mwacho, repwe ocheno futuker.

3 Iwe ewe fansoun epwe feito pwe manauen king Noah epwe usun auchean echo mangaku non ew ekkei mi pwichikar; pun epwe sinei pwe Ngang ewe Samon.

4 Iwe ewe fansoun epwe feito pwe upwe wichi nei kewe aramas ren och riaffou mi anetipechou, ewer, ren nengita me ren samau; iwe upwe fori pwe repwe ngungures unusen ewe ran seni nepoputan ngeni nesoponon.

5 Ewer, iwe upwe afisano pwe epwe wor oser mi chou epwe fofota won nukunuper; iwe repwe kasuno mwer usun emon tongki ese tongeni kapas.

6 Iwe ewe fansoun epwe feito pwe upwe tinano monumonun foun ais neir, iwe epwe wichi ir; me repwe pwan osukosuk me ren asepwanin notou; iwe ekkewe man toto repwe pwan aosukosuka fonuer we, me anieno ar kewe grain.

7 Iwe repwe osukosuk me ren ew watten samau mi napanap—iwe meinisin ekkei upwe fori pokiten ar angangangaw me angang mi anieput.

8 Iwe ewe fansoun epwe feito pwe tiwenon chok ika repwe aier upwe unusen nireno seni unungen ewe fonufan; nge inamo repwe nikitatiw ew uruo, iwe upwe tumunur seni ekkoch muu minne repwe fonueni ewe fonu; ewer, pwan mwo ei upwe fori pwe upwe tongeni pwarata ekkewe angang mi anieput an ekkei aramas ngeni ekkoch muu. Iwe chommong mettoch Apinatai a osini ngeni ekkei aramas.

9 Iwe non ewe fansoun ra song ren; iwe ra angei i me ekieno me foti me mwen ewe king, me ra apasa ngeni ewe king: Nengeni, am aua fen uweiato emon mwan me mwom ewe a osini mettoch mi ngaw usun noum kewe aramas, me a apasa pwe Kot epwe nireno.

10 Iwe i a pwan osini mettoch mi ngaw usun manauom, me a apasa pwe manauom epwe usun echo mangaku non ew nenien ekkei.

11 Iwe pwan, i a apasa pwe kopwe usun efoch ira, pwan mwo usun efoch iran ewe atake mi pwas, minne a pwupwu me ren ekkewe man mwacho me purieno fan pecher.

12 Iwe pwan, i a apasa pwe kopwe usun ekkewe kukkun poniran panen ira mi fonufon, minne, nupwen a unusen nup, ika ewe asepwan a usi, epwe susufetan won unungen ewe fonu. Iwe a tipen era pwe ewe Samon a apasa ekkei mettoch. Iwe i a apasa pwe ekkei mettoch meinisin repwe feito wom tiwenon chok ika kopwe aier, iwe ei pokiten om angangangaw.

13 Iwe iei, O king, met ka fori mi fokkunngaw, are met sokkun tipis watte noum kewe aramas ra fen fori, pwe sipwe ne tipis me ren Kot are kapung me ren ei mwan?

14 Iwe iei, O king, nengeni, am aua nimenimoch, iwe en, O king, kose mwo tipis; iei minne, ei mwan a mwaken usum, iwe i a osini non namotmwan.

15 Iwe nengeni, am aua pochokun, am ausap tonong non fotek, are ono me ren ekkewe chon koum ngeni kem; ewer, iwe en ka fen feioch me non ewe fonu, iwe kopwe pwan feioch.

16 Nengeni, iei i ewe mwan, am aua wanong i non poum; ka tongeni fori ngeni i met a öch ngonuk.

17 Iwe non ewe fansoun king Noah a annuku pwe Apinatai epwe katurunong non kanapus; iwe a annuku pwe ekkewe pris repwe ioifengen pwe i epwe tongeni efisi ew mwich rer usun met i epwe fori ngeni.

18 Iwe non ewe fansoun ra apasa ngeni ewe king: Uweiato i ikei pwe am aupwe tongeni kapaseis ngeni; iwe ewe king a annuku pwe repwe wato i me mwer.

