1 Mo nao i bin hapen se taem we Abinadae i finisim ol toktok ia, king i givim oda blong ol pris oli tekem hem mo kilim hem i ded.

2 Be i bin gat wan long olgeta we nem blong hem i Alma, hem tu i kamaot long laen blong Nifae. Mo hem i wan yangfala man, mo hem i bilivim ol toktok we Abinadae i bin talemaot, from hem i save long saed blong rabis fasin we Abinadae i testifae agensem olgeta long hem; from hemia, hem i stat blong askem strong long king blong hem i no kros long Abinadae, be blong hem i letem se hem i save aot long pis.

3 Be king i kros moa, mo i mekem se oli sakemaot Alma long medel blong olgeta, mo hem i sendem ol wokman blong hem blong folem Alma blong mekem se oli save kilim hem i ded.

4 Be hem i ronwe long olgeta, mo i haed blong mekem se oli no faenem hem. Mo from hem i haed blong plante dei, hem i raetem evri toktok we Abinadae i bin talemaot.

5 Mo i bin hapen se king i mekem se ol gad blong hem oli raonem Abinadae mo tekem hem; mo oli fasem hem mo sakem hem i go long kalabus.

6 Mo afta tri dei, afta we hem i toktok finis wetem ol pris blong hem, hem i mekem se oli tekem Abinadae i kam bakegen long fored blong hem.

7 Mo hem i talem long hem: “Abinadae, mifala i bin faenem wan rong agensem yu, mo i stret blong yu ded.

8 From yu bin talem se God hemwan bae i kam daon long medel blong ol pikinini blong ol man; mo nao, taswe, bae oli kilim yu i ded, be nomo sapos yu karembak evri toktok we yu bin talemaot we i nogud long saed blong mi mo ol pipol blong mi.”

9 Nao Abinadae i talem long hem: “Mi talem long yufala, bae mi no karembak ol toktok we mi bin talemaot long yufala long saed blong ol pipol ia, from oli tru; mo blong mekem se yufala i save se oli tru, mi letem mi blong foldaon long han blong yufala.

10 Yes, mo bae mi safa i go kasem ded, mo bae mi no karembak ol toktok blong mi, mo bae oli stap olsem wan testemoni agensem yufala. Mo sapos yufala i kilimded mi bae yufala i mekem blad blong wan man we i no gat rong i ron, mo tu, samting ia bae i stap olsem wan testemoni agensem yufala long las dei.”

11 Mo nao king Noa i rere blong letem hem i go, from hem i fraet long toktok blong hem, from hem i fraet se ol jajmen blong God bae oli kam long hem.

12 Be ol pris oli singaot strong agensem hem, mo oli stat blong toktok agensem hem, oli talem: “Hem i bin toktok agensem king.” From hemia, king i kam kros agensem hem, mo hem i givim hem long olgeta blong mekem se oli save kilim hem i ded.

13 Mo i bin hapen se oli tekem hem mo fasem hem, mo wipim skin blong hem wetem bandel stik faeawud we i laet, yes, go kasem taem we hem i ded.

14 Mo nao taem we ol flem oli stat blong bonem hem, hem i singaot i go long olgeta se:

15 “Luk, olsem we yufala i mekem long mi, olsem ia nao bae i kam blong hapen se ol pikinini blong yufala bae oli mekem se plante bae oli safa long ol soa blong bodi we mi stap safa long olgeta, we oli ol soa blong ded tru long faea; mo hemia, from oli bin biliv long fasin blong sevem man blong Lod, God blong olgeta.

16 Mo bae i kam blong hapen se bae yufala i kasem hadtaem wetem ol defren kaen sik from ol rabis fasin blong yufala.

17 Yes, mo bae oli faetem yufala long evri saed, mo bae oli ronem yufala, mo mekem se yufala i seraot i go olbaot, i go ia mo i kam ia, olsem wan wael grup blong animol, we ol wael mo rabis animol oli stap ronem olgeta.

18 Mo long dei ia, bae oli lukaotem yufala blong kasem yufala, mo han blong ol enemi blong yufala bae i holem yufala, mo afta, bae yufala i safa, olsem we mi mi safa, long ol soa blong ded tru long faea.

19 Olsem ia nao God i givimbak long olgeta we oli kilimded ol pipol blong hem. O God, tekem sol blong mi.”

20 Mo nao, taem we Abinadae i talem ol toktok ia, hem i foldaon, from hem i safa long ded tru long faea; yes, oli kilim hem i ded from hem i no save tanem baksaed blong hem long ol komanmen blong God, hem i soem se ol toktok blong hem oli tru, tru long ded blong hem.