1 Ma sa oo ina ua mavae atu le va o tausaga e lua na sau ai Apinati ia te i latou ua faafoliga ese, sa latou lē iloa ai o ia, ma amata ona vavalo atu ia te i latou, e faapea: Ua faapea ona poloaiina o a’u e le Alii, ua fetalai mai—Apinati e, alu atu ia ma vavalo atu ia i latou nei o lo’u nuu, ona ua latou faamaaa o latou loto e tetee mai i a’u upu; ua latou lē salamo ia latou mea leaga ua fai; o lea, o le a Ou asiasi atu ai ia te i latou i lo’u toasa, ioe, i lo’u toasa tele o le a Ou asiasi atu ai ia te i latou i a latou amioletonu ma mea inosia.

2 Ioe, oi talofa i lenei tupulaga! Ma sa fetalai mai le Alii ia te a’u: Faaloaloa atu lou lima ma vavalo atu, e faapea: Ua faapea ona fetalai mai o le Alii, o le a oo mai lenei tupulaga i le pologa, ona o a latou amioletonu, ma o le a taia i latou i le alafau; ioe, ma o le a tutulia e tagata, ma o le a fasiotia, ma o le a ’aina o latou tino e taie o le ea, ma ’ulī, ioe, ma manu fe’ai.

3 Ma o le a oo mai, o le ola o le tupu o Noa o le a pei le aoga o se ofu i totonu o se ogaumu aasa; ona o le a iloa e ia o A’u o le Alii.

4 Ma o le a oo mai o le a Ou taiaina lo’u nuu lenei i puapuaga tigā, ioe, i le oge ma faama’i; ma o le a Ou faia ia latou tagiauē i le aso atoa.

5 Ioe, ma o le a Ou faia ia saisai avega i luga o o latou pāpātua; ma o le a tulituli i latou i luma e pei o se asini gūgū.

6 Ma o le a oo mai o le a Ou auina atu uato’a ia i latou, ma o le a taia ai i latou; ma o le a taia foi i latou i le matagi mai sasa’e; ma o le a faatama’ia foi lo latou laueleele e iniseti, ma ’aina a latou saito.

7 Ma o le a taia i latou i se faama’i tele—ma o nei mea uma o le a Ou faia ona o a latou amioletonu ma a latou mea inosia.

8 Ma o le a oo mai se’i vagana ua latou salamo, o le a Ou matuā faaumatia lava i latou mai luga o le lalolagi; peitai o le a latou tuua se talafaamaumau pe a mavae atu i latou, ma o le a Ou faasaoina ia talafaamaumau mo isi atunuu o le a mauaina le laueleele; ioe, o le a Ou faia lava lenei mea ina ia mafai ona Ou faaali atu mea inosia a lenei nuu i isi atunuu. Ma e tele mea na vavalo atu ai Apinati e faasaga i lenei nuu.

9 Ma sa oo ina latou feita ia te ia; ma sa latou noanoatia ma auina atu o ia i luma o le tupu, ma fai atu i le tupu: Faauta, ua matou aumai i ou luma se tagata o lē sa ia valoia mea leaga e uiga i lou nuu, ma fai mai o le a faaumatia i latou e le Atua.

10 Ma sa valoia foi e ia mea leaga e uiga i lou soifua, ma fai mai o le a pei lou soifua o se ofu e i totonu o se ogaumu o le afi.

11 Ma lea foi, sa fai mai o ia o le a pei oe o se ’ausaito, o se ’ausaito mago lava o le fanua, e taufetuli ai i luga manu vaefa ma soli i lalo o vae.

12 Ma lea foi, ua fai mai o ia o le a pei oe o se fuga o se laau tuitui, lea, a oo ina matua lelei, pe a agi le matagi, e lelea atu ai i luga o le laueleele. Ma ua ia faafoliga mai ua fetalai mai ai le Alii. Ma ua fai mai o ia o le a oo mai nei mea uma i ou luga vagana ai ua e salamo, ma o le a oo mai nei mea ona o au amioletonu.

13 Ma o lenei, le tupu e, o se a se leaga tele ua e faia, pe o a foi ni agasala tetele ua faia e lou nuu, o le a ta’usala ai i tatou e le Atua pe ua faamasinoina ai e lenei tagata?

14 Ma o lenei, le tupu e, faauta, ua matou lē sala, ma o oe, le tupu e, e te lei agasala; o lea, ua pepelo le tagata lenei e uiga ia te oe, ma ua le aogā mea sa ia valoia.

15 Ma faauta, ua tatou malolosi, o le a lē faapologaina i tatou, pe ave faatagataotaua e o tatou fili; ioe, ma ua e manuia i le laueleele, ma o le a e manuia foi.

16 Faauta, o le tagata lenei, matou te tuu atu o ia i ou aao; e mafai ona e faia ia te ia e pei ona lelei ia te oe.

17 Ma sa oo ina faia e le tupu o Noa ia lafo Apinati i le falepuipui; ma sa poloai atu o ia i faitaulaga ia latou faapotopoto faatasi i latou lava ina ia mafai e ia ona faia se fono faatasi ma i latou po o se a se mea e tatau ona ia faia ia te ia.

