1 Mo nao, i bin hapen se ol fasin blong givim hadtaem we olgeta we oli no biliv oli mekem agensem jos i kam bigwan tumas, mekem se jos i stat blong komplen smolsmol, mo oli komplen long ol lida blong olgeta long saed ia; mo oli komplen long Alma. Mo Alma i tekem samting ia i go long fored blong king blong olgeta, Mosaea. Mo Mosaea i holem wan miting wetem ol pris blong hem.

2 Mo i bin hapen se king Mosaea i sendem wan ofisol toktok i go long pablik long graon raonabaot blong talem se bae i no save gat wan man we i no biliv i givim hadtaem long olgeta we oli blong jos ia blong God.

3 Mo i gat wan strong rul raon long evri jos, se bae i no mas gat fasin ia blong givgivim hadtaem long medel blong olgeta, blong mekem se evri man i mas gat sem raet nomo;

4 Blong oli no mas letem hae tingting, o bigfala flas, i spolem gudfala pis blong olgeta; blong evri man i mas mekem i gud long neba blong hem olsem i mekem i gud long hemwan, blong oli wok wetem ol han blong olgeta nomo blong sapotem olgeta.

5 Yes, mo evri pris blong olgeta mo evri tija blong olgeta oli mas wok wetem ol han blong olgeta blong sapotem olgeta, long evri taem be nomo sapos oli sik, o sapos oli gat bigfala nid tumas; mo taem oli mekem olgeta samting ia, oli kasem fulap gladhat blong God.

6 Mo i stat blong gat bigfala pis bakegen long graon; mo ol pipol oli stat blong kam plante, mo oli stat blong seraot i go olbaot long fes long graon, yes, long Not mo long Saot, long Is mo long Wes, oli bildim ol bigfala bigtaon mo ol vilej long evri pat blong graon.

7 Mo Lod i bin visitim olgeta mo i mekem olgeta oli kam antap gud, mo oli kam wan pipol we i bigwan long namba mo i rij.

8 Nao, ol boe blong Mosaea, oli kaontem olgeta wetem olgeta we oli no biliv; mo tu, wan long ol boe blong Alma, oli bin kaontem hem wetem olgeta, oli bin singaotem hem Alma, folem papa blong hem; be, hem i bin kam wan nogud man mo man blong wosipim ol aedol. Mo hem i wan man we i toktok plante, mo i talem plante flas toktok long ol pipol; from hemia, hem i lidim plante long ol pipol blong mekem ol semmak rabis fasin blong hem.

9 Mo hem i bin kam olsem wan bigfala samting we i blokem jos ia blong God blong kam antap; hem i stap stilim hat blong ol pipol i go, i mekem se i gat plante strong raorao i hapen long medel blong ol pipol, we i givim wan janis long enemi blong God blong yusum paoa blong hem ova long olgeta.

10 Mo nao i bin hapen se taem we hem i stap go aot blong prapa spolem gud jos ia blong God, from hem i bin go long sikret wetem ol boe blong Mosaea blong lukaotem blong prapa spolem gud jos, mo blong lidim ol pipol blong Lod blong mekem rong samting, we hemia i agensem ol komanmen blong God, o king tu—

11 Mo olsem we mi bin talem long yufala, taem we oli stap go aot agensem God, luk, wan enjel blong Lod i kamkamaot long olgeta; mo hem i kamdaon olsem se hem i stap long wan klaod; mo hem i toktok olsem se hem i gat wan voes blong tanda, we i mekem graon i seksek long ples we oli bin stanap long hem;

12 Mo sapraes blong olgeta i bin bigwan tumas, mekem se oli foldaon long graon, mo oli no andastanem ol toktok we hem i talem long olgeta.

13 Be hem i toktok laod bakegen, i talem: “Alma, girap mo kam long fored; ?from wanem yu givim hadtaem long jos ia blong God? From Lod i bin talem: ‘Hemia i jos blong mi, mo bae mi stanemap jos; mo i no save gat wan samting i save putumdaon hem, be nomo fasin blong brekem loa blong ol pipol blong mi.’”

