1 Yes, mo tu, Aesea i no talem se: ?Huia i bin bilivim ripot blong mifala, mo long huia, Lod i bin soem han blong hem?

2 From bae hem i gro i kam antap long fored blong hem olsem wan plant we i sofsof, mo olsem wan rus we i kamaot long graon we i drae; hem i no gat sep mo i no luk naes tumas; mo taem we bae yumi luk hem, i no gat wan samting blong pulum ae blong yumi blong mekem se yumi wantem hem.

3 Oli lukluk daon long hem mo ol man oli tanem baksaed long hem; wan man blong ol harem nogud, mo hem i savegud ol samting we oli mekem man i harem nogud; mo i olsem se yumi bin tanem ol fes blong yumi longwe long hem; yumi bin lukluk daon long hem mo yumi no bin tingting hevi long hem.

4 I tru se hem i bin tekem ol soa long hat blong yumi mo hem i bin tekem ol harem nogud blong yumi; be stil, yumi ting se hem i bin kasem panis, panis ia we i kam long God, mo hem i bin gat hadtaem.

5 Be hem i bin kasem kil from ol fasin blong yumi blong brekem loa, skin blong bodi blong hem i bin kasem ol mak blong kil from ol rabis fasin blong yumi; mo fasin blong stretem yumi we i givim pis, i bin stap long hem; mo tru long ol mak blong kil blong hem, yumi kam oraet.

6 Yumi evriwan, olsem ol sipsip, i bin go olbaot; yumi bin tanem, evriwan i bin go long wanwan rod blong hem; mo Lod i bin putum long hem ol rabis fasin blong yumi evriwan.

7 Oli bin mekem nogud fasin long hem, mo oli bin givim hadtaem long hem, be stil hem i no bin openem maot blong hem; oli karem hem i go olsem wan smol sipsip we i go blong kasem ded, mo olsem wan sipsip long fored blong ol man blong katemaot hea blong sipsip, hem i no save toktok, olsem ia hem i no bin openem maot blong hem.

8 Oli bin tekemaot hem long kalabus mo aot long jajmen; mo ?huia bae i talemaot huia jeneresen blong hem? From oli bin katemaot hem long graon blong olgeta we oli stap laef; from ol fasin blong brekem ol loa blong ol pipol blong mi, hem i bin gat hadtaem.

9 Mo hem i bin mekem gref blong hem wetem ol nogud man, mo wetem ol rijman long ded blong hem; from hem i no bin mekem wan nogud samting, mo tu, i no bin gat eni rabis toktok long maot blong hem.

10 Be stil Lod i bin glad blong hem i kasem mak blong kil; hem i bin putum hem blong i harem nogud; taem we bae yu mekem sol blong hem i wan ofring blong sin, bae hem i luk ol pikinini blong hem, bae hem i mekem ol dei blong hem i go longwan, mo glad blong Lod bae i kam antap gud long han blong hem.

11 Bae hem i luk ol safa blong sol blong hem, mo bae hem i harem gud; tru long save blong hem bae stret mo gud wokman blong mi i talem se plante i no gat rong; from bae hem i karem ol rabis fasin blong olgeta.

12 From hemia, bae mi givim pat blong hem wetem olgeta we oli bigfala, mo bae hem i seraotem ol samting we hem i bin tekem taem we hem i bin go stil long haos, wetem olgeta we oli strong; from hem i kapsaetem sol blong hem i go long ded; mo oli bin kaontem hem wetem olgeta we oli brekem loa; mo hem i bin karem ol sin blong plante man, mo i bin toktok long bihaf blong olgeta we oli brekem loa.