19 Iwe ra poputa ne kapaseis ngeni i, pwe repwe tongeni fori epwe osokkano an kapas, ren ewe popun pwe repwe tongeni etipisi i; nge a ponueni ir non pochokun, me ungeni ar kewe kapaseis meinisin, ewer, ngeni ar mairu; pun i a ungeni ir non ar kewe kapaseis meinisin, me a anini ngeni ir non ar kewe kapas meinisin.

20 Iwe non ewe fansoun emon me neir a apasa ngeni i: Met wewen ekkewe kapas minne ra makketiw, me minne a fen afanafan me ren semem kewe, a apasa:

21 Ifa me ningen won ekkewe chuk ikewe pechen i ewe a wato porousen pwapwa; ewe a afanafana kinamwe; ewe a wato porousen pwapwan mettoch mi och; ewe a afanafana amanau; ewe a apasa ngeni Zion, Om Kot a nemenem;

22 Noumi kewe chon mas repwe anoumwongata mongungur; ren mongungur fengen repwe kon; pun repwe kuna ren meser nupwen ewe Samon epwe uweiato sefan Zion;

23 Puchoruu non pwapwa; kon fengen ami neni mi pon non Jerusalem; pun ewe Samon a fen ekinamwei noun kewe aramas, i a fen angei sefan Jerusalem;

24 Ewe Samon a fen pwarano poun mi fel me ne mesan ekkewe muu meinisin, me unusen nesopun ewe fonufan meinisin repwe kuna ewe amanauen ach Kot?

25 Iwe iei Apinatai a apasa ngeni ir: Ami pris, me oua tipen aiti ekkei aramas, me ita oua weweiti ewe ngunun osini, nge inamo oua mochen oupwe sinei seniei met wewen ekkei mettoch?

26 Ua apasa ngenikemi, riaffou epwe ngenikemi pun oua angawano kokkotun ewe Samon! Pun ika oua weweiti ekkei mettoch ousamo afanafaner; iei minne, oua fen angawano kokkotun ewe Samon.

27 Ousamo aea netipemi ami oupwe weweiti; iei minne, ousamo mirit. Iei minne, met oua aiti ngeni ekkei aramas?

28 Iwe ra apasa: Am aua aitir ewe annukun Moses.

29 Iwe a apasa sefani ngeni ir: Ika oua afanafana ewe annukun Moses pwata ouse aneasochi? Pwata oua iseta netipemi won pisek? Pwata oua fori angangen nisou me anusmwanieno ami pochokun ren ekkewe fin nisou, ewer, me fori ekkei aramas ar repwe fori tipis, pwe ewe Samon a fori an epwe tinieito ai upwe osini ngeni ekkei aramas, ewer, pwan mwo ew ennetin ngaw ngeni ekkei aramas?

30 Ouse sinei pwe ua fen kapas ennet? Ewer, oua sinei pwe ua kapas ennet; iwe ita oupwe chechech me mwen Kot.

31 Iwe ewe fansoun epwe feito pwe oupwe ninni pokiten ami kewe angangangaw, pun oua fen apasa pwe oua aiti usun ewe annukun Moses. Iwe met oua sinei usun ewe annukun Moses? Met amanau a feito seni ewe annukun Moses? Met oupwe apasa?

32 Iwe ra ponueni me apasa pwe amanau a feito seni ewe annukun Moses.

33 Nge iei Apinatai a apasa ngeni ir: Ua sinei pwe ika oua aneasochisi ekkewe annukun Kot oupwe manau; ewer, ika oua aneasochisi ekkewe annuk minne ewe Samon a ngeni Moses me won ewe chukun Sinai, a apasa:

34 Ngang ewe Samon ami Kot, ewe a uweiakemiu seni ewe fonuen Egypt, seni ewe imwen fotek.

35 Ousap nuku pwan emon Kot me nukui.

36 Ousap for ngenikemi ekkoch nios mi fanafan, are ekkoch nikinikin och mettoch non ngang asan, are mettoch minne ra nom non ewe fonufan fan.

37 Iei Apinatai a apasa ngeni ir, Oua fen fori ekkei meinisin? Ua apasa ngenikemi, Apw, ousamo. Iwe met oua fen aiti ekkei aramas pwe repwe fori ekkei mettoch meinisin? Ua apasa ngenikemi, Apw, ousamo.