1 Iei non ewe fansoun pwe mwirin an ekkewe anuon noun Mosaia ra awesano ekkei mettoch meinisin, ra uweingenir ew chokukkunun mwicheich me niwin ngeni semer we, ewe king, me ra mochen seni i pwe epwe mut ngeni ir pwe repwe tongeni, fiti ekkei ra fen finireta, pwe repwe feita ngeni ewe fonuen Nifai pwe repwe tongeni afanafana ekkewe mettoch minne ra fen rongorong, me pwe repwe tongeni pwarano ewe kapasen Kot ngeni pwir kewe, ekkewe chon Leiman—

2 Pwe menin repwe tongeni uwei ir ngeni ewe mirit usun ewe Samon ar Kot, me peser usun angangangawen semer kewe; me pwe menin repwe tongeni echikarer seni ar oput ekkewe chon Nifai, pwe repwe tongeni pwan uweir ngeni pwapwa non ewe Samon ar Kot, pwe repwe tongeni chiechioch fengen nefiner, me pwe esap pwan chiwen wor anini fengen non unusen ekkewe fonu meinisin minne ewe Samon ar Kot a fen awora ngeni ir.

3 Iei ra fokkun mochen pwe amanau epwe affateno ngeni aramas meinisin, pun rese tongeni engino ngeni an ngunun emon aramas epwe mano non pekin ngun; ewer, pwan mwo ewe ekiek an emon ngun epwe mefi riaffou esemuch a forir ar repwe pouk me chechech.

4 Iwe iei ewe Ngunun ewe Samon a angang wor, pun ir ra fokkun unusen aramas tipisingaw. Iwe ewe Samon a ekieki pwe mi fich non an umoumoch esemuch pwe epwe amanauer; nge inamo ra mefi riaffoun ngun chapur pokiten ar kewe angangangaw, ra riaffou chapur me nuokus ika pwe repwe katuruno feinfeino chok.

5 Iwe non ewe fansoun pwe ra sio ngeni semer we non chommong ran pwe repwe tongeni feita ngeni ewe fonuen Nifai.

6 Iwe king Mosaia a feino me eis me ren ewe Samon ika epwe mut ngeni noun kewe anuon ar repwe feita nein ekkewe chon Leiman ne afanafana ewe kapas.

7 Iwe ewe Samon a apasa ngeni Mosaia: Mut ngeni ir repwe feita, pun chommong repwe nuku non ar kewe kapas, iwe epwe wor ar manau esemuch; iwe upwe angasa noum kewe anuon seni ne poun ekkewe chon Leiman.

8 Iwe non ewe fansoun pwe Mosaia a mutata pwe repwe tongeni feita me fori anongonong won ar we tingor.

9 Iwe ra sai non ewe fonu pon pwe repwe feita pwe repwe afanafana ewe kapas me nein ekkewe chon Leiman; iwe upwe awora ew uruon ar we angang mwirin.

10 Iei ese wor ion king Mosaia epwe mutano ewe muu won, pun ese wor emon me nein noun kewe anuon a mochen etiwa ewe muu.

11 Iei minne a angei ekkewe uruo minne mi makketiw won ekkewe seleichen brass, me pwan ekkewe seleichen Nifai, me ekkewe mettoch meinisin minne a fen ioni me tumunu anongonong won ekkewe annukun Kot, mwirin an awewer me forir pwe repwe makkei ekkewe uruo minne mi nom won ekkewe seleichen gold minne ra pwá me ren ekkewe aramasen Limai, minne ra kawor ngeni i me ren poun Limai;

12 Iwe ei a fori pokiten ewe aurek chapur an noun kewe aramas; pun ra fokkun mochen nap seni ar repwe auku ar repwe sinei usun ekkewe aramas ra fen ninnino.

13 Iwe iei a awewer ren an nounou ekkewe ruofou foun fau minne ra fofonong ngeni nepekin ekkewe ru pachen mesekinas.

14 Iei ekkei mettoch mi amonneta seni nepoputan, me ra keititiw seni tappin aramas ngeni tappin aramas, ren ewe popun awewen kapas;

15 Iwe ra fen isois me tumun me ren poun ewe Samon, pwe epwe tongeni pwar ngeni aramas meinisin ekkewe ra fonueni ewe fonu usun angangangawen me angang mi anieput an noun kewe aramas;

16 Iwe ion ewe a nom ren ekkei mettoch a iteni chon osini, anongonong won napanapen ekkewe fansoun nom.

17 Iei mwirin an Mosaia a awesano an awewei ekkei uruo, nengeni, a awora ew uruon ekkewe aramas minne ra fen ninnino, seni ewe fansoun ra fen ninnino niwin ngeni fansoun kauutan ewe tower mi tekia, atun ewe fansoun ewe Samon a aruka kapasen ekkewe aramas iwe ra toropas fetan won unungen unusen ewe fonufan, ewer, pwan mwo seni ena fansoun niwin ngeni ewe fansoun forutan Adam.

18 Iei ei uruo a fori an ekkewe aramasen Mosaia repwe fokkun netipeta, ewer, ra uren netipechou; nge inamo a ngeni ir watten mirit, ren minne ra pwapwa.

19 Iwe ei uruo epwe makketiw mwirin; pun nengeni, mi auchea pwe aramas meinisin repwe sinei usun ekkewe mettoch minne ra makketiw non ei uruo.

20 Iwe iei, usun ua apasa ngenikemi, pwe mwirin an king Mosaia a awesi ekkei mettoch, a angei ekkewe seleichen brass, me ekkewe mettoch meinisin minne a fen isoni, me wareta won Alma, i ewe anuon noun Alma; ewer, ekkewe uruo meinisin, me pwan ekkewe pisekin awewen kapas, iwe a wareta won, me a annuku ngeni i pwe epwe isonir me tumunur, me pwan isoni ew uruon ekkewe aramas, epwe eitiretiw seni ew tappin aramas ngeni pwan ew, usun ra fen keititiw seni ewe fansoun Liai a su seni Jerusalem.