1 Relik chi yaal, ma ink’a’ ajwi’ naxye laj Isaias: Ani xpaab’ank re li esil qayehom, ut ani chi aj-u k’utb’esinb’il xtel li Qaawa’?

2 Xb’aan naq a’an taanimanq chiru jo’ jun xq’unil toonal li che’, ut jo’ jun xe’ na’el chaq sa’ chaqi ch’och’; moko wan ta xxaqalil chi moko xchaq’al ru; ut naq taqil maajun ch’ina-usil wan re taqara.

3 Xik’ ilb’il ut tz’eqtaananb’il xb’aaneb’ li winq; jun winq re rahil ch’oolejil, ut k’aynaq rik’in li rahil aamej; ut chanchan naq kiqamuq li qilob’aal chiru; xik’ ki’ile’, ut ink’a’ kiqak’e xwankil.

4 Ch’olch’o naq a’an x’iiqank re lix rahil qach’ool, ut xk’am xrahil li qaam; a’b’anan kiqak’oxla naq rahob’tesinb’il, sak’b’il xb’aan li Dios, ut tawasinb’il.

5 A’b’an kitoch’e’ sa’ xk’ab’a’ li q’etok aatin kiqab’aanu laa’o, kitene’ sa’ xk’ab’a’ li qamaa’usilal; li ch’iilank koowan wi’ sa’ tuqtuukilal kiwan sa’ xb’een a’an; ut rik’in li rapleek kixk’ul a’an, nokok’irtesiik.

6 Chiqajunil jo’ karneer xqasach li qab’e; xikenaqo, sa’ xb’e xb’e li junjunq; ut li Qaawa’ kixk’e sa’ xb’een a’an li qamaa’usilal chiqajunil.

7 Kirahob’tesiik, ut kitawasiik, a’ut moko kixte ta xtz’uumal re; k’amb’il sa’ li kamsink jo’ jun saaj karneer, ut jo’ jun karneer mem chiruheb’ li neke’b’esok re, chi jo’kan moko kixte ta xtz’uumal re.

8 Ki’isiik chaq sa’ tz’alam ut sa’ raqleb’ aatin; ut ani taach’olob’anq resil li ralal xk’ajol? Xb’aan naq ki’isiik chaq sa’ xch’och’eb’ li yo’yo; sa’ xk’ab’a’ li q’etok aatin re lin tenamit kirahob’tesiik.

9 Ut kixtaw xmuqleb’aal kamenaq rik’ineb’ laj maak, ut rik’ineb’ li b’ihom sa’ xkamik, xb’aan naq maajun maa’usilal kixb’aanu chaq, chi moko kiwan junaq b’alaq’ sa’ xtz’uumal re.

10 A’b’anan kiwulak chiru li Dios xtenb’al; a’an kixrahob’tesi xch’ool; naq taak’e li raam jo’ mayej choq’ re li maak a’an taaril li riyajil, tixnajtob’resi ru lix kutan, ut li nasaho’ wi’ xch’ool li Qaawa’ taa’usaaq sa’ ruq’.

11 Taaril lix tawajik li raam, ut tz’aqalaq xch’ool; rik’in xnawom lin moos tiik xch’ool tixtiikob’resiheb’ ru naab’al; xb’aan naq a’an taariiqa lix maa’usilaleb’.

12 Jo’kan naq tinjach jun jachal choq’ re rochb’eeneb’ li xninqaleb’ ru, ut a’an tixjach ru li k’a’ru maq’b’il rochb’een li kaweb’ xmetz’ew, xb’aan naq kixhoy chaq li raam toj reetal naq kikam, ut kik’ehe’ sa’ ajl sa’ xyanqeb’ laj q’etol aatin; ut kixk’am xmaakeb’ naab’al, ut kixb’aanu ruuchileb’ laj q’etol aatin.