14 Mo bakegen, enjel i talem: “Luk, Lod i bin harem ol prea blong ol pipol blong hem, mo tu, ol prea blong wokman blong hem, Alma, we i papa blong yu; from hem i bin prea wetem fulap fet long saed blong yu blong oli save tekem yu i kam blong kasem save blong trutok; from hemia, from stamba tingting ia, mi mi kam blong winim tingting blong yu blong mekem se yu save paoa mo atoriti blong God, blong ol prea blong ol wokman blong hem i save gat ansa folem fet blong olgeta.

15 Mo nao luk, ?yufala i save toktok agensem paoa blong God? ?From luk, voes blong mi i no mekem graon i seksek? ?Mo tu, yufala i no save luk mi long fored blong yufala? Mo God nao i bin sendem mi.

16 Nao mi talem long yu: Go, mo tingbaot taem we ol bubu blong yu oli bin stap long kalabus long graon blong Helam, mo long graon blong Nifae; mo tingbaot ol bigfala samting we hem i bin mekem long olgeta; from oli bin slef mo hem i mekem olgeta oli kam fri. Mo nao mi talem long yu: Alma, go long rod blong yu, mo nomo lukaotem blong prapa spolem gud jos, blong mekem se oli save kasem ansa blong ol prea blong olgeta, mo hemia iven sapos yu yuwan, yu wantem se oli sakemaot yu.”

17 Mo nao, i bin hapen se hemia oli ol las toktok we enjel i talem long Alma, mo hem i aot.

18 Mo nao, Alma mo olgeta we oli bin stap wetem hem oli foldaon bakegen long graon, from sapraes blong olgeta i bigwan tumas; from wetem ae blong olgeta nomo oli luk wan enjel blong Lod; mo voes blong hem i bin olsem tanda, we i mekem graon i seksek; mo oli save se i no gat wan samting, be paoa blong God nomo, we i save mekem graon i seksek mo mekem se i seksek olsem se bae i brokbrok.

19 Mo nao sapraes blong Alma i bin bigwan tumas mekem se hem i no save toktok, we i no save openem maot blong hem; yes, mo hem i kam slak tumas, kasem we hem i no save muvum ol han blong hem; from hemia, olgeta we oli stap wetem hem, oli tekem hem mo oli karem hem from hem i no save mekem wan samting, go kasem taem we oli putum hem daon, i slip long fored blong papa blong hem.

20 Mo oli talem long papa blong hem evri samting we i bin hapen long olgeta; mo papa blong hem i glad, from hem i save se hemia i paoa blong God.

21 Mo hem i bin mekem se wan grup blong pipol bae i kam tugeta blong mekem se oli save witnes long wanem we Lod i bin mekem blong boe blong hem, mo tu, blong olgeta we oli bin stap wetem hem.

22 Mo hem i mekem se ol pris oli mas kam tugeta; mo oli stat blong livim kakae, mo blong prea long Lod God blong olgeta blong bae hem i openem maot blong Alma, blong hem i save toktok, mo tu, blong ol leg mo ol han blong hem oli save kasem paoa blong olgeta—blong ol ae blong ol pipol oli save open blong oli luk mo blong oli save long saed blong gudfala fasin mo glori blong God.

23 Mo i bin hapen se afta we oli livim kakae mo prea blong tu dei mo tu naet, ol leg mo ol han blong Alma oli kasem paoa blong olgeta, mo hem i stanap, mo i stat blong toktok long olgeta, i askem olgeta blong stap hapi.