18 Ma sa oo ina latou fai atu i le tupu: Aumai o ia iinei, ina ia mafai ona tatou fesili atu ia te ia; ma sa poloai atu le tupu ia aumai o ia i o latou luma.

19 Ma sa amata ona latou tuufesili atu ia te ia, ina ia mafai ona latou faafesasia’i o ia, ina ia mafai ona latou maua o se mea e tuua’ia ai o ia; peitai sa tali atu o ia ia te i latou ma le mautinoa, ma faamalie a latou fesili uma, ioe, i lo latou ofo tele; ona sa ia mafai ona tali atu ia i latou i a latou fesili uma, ma faafemēmēa’i i latou i a latou upu uma.

20 Ma sa oo ina fai mai se tasi o i latou ia te ia: O le a le uiga o upu ua tusia, ma ia sa a’oa’o mai e o tatou tamā, fai mai:

21 E matuā matagofie lava i luga o mauga vae o ia o lē na te aumai tala e lelei; o lē na te talai atu le filemu; o lē na te aumai tala e lelei o mea lelei; o lē na te talai atu le faaolataga; o lē e fai atu ia Siona, Ua nofotupu lou Atua;

22 O le a sii a’e le leo o ou leoleo; o le a latou pepese faatasi i lea leo; ona o le a latou faafesagai pe a toe faafoi mai Siona e le Alii;

23 Alalaga ia i le olioli; pepese faatasi i o outou nofoaga tuufua o Ierusalema; ona ua faamafanafanaina e le Alii lona nuu, ua togiola e ia Ierusalema;

24 Ua afe e le Alii lona aao paia i mata o atunuu uma, ma o le a vaai tulu’iga uma o le lalolagi i le faaolataga a lo tatou Atua?

25 Ma o lenei sa fai atu Apinati ia te i latou: O outou o faitaulaga, ua manatu e faapea ua outou a’oa’oina lenei nuu, ma malamalama i le agaga o valoaga, ae ua outou fia iloa mai ia te a’u le uiga o nei mea?

26 Ou te fai atu ia te outou, oi talofa ia te outou i lo outou faapi’opi’o o ala o le Alii! Ona afai ua outou malamalama i nei mea, tou te lei a’oa’oina atu; o lea, ua outou faapi’opi’o ai ala o le Alii.

27 Tou te le’i faaaogaina o outou loto tou te malamalama ai; o lea, sa outou lē popoto. O lea, o ni a ua outou a’oa’o atu i lenei nuu?

28 Ma sa latou fai mai: Ua matou a’oa’o atu le tulafono a Mose.

29 Ma sa toe fai atu o ia ia te i latou: Afai ua outou a’oa’o atu le tulafono a Mose aisea ua outou lē tausia ai? Aisea ua pupū ai o outou loto i ’oa? Aisea ua outou faia ai le faitaaga ma faaalu lo outou malosi ma fafine talitane, ioe, ma uunai lenei nuu e fai le agasala, ua faia ai e le Alii e auina mai a’u e vavalo faasaga atu i lenei nuu, ioe, se leaga tele e faasaga i lenei nuu?

30 Tou te le iloa ea ua ou tautala atu i le upumoni? Ioe, ua outou iloa ua ou tautala atu i le upumoni; ma ua tatau ona outou gatete i luma o le Atua.

31 Ma o le a oo mai o le a taia outou ona o a outou amioletonu, ona ua outou fai mai ua outou a’oa’o atu le tulafono a Mose. Ma pe se a se mea ua outou iloa e uiga i le tulafono a Mose? E ala mai ea le faaolataga i le tulafono a Mose? O ni a fa a outou?

32 Ma sa latou tali mai ma fai mai o le faaolataga e ala mai i le tulafono a Mose.

33 Ae o lenei sa fai atu Apinati ia te i latou: Ua ou iloa afai tou te tausi i poloaiga a le Atua e faaolaina outou; ioe, pe afai tou te tausi i tulafono na tuu mai e le Alii ia Mose i le mauga o Sinai, e faapea:

34 O A’u o le Alii lou Atua, o lē na aumaia oe mai le nuu o Aikupito, mai le fale o le pologa.

35 Aua e te fai mo oe se Atua ese i o’u luma.

36 Aua e te fai mo oe se tupua ua ta, po o se faatusa o se mea o i le lagi i lugā, po o mea o loo i le lalolagi i lalō.

37 O lenei sa fai atu Apinati ia te i latou, ua outou faia ea nei mea uma? Ou te fai atu ia te outou, E leai, tou te le’i faia. Ma ua outou a’oa’oina ea lenei nuu ia latou faia nei mea uma? Ou te fai atu ia te outou, E leai, tou te le’i aoaoina lava.