24 Hem i talem: “From, mi bin sakem ol sin blong mi, mo Lod i bin pemaot mi; luk, mi mi bon long saed blong Spirit.

25 Mo Lod i talem long mi: ‘No sapraes se evri man, yes, ol man mo ol woman, evri kantri, famli, lanwis mo pipol, oli mas bon bakegen; yes, oli mas bon long God, oli mas jenis long fasin blong wol mo fasin blong foldaon blong olgeta we oli stap long hem, i go long wan stret mo gud fasin, from God i bin pemaot olgeta, mo oli kam ol boe mo ol gel blong hem;

26 Mo olsem ia nao oli kam ol niu man; mo sapos oli no mekem samting ia, i no gat eni wei, we oli save kasem kingdom blong God.

27 Mo mi talem long yufala, sapos i no olsem ia, God i mas sakemaot olgeta’; mo hemia mi save, from we kolosap oli sakemaot mi.

28 Be, afta we mi wokbaot tru long plante hadtaem, we mi stap sakem sin kasem taem we kolosap mi ded, Lod i gat sore, i luk se i stret blong tekemaot mi long wan faea we i no gat en, mo mi mi bon long God.

29 Sol blong mi, Lod i bin pemaot long konkon rabis ples ia mo long ol rop blong rabis fasin. Mi bin stap long wan hol we i go daon we i go daon mo i tudak evriwan; be nao mi luk gudfala laet blong God. Oli bin mekem sol blong mi i soa wetem trabol we i no save finis; be Lod bin tekemaot mi, mo sol blong mi i nomo soa.

30 Mi bin sakemaot Ridima blong mi, mo tanem baksaed blong mi long wanem we ol papa blong yumi oli bin talemaot; be naoia, blong oli save luk se bae hem i kam, mo we hem i tingbaot evri samting we hem i bin mekem, bae hem i soemaot hem long evriwan.

31 Yes, evri ni bae i bodaon, mo evri tang bae i talemaot tru samting long fored blong hem. Yes, long las dei tu, taem we evri man bae i stanap blong hem i jajem olgeta, ale, bae oli talemaot se hem i God; afta, olgeta we oli laef long wol be oli no gat God, bae oli talemaot se jajmen blong wan panis we i no gat en hem i stret long olgeta; mo bambae oli seksek, mo seksek from fraet, mo oli kam smol evriwan andanit long hem we ae blong hem i save luk kwik long evri samting.”

32 Mo nao i bin hapen se Alma, stat long tetaem ia i go, i stap tijim ol pipol, mo olgeta we i bin stap wetem Alma long taem we enjel i bin kamaot long olgeta, i stap wokbaot raonabaot truaot long graon, mo stap talemaot long evri pipol ol samting we oli bin harem mo bin luk, mo oli stap prijim toktok blong God wetem fulap hadtaem, olgeta we oli no biliv oli givim tumas hadtaem long olgeta, mo plante long olgeta ia oli bin faetem olgeta.

33 Be i nomata long evri samting ia, oli givim plante help long jos, mekem fet blong olgeta i kam strong, mo oli stap askem samting strong long olgeta wetem longfala tingting tru long hadtaem, mo wetem plante hadwok blong obei long ol komanmen blong God.

34 Mo fo long olgeta oli ol boe blong Mosaea; mo ol nem blong olgeta i Amon, mo Eron, mo Omna, mo Himnae; hemia ol nem blong ol boe blong Mosaea.

35 Mo oli wokbaot truaot long evri graon blong Sarahemla, mo long medel blong ol pipol we oli stap anda long rul blong king Mosaea, oli wok had blong stretem ol samting nogud we oli bin mekem long jos, oli talemaot evri sin blong olgeta, mo oli talemaot evri samting we oli bin luk, mo oli eksplenem ol profesi mo ol skripja long evriwan we i bin wantem blong harem olgeta.

36 Mo olsem ia nao oli bin ol tul long ol han blong God blong karem plante oli kam long save blong trutok, yes, long save long saed blong Ridima blong olgeta.

37 !Mo hamas blesing nao oli gat! From oli talemaot pis; mo oli talemaot gudfala nius blong gud samting; mo oli talemaot long ol pipol se Lod i stap rul.